Dɔmbɛlɔ ndo ekanelo ka yimba ekɔ
ohomba le ekambi wele l’ohetoheto
1. Kakɔna kakakimanyiya Yeso dia mbewɔ di’awui akina mbekola yimba yande oma l’olimu ande wakaleke ohomba?
1 Yeso aketsha dikɔlɔ dimɔtshi lo nkɔnɔla ase hemɔ ndo lo ntondja ɛdiɛngɛ. Lam’akayowoshola ambeki ande la wedi a pindju, vɔ wakate vɔate: “Antu weko lo nkuyanga,” lo mbokeketsha dia nde ntetemala la etsha ande wa mamba. Koko, Yeso kombetawɔ dia dui dimɔtshi mbêkola yimba oma l’olimu ande wakaleke ohomba wa nsambisha lokumu l’ɔlɔlɔ. Nde akâkadimola ate: “Tutshu l’ahuli akina, lu esumba weli lasuki, dia dimi ntusambisha ndu leko, ne dia dikambu diako mbakamayi.” Kakɔna kakakimanyiya Yeso dia ntetemala mbika washo l’olimu ande? Nde aketɔ la hiotshihotshi dia tɔlɔmba ndo tokana yimba. (Mako 1:32-39) Ngande wakoka dɔmbɛlɔ ndo ekanelo ka yimba tokimanyiya sho lawɔ dia monga apandjudi wele l’ohetoheto?
2. Awui akɔna wakokaso nkana la wɔ yimba wakoka tokimanyiya dia nama ohetoheto aso l’esambishelo?
2 Nkana yimba lo na? Yeso akɛnyi di’anto “wakahenyahenyama, ndu kundjala la ekimanyelu, uku ekoko waha la ulami.” (Mat. 9:36) Woho akɔ wâmɛ mbele, sho kokaka nkana yimba lo woho wele anto l’ohomba w’efula wa lokumu l’ɔlɔlɔ. Sho kokaka nkana yimba lo woho wahomba akambo salema la shamanya lo tena diasɛnaso nɛ. (1 Kor. 7:29) Sho kokaka nkana yimba lo elimu ndo lo waonga waki Jehowa, lo diɛsɛ diele la so dia monga Ɛmɛnyi wa Jehowa ndo lo awui w’oshinga wolo wa lo nyuma wamboteka oma l’Ɔtɛkɛta wa Nzambi waheye anto akina wa l’ɛtshi kaso ka nkɛtɛ.—Osam. 77:11-13; Is. 43:10-12; Mat. 13:52.
3. Etena kakɔna kakokaso nkana yimba?
3 Etena kakɔna kakokaso nkana yimba? Oko Yeso, amɔtshi mbetɔka la hiotshihotshi etena keke londjo bu. Akina mɛnaka ɔlɔlɔ nkana yimba la dikɔlɔ la ntondo ka ndala. (Etat. 24:63) Kânga tekɔ l’awui efula wa nsala, sho kokaka ntshungola etena ka kanaka yimba. Amɔtshi salaka dui sɔ etena kewɔ lo mituka wɛmba anto tshɛ. Akina salaka dui sɔ etena kalɛwɔ yangɔ ya la dikɔlɔ. Anto efula mɛnaka dia nkana yimba kânga minitɛ ngana la ntondo ka vɔ ntshɔ l’esambishelo mbâkimanyiyaka dia vɔ nsambisha l’ohetoheto w’efula ndo la dihonga.
4. Lande na kahombaso kanaka yimba?
4 Dɔmbɛlɔ ndo ekanelo ka yimba ayofudia nsaki kaso ka kambɛ Jehowa, ayototshutshuya dia mbika washo l’awui wa lo nyuma ndo ayokeketsha yɛdikɔ yaso ya ntetemala nsambisha.