Esambishelo ka lânde dia mbelɛ anto oya lo Eohwelo kayotatɛ ngɔndɔ ka sato 17
1. Esambishelo kakɔna kayotatɛ ngɔndɔ ka Sato 17?
1 Eohwelo kasalema ɔnɔnyi tshɛ tokimanyiyaka dia sho mbewoya anto nyɔi ka Yeso. (1 Kor. 11:26) Ɔnkɔnɛ, sho kombolaka di’anto akina ndjosangana kâmɛ la so ndo ndjohokamɛ wetshelo wendana la woshasha wa Jehowa wa tshungo woludi la ngandji. (Joa. 3:16) Ɔnɔnyi ɔnɛ tayotatɛ nkahanya akatshi wa leeta l’oya lo Eohwelo Lushi la samalo, ngɔndɔ ka sato 17. Onde tekɔ lo kongɛ l’asolo walomɔlomɔ dia nsambisha efula etena kayotokahanya akatshi wa leeta?
2. Kakɔna kakokaso mbuta etena kashaso onto dikatshi dia leeta?
2 Kɛnɛ kakokaso mbuta: Ayonga dimɛna sho nsala mbɔtwɛlɔ ka lo tshena pe. Sho kokaka mbuta ɔnɛ: “Akemwe. Sho nangaka mbisha nkumbo kayɛ dikatshi nɛ dia leeta diendana la dikambo dimɔtshi di’ohomba efula dia l’ɔnɔnyi diayosalema l’andja w’otondo lo ngɔndɔ ka nɛi 5. Sawo di’oma lo Bible diahawalɔmbɛ onto dia mfuta falanga dia dihokamɛ diayoshama dia nembetshiya woho wakokaso nkondja wahɔ oma lo nyɔi ka Yeso ndo kɛnɛ kasalande kakianɛ. Dikatshi dia leeta nɛ mɛnyaka dihole ndo wonya wayosalema losanganya lɔsɔ l’etshumanelo kaso.” Etena kayotokahanyaka akatshi wa leeta lo wikɛndɛ, tayosha anto ndo periodikɛ naka kokaka.
3. Ngande wakokaso mbelɛ anto efula naka kokaka?
3 Têle anto efula naka kokaka: Oyango aso ele wa mbelɛ anto efula naka kokaka. Têle ambeki aso wa Bible, anto watshɔso dia tembola, ewotɔ aso, asekaso wa l’olimu, asekaso wa la kalasa, asukanyi aso ndo anto akina weyaso. Dikumanyi dia l’etshumanelo kanyu wayɔsa tɛdikɔ tendana la woho wa nkindjakindja ɛtshi kanyu ka nkɛtɛ. Okahanyelo aso w’akatshi wa leeta wasalema ɔnɔnyi l’ɔnɔnyi dia mbelɛ anto oya lo Eohwelo mongaka l’etombelo w’ɛlɔlɔ. Ɔnɔnyi wetshi, etena kakaye womoto ɔmɔtshi lo dihole dia losanganya, ɔnangɛso lashana ahole akalange mbokimanyia dia nde mbishola opandjudi wakawelɛ. Koko, womoto ɔsɔ akate ɔnɛ nde heye ndoko onto nɛ dia nde akalongodi dikatshi dia leeta sɔ oma le onto ɔmɔtshi lakatasambishaka lo luudu la luudu la pindju k’efula ka lushi lakɔ.
4. Ɛkɔkɔ akɔna wahomba totshutshuya dia sho nkahanya akatshi wa leeta l’ohetoheto tshɛ?
4 Ondo onto ɔmɔtshi ayoya lo Eohwelo nɛ dia wɛ akawosha dikatshi dia leeta. Oyadi nde ndja kana bu, welo wa l’otema ɔtɔi wayoyodja wayonga tshondo y’esambishelo. Akatshi wa leeta wayotokahanya wayewoya ɔnɛ Yeso ekɔ kakianɛ Nkumekanga ka wolo. Ohetoheto wayonga la so l’esambishelo wayɛnya anto tshɛ, mbuta ate anto wa l’ɛtshi kaso ka nkɛtɛ, asekaso apandjudi ndo djekoleko Jehowa, ɔnɛ sho ngɛnangɛnaka efula woshasha wa tshungo.—Kol. 3:15.