Woho wakokaso nkamba la biukubuku Waa na wasala lolango laki Jehowa ɛlɔ kɛnɛ?
Biukubuku y’oyoyo yakatondjama l’oyango wa tokimanyiya dia sho nɔmbɔla ambeki wa Bible oya l’okongamelo
1. L’oyango akɔna wakatondjama biukubuku Lolango laki Jehowa?
1 Onde wɛ ambotatɛka nkamba la biukubuku y’oyoyo yele l’ɔtɛ a dui ɔnɛ: Waa na wasala lolango laki Jehowa ɛlɔ kɛnɛ? Yɔ yekɔ l’oyango wa: 1) nkimanyiya ambeki wa Bible dia vɔ ndjaekesanyiya l’Ɛmɛnyi wa Jehowa, 2) mbakimanyiya dia vɔ mbeya awui wendana l’elimu aso, ndo 3) mbaɛnya woho watakɛndakɛnda okongamelo aso. Biukubuku Lolango laki Jehowa yekɔ la wekelo ɔtɔi lo lɛkɛ la lɛkɛ ndo sho kokaka mbeka l’onto lo minitɛ tshanu kana dikumi tsho lo wekelo la wekelo.
2. Lembetshiya woho wakalɔngɔsɔma biukubuku nyɛ ndo awui amɔtshi wele lɔkɔ.
2 Woho wakayalɔngɔswama: Biukubuku yakɔ kahanyema lo tenyi sato ndo etenyi l’etenyi kekɔ lo ntɛkɛta akambo wotshikitanyi wendana l’okongamelo wa Jehowa oko wakataditshi la diko. Ɔtɛ a dui tshɛ wa lo wekelo 28 wele lo biukubuku yakɔ, wakafundama oko dimbola ndo ɛtɛ wahɔnyi wakafundama l’alɛta w’edima mbishaka ekadimwelo lo dimbola diakɔ. Foto y’oma lo wedja ndekana 50 yekɔ lɔkɔ dia mɛnya woho wakambema olimu wa l’andja w’otondo w’Ɛmɛnyi wa Jehowa. Wekelo efula wekɔ la tokombokombo tele l’ɔtɛ a dui ɔnɛ: “Dia mbeya awui efula,” tele l’alako wakokaso nkamba la wɔ dia nkeketsha ambeki aso wa Bible dia vɔ ndjela.
3. Ngande wakokaso nkamba la biukubuku Lolango laki Jehowa?
3 Woho wakokaso nkamba la yɔ: Ntondotondo, tokutole yaambalo y’ompokami aso lo ɔtɛ a dui wa wekelo wele tshondo ya dimbola. Oma laasɔ, ko sho mbadia kaamɛ la nde awui wele lo wekelo akɔ, lo ntɔtɔmiya ɛtɛ wahɔnyi wele l’alɛta wedima. L’ekomelo, ko sho mbooka ambola w’ovuswelo wele l’ɛse ka dikatshi. Sho kokaka mbadia wekelo w’otondo ko ndjoka dimbola kana mbadia etenyi ko sho nkɛtshanya yema ko mbadia etenyi kekina. Ekɔ ohomba sho nkana yimba dimɛna etena kasɔnaso avɛsa wele l’odingɔ wakokaso mbadia. Tatohɛke nkamba l’esato ndo akambo wele lo tokombo “Dia mbeya awui efula.” Mbala efula, sho pombaka tekaka l’onto wekelo wele lɔkɔ l’ɔnɔngɔ. Koko, onto kokaka ntamba wekelo ɛmɔtshi ko mbeka l’ompokami ande wekelo ɔmɔtshi w’ɔngɛnyangɛnya. Ɛnyɛlɔ, naka losanganya la woke lɔmɔtshi langa salema, sho koka ntamba ko mbeka l’onto wekelo wa 11.
4. Lande na keso l’ɔngɛnɔngɛnɔ dia nkondja ehomɔ k’oyoyo kɛsɔ?
4 Etena kekaso l’onto ɔmɔtshi Bible, tekɔ lo mbokimanyiya dia nde monga la diɔtɔnganelo la Shɛso lele l’olongo. Koko, sho pombaka nto mbeetsha akambo wendana la okongamelo wa Jehowa. (Tuk. 6:20) Ande ɔngɛnɔngɛnɔ wele la so dia nkondja ehomɔ k’oyoyo katokimanyiya dia nkotsha dikambo sɔ lee!