Taakimanyiya dia vɔ ‘nshikimala lo mbetawɔ’

Tekɔ l’ɔngɛnɔngɛnɔ dia mɛna woho watshɔkɔla Jehowa nsanganya ya weke yasalaso, nɛ dia lɔkɔ anto ndekana nunu nkama hiende la akumi atanu batizamaka ɔnɔnyi tshɛ. (Euh. 28:2) Mbala efula naka opandjudi ɔmɔtshi ambokimanyiya ombeki ande wa Bible polo lo batisimu, opandjudi akɔ ndjotshikaka mbeetsha ndo ndjotatɛka ndjasha dia nkimanyiya anto akina. Ndo ombeki lo wedi ande mbeyaka ndjotshika wekelo l’oyango wa ndeka ndjasha l’olimu w’esambishelo. Koko, ekɔ ohomba efula dia ambeki wa Bible monga la ehikamelo k’ɔlɔlɔ lo akambo wa mɛtɛ. Vɔ pombaka mbika “edio” le Kristo ndo ‘shikimala lo mbetawɔ.’ (Kɔl. 2:6, 7; 2 Tim. 3:12) Ɔnkɔnɛ, l’ɔkɔngɔ w’ombeki wa Bible batizama, nde pombaka ntetemala wekelo ande wa Bible polo ndo lam’ayondoshidiya abuku ahende, dibuku Bible etshatɔ ndo Ngandji ka Nzambi.—Enda Olimu aso wa Diolelo wa Ngɔndɔ ka nɛi 2011, lɛkɛ 2.