Bɛnyɛlɔ dia mbɔtwɛlɔ (Numɛlɔ kele bu l’Ɔtɛtɛla ko nyu menda lo Falase)

Lende akokaso ntana ekadimwelo lo ambola w’ohomba wa lo lɔsɛnɔ?

Sha ompokami ayɛ traktɛ lo yoho yakokande mɛna ɔtɛ a dui atɔ ndo tɛnde ɔnɛ: “Akemwe. Tekɔ lo takahanya traktɛ kɛnɛ kakahanyema l’andja w’otondo kele la losango l’ohomba. Kayɛ tɔ kɛnɛ.”

Naka wɛ ambotshika traktɛ l’ahole wele anto bu lawakawɔ, kitshatɔ lo dihole diahakoke ambetshetshi mɛna ndo tokimɔnyamɔnyake.

Naka ompokami ayɛ ambɛnya nsaki kana kombolaka dia nyu nsawola, wɛ koka mbombola kanyi yande lo kɛnɛ kendana la dimbola diele laadiko diele l’ekadimwelo efula. Fola traktɛ ndo ɛnyande kɛnɛ kata Osambu 119:144, 160. Tɛnde dia traktɛ kɛnɛ kekɔ l’akambo efula wendana la sitɛ kaso k’Ɛtɛrnɛtɛ wakoka mbokimanyiya dia nde ntana ekadimwelo w’eshika lo Bible. Ondo wɛ koka mbɛnya vidɛo ya mondo yele l’ɔtɛ a dui ɔnɛ: Lande na mbeka Bible? Ntondo ka wɛ mbotshika, ɛnyande ambola asato wele lo lɛkɛ l’ekomelo la traktɛ ndo mbolande nɛ dialeka mendana la nde. Tɛnde dia wɛ ayokalola dia ndjowɛnya woho wakokande ntana ekadimwelo lo dimbola diakɔ lo nkamba la jw.org. Etena kayoyokalola dia ndjowenda, kanyɔkɛtshanya ekadimwelo wa dimbola diakɔ lo mbɔtɔ lam’ofundjiwɔ WETSHELO WA LO BIBLE, oma laasɔ EKADIMWELO LO AMBOLA W’OMA LO BIBLE.

Naka wɛ ekɔ lo takahe akatshi wa leeta l’oya lo Losanganya la rɛjɔ, sha ompokami ayɛ dikatshi dia leeta l’etena kakɔ kaamɛ kawoshayɛ traktɛ ndo kotsha ɔnɛ: “Laadiko dia laasɔ, tambokosha dikatshi dia leeta nɛ dia wɛ ndjɔtɔ ofele lo losanganya lɔmɔtshi la woke layanga salema.”

Tshoto y’Etangelo Ngɔndɔ k’enanɛi 1

Lo waa wikɛndɛ, naka kokaka, wɛ koka mbuta nganɛ dia mbisha onto Tshoto y’Etangelo: “Takalangi kosha ndo periodikɛ yaso yeke katomba nyɛ. Numɛlɔ kɛnɛ ka Tshoto y’Etangelo kadimolaka dimbola nɛ: Onde Nzambi ndjashaka le yɛ?”

Réveillez-vous ! Ngɔndɔ k’enanɛi

Lo waa wikɛndɛ, naka kokaka, wɛ koka mbuta nganɛ dia mbisha onto Réveillez-vous ! “Takalangi kosha ndo periodikɛ yaso yeke katomba nyɛ. Numɛlɔ ka Réveillez-vous ! kɛnɛ kadimolaka dimbola nɛ: Kakɔna kakoka anto nsala dia mbidja wɔladi?”