Aya ɛnɔnyi lokama wambewoyama awui wendana la Diolelo
1. Kakɔna kakakeketshama ekambi wa Jehowa dia nsala?
1 “He nyende! Nkumekanga ambahema l’okudi! Nyu mbele wanɛ watakokola lokumu lande. Laasɔ, nyewoya, nyewoya, nyewoya awui wa Nkumekanga la diolelo diande.” Ɛtɛkɛta w’ekeketshelo ɛsɔ wakate ɔnangɛso Rutherford ambeta suke la ɛnɔnyi lokama, akakeketsha ekambi wa Jehowa dia dianganya losango la Diolelo l’ahole wa ntale. Kɛsɔ mbakasalema. L’ɛnyɛlɔ k’Akristo wa lo ntambe ka ntondo, sho lawɔ tekɔ la nsambisha lokumu l’ɔlɔlɔ la Diolelo “lo etongelo tshɛ kele l’ɛse olongo.” (Kɔl. 1:23) Kakɔna kakatasale dia mbewoya awui wendana la Diolelo diaki Nzambi lo ɛnɔnyi lokama wetshi? Ngande wakokaso ntetemala liewoya oko watatasukana otsha lo ɔnɔnyi wa lokama wa eotwelo ka Diolelo?
2. Ngande wasukɛ ekanda aso awui wendana la Diolelo diaki Nzambi?
2 Tokaloya washo l’ɔkɔngɔ: Aya ɛnɔnyi akumi wele ekanda aso wekɔ lo nsukɛ awui wendana la Diolelo diaki Nzambi. Ntatɛ oma lo 1939 periodikɛ kaso kaleka tondjama kakonge l’ɔtɛ a dui wata ɔnɛ: Tshoto y’Etangelo mbewoyaka Diolelo diaki Jehowa. Periodikɛ kɛsɔ, tɛkɛtaka mbala la mbala awui wendana la Diolelo ndo kɛnɛ kayondosala. Réveillez-vous ! tɔtɔmiyaka nto dia Diolelo diaki Nzambi mbele tshɔi y’elongamelo le anto. Sunganaka mɛtɛ dia periodikɛ hiende shɔ monga periodikɛ yamboleka kadimɔma ndo kahanyɛma l’andja w’otondo!—Ɛny. 14:6.
3. Naa toho tɔmɔtshi takakambe la so dia mbewoya awui wendana la Diolelo?
3 Ekambi wa Jehowa wakakambe la toho totshikitanyi dia mbewoya awui wendana la Diolelo. Lo nshi ya ntondo, takakambaka la mituka waki la wɛndjɔ, stasiɔ y’aradiyo ndo la fɔnɔ. Toho tɔsɔ tshɛ takatokimanyiya dia nsambisha olui w’anto lokumu l’ɔlɔlɔ l’etena kaamɛ etena kaki apandjudi wa Diolelo weke yema tshitshɛ. (Osam. 19:4) Lo ɛnɔnyi weke kambeta ɛnɛ, tambotondja awui efula lo sitɛ kaso ka jw.org. ndo kɛsɔ kambotokimanyiya dia nsambisha miliyɔ y’anto awui wendana la Diolelo, mbidja ndo wanɛ wadjasɛ lo wedja wakashimbama olimu aso.
4. Naa tɛdikɔ ta laande takɔsama?
4 Ekambi wa Jehowa wakɔshi tɛdikɔ ta laande dia dianganya losango la Diolelo. Ɛnyɛlɔ, l’atei a tei wa ɛnɔnyi 1990, takasale la wolo dia mpamia olimu aso w’esambishelo ka luudu la luudu lo nsambisha l’ahole wa lo sɛkɛ wele oko, lo waa parkɛ, lo waa parkingɛ, ndo l’ahole wasalawɔ ekanda. Atete edja, takakongɛ yoho mɔtshi y’esambishelo ka laande ka lo sɛkɛ l’esomba wa weke wa l’andja w’otondo. Ndo nto, tshumanelo efula wekɔ lo mbisha lonya l’esambishelo ka lo sɛkɛ lo bɛtshi diawɔ dia nkɛtɛ lo kitshaka ekanda laa mɛsa kana laadiko wa diangɔ dikina l’ahole weteta anto efula. Kanga mbediɔ ngasɔ, esambishelo ka lo luudu la luudu aakatetemala monga yoho y’esambishelo yaleka nkamba la so.—Ets. 20:20.
5. Waaso akɔna wayokodja efula ka l’atei aso l’ɔnɔnyi w’olimu w’oyoyo?
5 Tende yema la ntondo: L’ɔnɔnyi w’olimu w’oyoyo wayotatɛ Ngɔndɔ ka divwa, anto efula wayokamba oko ambatshi mboka wa pondjo. Shi wɛ lawɔ koka monga l’atei w’anto asɔ? Ko naka wɛ bu l’akoka, shi kete wɛ koka nkamba oko ombatshi mboka wa tshanda mbala la mbala? Oyadi wɛ ekɔ l’akoka wa nkamba oko ombatshi mboka kana bu, Jehowa mɛtɛ ayɔtshɔkɔla welo wadjayɛ dia mbisha lonya dia mbewoya awui wendana la Diolelo lo yɛdikɔ y’efula.—Mal. 3:10.
6. Lande na kayonga Ngɔndɔ ka dikumi 2014 ngɔndɔ ka laande?
6 Eotwelo ka Diolelo ayokotsha ɛnɔnyi lokama lo Ngɔndɔ ka dikumi ka l’ɔnɔnyi 2014. Diakɔ diele, Tshoto y’Etangelo ya ngɔndɔ kɛsɔ ayoka epole osɛkɛ lo awui wendana la Diolelo diaki Nzambi. Lande na kahayasale la wolo dia monga la periodikɛ shɔ efula naka kokaka? Oko wendɛso nshi yayaye, sho tshɛ koka ntetemala ‘mbewoya lokumu l’ɔlɔlɔ lendanala Diolelo diaki Nzambi’ le anto tshɛ wetawɔ tohokamɛ.—Ets. 8:12.