Tokoya ɛnyɛlɔ k’amvutshi—Nahuma
1. Wetshelo akɔna wakondjaso oma lo dibuku dia Nahuma?
1 Elanyelo ka Niniva k’edjedja mɛnyaka dia paka oko wakadite Nahuma, Jehowa sɔmbɔyaka atunyi Ande ndo kaanga otunyi ande woleki woke hakoke ndɔshana la nde. (Nah. 1:2, 6) Ɔsɛdingwelo wa lotshimola wa prɔfɛsiya ka Nahuma toshaka wetshelo wendana l’olimu aso w’esambishelo.
2. Akokaso nsala dia losango laso monga losango l’esambelo?
2 Kamba l’ɛtɛkɛta w’esambelo ndo washa elongamelo: Oma l’etatelo, dibuku dia Nahuma mɛnamaka oko dibuku diakewoya paka dombwelo diendana la Niniva, kapitale k’Asuriya w’edjedja lɛnɛ akalole akanga wa lotamanya. (Nah. 1:1; 3:7) Koko le ekambi wa Jehowa, losango l’elombwelo lɔsɔ laki losango la dimɛna. Nahuma lele lokombo lande nembetshiyaka “usambi,” akashikikɛ asekande ase Juda dia keema edja atunyi awɔ wayanga nanyema. Nahuma akayoshikikɛka nto dia Jehowa ekɔ “eshamelu lu lushi la pa.” (Nah. 1:7) Etena kasambishaso, sho la wɔ mbewoyaka lokumu l’ɔlɔlɔ ndo keketshaka anto akina dia nyanga eshamelo le Jehowa.—Nah. 1:15.
3. Ngande wakokaso mbokoya Nahuma lo nkamba la bɛnyɛlɔ ndo la wɛɛla?
3 Kamba la bɛnyɛlɔ ndo wɛɛla: Jehowa akɛnya Nahuma lo wolo wa nyuma dia nde mbɛdika elanyelo ka Niniva la elanyelo k’osoma wa l’Edjibito wa Tebese (No-Amôn) wakalanyema ntondo oma le ase Asuriya ato. (Nah. 3:8-10) Etena kewoyaso anto akambo wendana l’ekomelo ka dikongɛ nɛ di’akambo dia kɔlɔ, sho koka mbika epole ɔsɛkɛ lo prɔfɛsiya ya lo Bible yɛnya dia Jehowa kotshaka ɔtɛkɛta ande tshɛ lo tshɛ. Ɛnyɛlɔ, etena kakaye ase Babilɔna ndo ase Mediya dia ndjɔlɔsha osomba wa Niniva lo 632 N.T.D., mvula ngembe kakalɔ, elola kakɔtɔ l’ɔkɛdi wa Tigrɛ, ko kakakɔsha bɛtshi dimɔtshi dia mpele diele ndooko lakakokaka mbɔtɔ. Oma laasɔ, osomba wa Niniva wakalɛndjama esadi eto oko wakadite Jehowa.—Nah. 1:8; 2:6.
4. Ngande wakokaso nkamba l’ɛtɛkɛta wokɛma hwe ndo washihodia anto l’esambishelo?
4 Kamba l’ɛtɛkɛta wokɛma hwe ndo washihodia anto: Efundelo wa Nahuma wakafundama oko onto lakɔndɔla akambo ndo lasala wɛdikelo. Awui tshɛ wakandafunde mbokɛmaka hwe. (Nah. 1:14; 3:1) Woho akɔ waamɛ mbele, sho kombolaka nkamba l’ɛtɛkɛta wa wɛɔdu wokɛma hwe. (1 Kɔr. 14:9) Mbala ka ntondo kasawolayɛ l’onto, tɛnde hwe lande na koyeyɛ. Etena kekayɛ l’anto Bible, kimanyiyawɔ dia monga la mbetawɔ le Jehowa, lo Ɔtɛkɛta ande ndo dia vɔ nshihodia woho wendanawɔ l’awui akɔ.—Rɔmɔ 10:14.
5. Eshikikelo kakɔna katanaso lo prɔfɛsiya ka Nahuma?
5 Mbetawɔ kaki la Nahuma k’ɔnɛ ɔtɛkɛta wa Jehowa wayokotshama ndooko onyake, mɛnamaka hwe lo dibuku dia lo Bible diɔlame lokombo lande. Lam’ele dikongɛ diaki Satana diaya suke la ndanyema, sho kondjaka esambelo lo daka diaki Nzambi nɛ: “Sui hadienama etena ka hendi.”—Nah. 1:9.