Kokɛ diwala diayɛ

Jehowa mbɔsaka dɔkɔlɔkɔ dia diwala la nɛmɔ di’efula. Nde mbutaka dia pami nde la wadɛnde pombaka mamatana kaamɛ. (Mat 19:5, 6) Tekɔ la bɛnyɛlɔ efula di’awala w’amɛna wasalema l’atei w’ekambi wa Nzambi. Koko, ndooko diwala diele kokele, ekakatanu tombaka. Hatohombe ndjela kanyi y’anto wɔsa dia okakitwanelo ndo odiakelo wa diwala mbele yoho yoleki dimɛna ya nkandola ekakatanu lo diwala. Ngande wakoka atshukanyi w’Akristo nkokɛ awala awɔ?

Tɔsɛdingole wanya atanu w’ohomba.

1. Kokɛ otema ayɛ lo ntona awui wele oko, nkɛnya l’onto lele bu pami kana womoto oko sho lo demba ndo mbewɔ tɔkɛnyɔ tele l’awui wa mindo wa dieyanelo, awui wakonya paka lo ntɛwɔla dimama dia lo diwala.​—Mat 5:28; 2Pe 2:14.

2. Keketsha lɔngɛnyi lasayɛ la Nzambi ndo hamia nsaki kayɛ ka mbɔngɛnyangɛnya lo diwala diayɛ.​—Os 97:10.

3. Tetemala ndɔta lonto l’oyoyo, ndo salɛka olonganyi ayɛ kaanga towuiwui ta totshitshɛ t’amɛna takoka mbɔngɛnyangɛnya.​—Kɔl 3:8-10, 12-14.

4. Tetemala monga la dilɛmiɛlɔ, nyosawolake dimɛna lam’asanyu.​—Kɔl 4:6.

5. Sala dia olonganyi ayɛ ndjaoka dia nde ekɔ lo nangema ndo ɛnyande ngandji.​—1Kɔ 7:3, 4; 10:24.

Etena kɔsa Akristo diwala la nɛmɔ, vɔ nɛmiyaka Otungi wa diwala, Jehowa.

NYENDE VIDƐO YELE L’ƆTƐ A DUI ƆNƐ: SHO POMBAKA ‘NDAWƆ LA EKIKELO TSHƐ’​—TOKITANYIYA ƐLƐMBƐ WENDANA LA KƐNYƆ NDO OMA LAASƆ, NYOKADIMOLE LO AMBOLA WAYELA ANƐ:

• 

  Kaanga mbakoka diwala ntatɛ dimɛna, ekakatanu akɔna wakoka ndjotomba?

• 

  Ngande wakoka atɔndɔ w’oma lo Bible nkimanyiya wanɛ wayaoka dia wekɔ lo diwala diele bu l’ɔngɛnɔngɛnɔ?

• 

  Ɛlɛmbɛ akɔna wendana la diwala wakadje Jehowa?

• Dia ntondoya lo diwala, kakɔna kahomba elonganyi nsala?