LƆSƐNƆ L’OKRISTO
Yanga kanyi yaki Nzambi
Sho nangaka ngɛnyangɛnya Jehowa lo kɛnɛ tshɛ kasalaso. (Tok 27:11) Dia nsala dui sɔ, sho pombaka mbɔsa tɛdikɔ takɛnɛmɔla kanyi yande, oyadi etena kele ndooko ɔlɛmbɛ shikaa watɔlɔmbɔla. Kakɔna kakoka tokimanyiya dia nsala dui sɔ?
Ekaka Bible mbala la mbala. Mbala tshɛ kadiɛso Bible, ekɔ oko tekɔ lo mbetsha wenya kaamɛ la Jehowa. Sho koka mbeka woho wakanyiya Jehowa lo menda woho wakandasalɛ ekambi ande akambo ndo lo nsɛdingola bɛnyɛlɔ dia wanɛ wakasalaka ɔlɔlɔ kana kɔlɔ lo washo ande. Etena kalangaso mbɔsa yɛdikɔ, nyuma k’ekila koka tokimanyiya dia mbohɔ wetshelo w’ohomba ndo atɔndɔ wakateke oma l’Ɔtɛkɛta wa Nzambi.—Jni 14:26.
Sala eyangelo. Etena kalangayɛ mbɔsa yɛdikɔ, yambola ɔnɛ: ‘Avɛsa akɔna kana ɛkɔndɔ akɔna wa lo Bible wakoka kimanyiyami dia nshihodia woho wayaoka Jehowa lo dikambo sɔ?’ Lɔmba Jehowa dia kokimanyiya ndo nkamba la dihomɔ di’eyangelo diatanema l’ɔtɛkɛta ayɛ dia kokimanyiya dia ntana ndo nkamba l’atɔndɔ wa lo Bible wɔtɔnɛ la dui diele la yɛ.—Os 25:4.
NYENDE VIDƐO YELE L’ƆTƐ A DUI ƆNƐ: SHO POMBAKA “NDAWƆ L’EKIKELO TSHƐ”—KATƆLƐKE DIANGƆ DI’AMƐNA NDO OMA LAASƆ, NYOKADIMOLE LO AMBOLA WAYELA ANƐ:
Tɔsɛngiya takɔna takahomana la kadiyɛso k’osekaseka kɛnyiso lo vidɛo?
Ngande wakokayɛ nkamba la dihomɔ di’eyangelo dia kokimanyiya dia ndɔshana la tɔsɛngiya takɔ taamɛ?
Ngande wakondjaso wahɔ lo mbɔsa etena ka nsala eyangelo ndo wekelo w’onto ndamɛ wakoka tokimanyiya dia mbɔsa tɛdikɔ t’amɛna?—Hɛb 5:13, 14