LƆSƐNƆ L’OKRISTO

Kimanyiya anto wele bu atɛmɔdi dia vɔ mbeya Otungi awɔ

Onde wɛ mengengaka dia nsambisha anto wele bu atɛmɔdi lo mfɔnya dia vɔ hawotohokamɛ? Naka ngasɔ mbediɔ, kete eya dia anto efula wele bu atɛmɔdi, mbidja ndo wanɛ wahetawɔ dia Nzambi ekɔ, wakayonga Ɛmɛnyi wa Jehowa. Mbala efula kɛnɛ kaki la wɔ ohomba ele, yema y’ekimanyielo dia nsɛdingola tolembetelo tɛnya di’ɔnɛ Nzambi ekɔ.—Rɔm 1:20; 10:14.

NYENDE VIDƐO YELE L’ƆTƐ A DUI ƆNƐ: NYOHƆ DIA, ANTO WELE BU LA KƆLAMELO KOKA MONGA LA MBETAWƆ!—ANTO WELE BU ATƐMƆDI NDO OMA LAASƆ, NYOKADIMOLE LO DIMBOLA DIAYELA NƐ:

Ngande wakokimanyiya kɛnɛ kakahomana la Tommaso dia mɛna akambo la sso di’ɔlɔlɔ etena kasambishayɛ anto wele bu atɛmɔdi?

Okadimwelo ayɛ

Woho wa nsala dikambo sɔ

Naka onto ɔmɔtshi ambota dia nde hetawɔ dia Nzambi ekɔ, onga ɔlɔlɔ, onga l’ɔkɔmi ndo yasha l’otema ɔtɔi lo tokanyi ndo lo woho wayaokande lo dikambo sɔ. (2Ti 2:24) Nyɔkɛtshanya asawo wakoka nkotola yambalo yande. Onde nde mbetawɔka dia nyu nkɛtshanya tolembetelo tambokonya anto efula dia monga la mbetawɔ le otungi? Naka ngasɔ, kamba l’ekanda ndo tovidɛo takatondjama l’oyango ɔsɔ. Biukubuku La vie a-t-elle été créée ? ndo Cinq questions à se poser sur l’origine de la vie takakotshama lo dihomɔ diaso dia mbetsha dia titanaka aha l’okakatanu.

L’etatelo, wɛ koka mengenga dia nsawola l’onto lahetawɔ dia Nzambi ekɔ. Lande na kahayalɔmbɛ opandjudi wa manamana dia nde kokimanyiya? Ohɔ nto dia Jehowa koka kokimanyiya dia minanda etema w’anto wele suke oyadi kaanga oma l’etatelo vɔ kombetawɔka dia Nzambi ekɔ.—Ets 13:48.