Lande na kahakadimola Nzambi alɔmbɛlɔ tshɛ?

Shɛso ka l’olongo, Jehowa Nzambi, nangaka ndo ngɛnangɛnaka alɔmbɛlɔ w’ɔlɔmbaso l’otema ɔtɔi. Koko ekɔ awui amɔtshi w’oshimba diaha nde nkadimola lo alɔmbɛlɔ aso. Naa awui akɔ ndo kakɔna kakokaso ntetemala nkimɛ lo yimba etena k’ɔlɔmbaso? Atɔndɔ amɔtshi wa lo Bible vɔ anɛ.

Olui ɔmɔtshi w’anto wele l’ɔtɛmwɛlɔ, waadia dɔmbɛlɔ oma lo dibuku di’alɔmbɛlɔ.

“Etena kalɔmbanyu, tanyokalolɛke akambo akɔ waamɛ.”—Mateo 6:7.

Jehowa halange sho kalolɛka alɔmbɛlɔ wambotokimɛka l’ɔtɛ kana mbowawadia oma lo dibuku dimɔtshi di’alɔmbɛlɔ. Koko, nde nangaka sho mbotɛ awui w’oma k’ɛse otema. Ohokanyiya lonyangu layonga la yɛ naka ɔngɛnyi ayɛ kotɛka paka awui akɔ waamɛ lushi tshɛ. Angɛnyi w’amɛna ndjihwanɛka etema ndo mbitanɛka akambo hwe hwe. Etena kalɔmbaso l’ɛtɛkɛta aso hita, dui sɔ mɛnyaka dia sho mbɔsaka Shɛso ka l’olongo oko ɔngɛnyi aso.

Pami kɛmɔtshi enda ladiko etena kaatande tikɛ dimɔtshi dia lɔtɛri.

“Etena kalɔmbanyu, hanyolongola, nɛ dia nyu nɔmbaka l’eyango wa kɔlɔ.”—Jakɔba 4:3.

Hatohombe nongamɛ dia Nzambi ayokadimola lo alɔmbɛlɔ aso, naka sho mbɔlɔmbaka awui wende halange sho mbasala kana monga lawɔ. Ɛnyɛlɔ, onde Nzambi ayokoka mbisha onto lakɛnya nkɛnyɔ ya falanga naka nde mbɔlɔmba dia nde monga la shansɛ etena keyande dia Nzambi tɔhɛmɔlaka diaha sho monga la lokaki ndo ndjaɛkɛ lo shansɛ, mbuta ate wolo ɔmɔtshi wahɛnama wasala di’onto monga la shansɛ? (Isaya 65:11; Luka 12:15) Hatohombe nongamɛ mɛtɛ dia Nzambi koka nkadimola lo alɔmbɛlɔ wa ngasɔ! Dia Nzambi tokadimola lo alɔmbɛlɔ etena k’ɔlɔmbaso, sho pombaka ndjashikikɛ dia kɛnɛ kɔlɔmbaso mbɔtɔnɛka la kɛnɛ katotɛnde lo Bible.

Ondjashi nzambi ɔmɔtshi alɔmbɛ olui ɔmɔtshi w’asɔlayi.

“Ɔnɛ latona mpokamɛ ɛlɛmbɛ kaanga dɔmbɛlɔ diande diekɔ wɔnɔnyi.”—Tokedi 28:9.

Lo nshi yakafundamaka Bible, Nzambi kokadimolaka alɔmbɛlɔ w’anto wakatonaka ɛlɛmbɛ ande. (Isaya 1:15, 16) Nzambi atatshikitana. (Malaki 3:6) Naka sho nangaka dia Nzambi nkadimola lo alɔmbɛlɔ aso, kete sho pombaka nsala kɛnɛ tshɛ kakokaso nsala dia nsɛna lo ndjela ɛlɛmbɛ ande. Ko, kayotota naka takasale awui wa kɔlɔ lo nshi y’edjedja? Onde kɛsɔ mɛnyaka dia Nzambi hatohokamɛki pondjo? Ndooko! Nzambi ayotodimanyiya la ngandji tshɛ naka sho ntshika awui wakatasalaka lo nshi ya ntondo ndo nsala kɛnɛ tshɛ kakokaso nsala dia mbɔngɛnyangɛnya.—Etsha 3:19.

“Ndo nto, onto lele bu la mbetawɔ hakoke ngɛnyangɛnya Nzambi, nɛ dia ɔnɛ layasukanya la Nzambi pombaka mbetawɔ dia nde ekɔ, ndo nde ndjalaka ofutshi wa wanɛ wooyanga l’otema ɔtɔi.”—Hɛbɛru 11:6.

Hatɔlɔmbɛ tsho dia ndjaoka dimɛna etena keso l’ekiyanu ndo l’ɔkɛyi. Dɔmbɛlɔ ekɔ djembetelo ya mɛnya mbetawɔ kaso ndo ekɔ etenyi kɛmɔtshi k’ɔtɛmwɛlɔ aso otsha le Nzambi. Ombeki Jakɔba mbutaka ate: Naka “[ha]totetemala nɔmba la mbetawɔ,” kete “ha[to]hombe nongamɛ dia nongola kaanga ɛngɔ oma le Jehowa.” (Jakɔba 1:6, 7) Dia nkeketsha mbetawɔ kaso otsha le Nzambi, sho pombaka mbɔsa etena ndo mbidja welo dia mbeeya oma lo tshimbo ya wekelo wa Bible. Naka sho nsala ngasɔ, kete dui sɔ diayotokimanyiya dia mbeya lolango lande ndo mbɔlɔmba l’eshikikelo tshɛ.