Onde wɛ aakohɔ?
Onde wɛ akadia la yambalo tshɛ numɛlɔ ya Tshoto y’Etangelo y’ɔnɔnyi ɔnɛ? Naka ngasɔ, kete enda kana wɛ koka nkadimola ambola wayela anɛ:
Jakɔba 5:11 toshaka eshikikelo kakɔna lo mbuta dia Jehowa ekɔ la “ngandji k’efula” ndo la “kɛtshi”?
Sho mbeyaka di’oma lo kɛtshi kande, Jehowa todimanyiyaka munga yaso. Jakɔba 5:11 toshikikɛka nto dia la ngandji tshɛ nde nangaka tokimanyiya. Ekɔ ɔlɔlɔ sho mbookoya.—w21.01, lk. 21.
Lande na kakakongɛ Jehowa lowandji?
Nde akasale dui sɔ oma lo ngandji kokande anto. Lowandji kimanyiyaka dia nkumbo kande ka kɔlamelo nkɛndakɛnda lo wɔladi, aha l’ofukutanu. Ose nkumbo tshɛ lakɛndakɛnda lo ndjela yɛdikɔ shɔ mbeyaka onto akɔna ele l’ɔkɛndɛ wa mbɔsa tɛdikɔ t’ekomelo ndo ɔnɛ lahomba nsala dia tɛdikɔ takɔ kotshama.—w21.02, lk. 3.
Lande na kahomba Akristo monga la shɛnɔdi y’efula lo kɛnɛ kendana la okambelo wa la aplikasiɔ watomanɛwɔ mesajɛ?
Naka onto ambɔsa yɛdikɔ ya nkamba la aplikasiɔ ɛsɔ, kete nde pombaka nsɔna weho w’anto wa mbekesanɛ la wɔ. Dui sɔ diekɔ wolo nsala naka tekɔ lo olui ɔmɔtshi wa woke w’anto watomanɛ mesajɛ. (1 Tim. 5:13) Waale ekina ele sho koka ndjosanya awui wele sho bu l’eshikikelo ndo ndjodja awui w’okanda lo diɔtɔnganelo diasaso l’anangɛso l’akadiyɛso.—w21.03, lk. 31.
L’ɔtɛ w’ɛkɔkɔ akɔna ɛmɔtshi waketawɔ Nzambi dia Yeso nsowa ndo mvɔ?
Ntondotondo, Yeso akahanema l’otamba ondo dia ntshungola ase Juda oma lo mananu kɛmɔtshi. (Ngal. 3:10, 13) Ɔkɔkɔ wa hende aki dia Jehowa ndowanya Yeso dia ndjokotsha ɔkɛndɛ ande w’Ɔlɔmbɛdi a Laadiko. Ɔkɔkɔ wa sato ele woho wakatshikala Yeso la kɔlamelo polo lo nyɔi akɛnya di’anto koka ntshikala la kɔlamelo kaanga la ntondo k’ehemba wa wolo. (Jɔbɔ 1:9-11)—w21.04, lk. 16-17.
Akokayɛ nsala naka ekɔ wolo ntana anto l’olimu w’esambishelo?
Wɛ koka nsala la wolo dia mbaasambisha lo etena kalekawɔ tanema lawakawɔ. Wɛ koka nto mpemba nsambisha l’ahole wotshikitanyi. Ndo wɛ koka mpemba nkamba la toho totshikitanyi, ɛnyɛlɔ mfunda mikanda.—w21.05, lk. 15-16.
Kakɔna kakalange ɔpɔstɔlɔ Pɔɔlɔ mbuta etena kakandate ate: “Lo tshimbo y’ɛlɛmbɛ dimi lambovɔ”? (Ngal. 2:19)
Ɛlɛmbɛ wa Mɔsɛ wakatondja pɛkato y’anto sɛkɛ ndo wakalɔmbɔla ase Isariyɛlɛ otsha le Kristo. (Ngal. 3:19, 24) Dui sɔ diakakimanyiya Pɔɔlɔ dia monga la mbetawɔ le Kristo. Lo yoho shɔ mbele Pɔɔlɔ “[akavu] lo kɛnɛ kendana la ɛlɛmbɛ”; ndo ɛlɛmbɛ komonga nto laadiko diande.—w21.06, lk. 31.
Ngande watosha Jehowa ɛnyɛlɔ oma lo ekikelo kande?
Jehowa ekɔ lo mbikikɛ woho wɔnywama lokombo lande, woho walɔshama lowandji lande, ɔtɔmbɔkwɛlɔ w’anande amɔtshi, kashi yatetemala Diabolo mbuta, woho wasowa ekambi ande wa ngandji, nyɔi k’angɛnyi ande, woho wasoya anto wa kɔlɔ anto akina, olanelo wa lɔkɛwɔ lele la nkumbo k’anto ndo woho walanya anto nkɛtɛ kakandatonge.—w21.07, lk. 9-12.
Naa ɛnyɛlɔ ka dimɛna kakatotshikɛ Yɔsɛfu lo kɛnɛ kendana la solo dia lotutsha?
Nde akakikɛ awui waha la losembwe wakosalɛ anango. Wakɔsɔngwɛ awui wa kashi ndo nde akadjama lo lokanu l’edja k’ɛnɔnyi efula l’Edjibito.—w21.08, lk. 12.
Naa osutshesutshelo wa didjidji wakatatshi Hangayi 2:6-9, 20-22?
Wedja wekɔ lo ntona esambishelo ka Diolelo, koko anto efula wambokotwama oya l’akambo wa mɛtɛ. Keem’edja wedja wayosutshasutshama mbala k’ekomelo etena kayangawɔ ndanyema.—w21.09, lk. 15-19.
Lande na kahatahombe mpekɔ dia ntetemala l’olimu aso w’esambishelo?
Jehowa mɛnaka welo wadjaso ndo dui sɔ mbɔngɛnyangɛnyaka. Naka hatohekwe, kete tayokondja lɔsɛnɔ la pondjo.—w21.10, lk. 25-26.
Ngande wakoka Akambo w’ase Lɛwi tshapita 19 tokimanyiya dia nkamba la dako diata ɔnɛ: “Nyoyale ekila lo dionga dianyu tshɛ”? (1 Pe. 1:15)
Ondo divɛsa nɛ shilaka ɛtɛkɛta w’oma lo Akambo w’ase Lɛwi 19:2. Tshapita 19 toshaka bɛnyɛlɔ efula diɛnya woho wakokaso nkamba la 1 Petero 1:15 lo lɔsɛnɔ laso la lushi la lushi.—w21.12, lk. 3-4.