WOHO WA MBIDJA LOHETSHO OTSHUMBA

3 | Nya lohetsho oma lo yimba yayɛ

Bible mbutaka ɔnɛ:

“Nyohilwame lo nɔngɔsɔla timba tanyu dia nyuamɛ mbeya dimɛna lolango la Nzambi l’ɔlɔlɔ, letawɔma ndo la kokele.”—RƆMƆ 12:2.

Kɛnɛ kalembetshiya divɛsa nɛ:

Awui wakanaso la wɔ yimba wekɔ ohomba efula le Nzambi. (Jɛrɛmiya 17:10) Ekɔ awui akina wahombaso nsala koko aha mbewɔ tsho mbuta kana nsala dui tshɛ diakɛnɛmɔla lohetsho. Lohetsho tatɛka oma lo yimba ndo l’etema aso. Ɔnkɔnɛ, sho pombaka monula lohetsho tshɛ lele lo tokanyi taso. Paka lo nsala ngasɔ mbayotokoka mɛtɛ “tshikitanyema” ndo minya lohetsho.

Kɛnɛ kakokayɛ nsala:

Sɛdingola l’otema ɔtɔi kɛnɛ kakanyiyayɛ ndo woho wayaokayɛ lo kɛnɛ kendana l’anto akina, djekoleko wanɛ wotshikitanyi la yɛ lokoho la demba kana wodja. Yambola wate: ‘Ngande wawaɔsami? Onde tokanyi tami mpikama lo kɛnɛ keyami lo dikambo diawɔ? Kana tɔ mpikama lo tshelo ya kananɛ kɔlɔ?’ Ewɔ mendaka kana mbadiaka filmɛ kana tɔkɛnyɔ tɛnyawɔ woho wahetshanya anto ndo awui wa ngala.

Ɔtɛkɛta wa Nzambi koka tokimanyiya dia mbidja lohetsho otshumba lambohikama wolo lo timba ndo l’etema aso

Hatongaka nshi tshɛ wɔdu dia nsɛdingola tokanyi taso hita ndo nsaki yaso la losembwe tshɛ. Koko Ɔtɛkɛta wa Nzambi koka tokimanyiya dia “nshihodia tokanyi ndo eyango wele l’otema.” (Hɛbɛru 4:12) Ɔnkɔnɛ tetemala nsɛdingola Bible. Ɛdika wetshelo wa lɔkɔ la tokanyi tayɛ ndo nsala kɛnɛ tshɛ kakokayɛ nsala dia mbɔtɔnganyiya tokanyi tayɛ la wetshelo wa lo Bible. Ɔtɛkɛta wa Nzambi koka tokimanyiya dia mbidja lohetsho otshumba ‘lambohikama wolo’ lo timba ndo l’etema aso.—2 Kɔrɛtɔ 10:4, 5.

Dikambo dimɔtshi dia mɛtɛ diakete lo lɔsɛnɔ—STEPHEN

Akatshikitanya yoho y’ekanelo kakinde la tɔ

Stephen nde l’ase nkumbo kande wakasowaka efula oma lo lohetsho lakaahetshaka asungu. Etombelo wakonge la dui sɔ ele, nde akayɔtɔka lo olui ɔmɔtshi w’ase pɔlitikɛ wakalɔshaka dia anto monga la lotshungɔ. L’edjedja ka wonya, ndaamɛ akayoyatambiyaka lo awui wa lohetsho. Stephen mbutaka ate: “Lo diaaso dimɔtshi dimi l’asekami takende filmɛ mɔtshi y’edjedja yakɛnyaka woho wakawɛngiyaka ase Afrikɛ oko ɛhɔmbɔ lo États-Unis. Lo menda wɛngiya ɛsɔ, takakɔmɔla ɛlɔngɔlɔngɔ w’asungu waki lɛnɛ akawɛnyaka filmɛ. Oma laasɔ, takatshu le asungu waki lɛnɛ akatadjasɛka ndo takanyomoyanga anto akina dia mbakɔmɔla.”

Ekanelo ka yimba kaki Stephen kakayotshikitanaka lo yoho ya diambo etena kakandatatɛ mbeka Bible la Ɛmɛnyi wa Jehowa. Nde mbohɔka ate: “Lakikɔ l’atei w’anto wakakananɛka kɔlɔ lo kɛnɛ kendana la nkoho y’alemba, koko kɛnɛ kakamɛnyi le Ɛmɛnyi wa Jehowa kakamambiya efula. Ɛnyɛlɔ, etena kakɛngɔla Ɔmɛnyi wa Jehowa w’osungu, nde akatshike ɔkɛndɛ w’anande le nkumbo k’anto w’edima. Ndo nto, nkumbo k’asungu wakadjasɛka la ɔlɔngɔlɔngɔ w’onto odima waki komonga la dihole dia mbidjasɛ.” Stephen akayoshikikɛka dia Ɛmɛnyi wa Jehowa wekɔ nkumbo k’onto l’ɔnango kokana ngandji kakatatshi Yeso kayonga l’atei w’Akristo wa mɛtɛ.—Joani 13:35.

Kakɔna kakakimanyiya Stephen dia ntshika awui wa ngala ndo nkanɛ anto akina kɔlɔ? Divɛsa dia Rɔmɔ 12:2 mbakokimanyiya. Nde mbutaka ate: “Lakatatɛ nshihodia dia dimi pombaka ntshikitanya ekanelo kami ka yimba. Lakahombe nɔngɔsɔla yimba yami aha paka l’oyango wa nsala akambo lo wɔladi koko oko yoho ya lɔsɛnɔ yoleki dimɛna.” Wonya ɔnɛ Stephen aya la lɔsɛnɔ l’ɔngɛnɔngɛnɔ oleki etena kakandadiɛnɛka la tokanyi ta lohetsho l’edja kolekanyi ɛnɔnyi 40.