Ngande wakokayɛ ndjashikikɛ dia wɛ mbetawɔmaka le Jehowa?

1. Tokanyi takɔna ondo takalɔshanaka l’ekambi ɛmɔtshi wa Jehowa wa kɔlamelo?

ANDE eshikikelo kele laso k’ɔnɛ Jehowa mbetawɔka ekambi ande lo tshɛ kawɔ lee! Bible mbutaka ɔnɛ: “Jehowa ngɛnangɛnaka anto ande.” (Os. 149:4) Koko lo tena dimɔtshi, anto amɔtshi kɔmɔka ndo vɔ komaka lo ndjambola ɔnɛ: ‘Onde dimi mbetawɔmaka le Jehowa?’ Atɛmɔdi efula wa kɔlamelo waki Jehowa wa lo nshi yakafundamaka Bible wakalɔshanaka lo tena dimɔtshi la tokanyi ta ngasɔ.—1 Sa. 1:​6-10; Jɔbɔ 29:​2, 4; Os. 51:11.

2. Anto akɔna wetawɔma le Jehowa?

² Bible mɛnyaka hwe di’anto wele bu kokele koka nto nyometawɔma le Jehowa. Lo woho akɔna? Sho pombaka monga la mbetawɔ le Yeso Kristo ndo batizama. (Jni. 3:16) Sho mɛnyaka lo sɛkɛ dia takayatshumoya oma lo pɛkato yaso ndo takalake Nzambi dia salaka lolango lande. (Ets. 2:38; 3:19) Jehowa ngɛnangɛnaka etena katakolaso wanya asɔ dia monga la diɔtɔnganelo dia dimɛna lande. Edja tshɛ kayototetemala nsala kɛnɛ koleki dimɛna lo lɔsɛnɔ laso lo yoho yɔtɔnɛ la dɔkɔlɔkɔ dia ndjakimɔ kaso, sho mbetawɔmaka le Jehowa ndo nde tɔsaka oko angɛnyi ande wa ma ma.—Os. 25:14.

3. Kakɔna kayangaso nsɛdingola?

³ Lande na ondo kakoka anto amɔtshi mfɔnya lo tena dimɔtshi dia hawetawɔma le Nzambi? Ngande wɛnya Jehowa dia nde tetawɔka? Ndo ngande wakoka Okristo nkeketsha eshikikelo kande k’ɔnɛ nde mbetawɔmaka le Nzambi?

ANTO AMƆTSHI KOKA MFƆNYA DIA HAWETAWƆMA LE JEHOWA

4-5. Kaanga mbeso la tokanyi ta ndjaɔsa oko anto w’anyanya, eshikikelo kakɔna kakokaso monga la tɔ?

⁴ Efula ka l’atei aso ndɔshanaka la nsaki ka ndjaɔsa oko anto w’anyanya oma ko tɔkɛndakɛnda taso. (Os. 88:15) Ɔnangɛso ɔmɔtshi lelɛwɔ Adrián mbutaka ate: “Mbala la mbala lakayaokaka oko onto l’anyanya. Lam’akimi dikɛnda, lakohɔ dia lakalɔmbaka di’ase nkumbo kami mbɔtɔ lo paradiso, koko lakafɔnyaka dia dimi komonga onto l’ɔlɔlɔ lahomba mbɔtɔ lo paradiso.” Tony, laki kombodiama lo nkumbo k’Akristo mbutaka ate: “Ndooko lushi lambombitɛka ambutshi ami dia vɔ mbokakami ngandji kana ɔnɛ wekɔ l’ofunu lo dikambo diami. Dui sɔ diakakonya dia mfɔnya dia ndooko k’ɔlɔ kasalami dia mbangɛnyangɛnya.”

⁵ Naka tekɔ lo ndɔshana la tokanyi ta ndjaɔsa oko anto w’anyanya, kete sho koka mbohɔka dia Jehowa akatokotola oya le nde. (Jni. 6:44) Nde mɛnaka kɛnɛ kele ɔlɔlɔ le so kele ondo shoamɛ hatoyaɛnyi ndo nde mbeyaka etema aso. (1 Sa. 16:7; 2 Ɛk. 6:30) Ɔnkɔnɛ, sho koka ndjaɛkɛ le nde nɛ dia nde mbutaka dia tekɔ la nɛmɔ lo washo ande.—1 Jni. 3:​19, 20.

6. Ngande wakayaokaka Pɔɔlɔ lo dikambo dia pɛkato yande ya lo nshi yakete?

⁶ La ntondo ka mbeka akambo wa mɛtɛ, amɔtshi l’atei aso takasalaka akambo amɔtshi watatetemala tɛndja onongo polo ndo ɛlɔ. (1 Pe. 4:3) Kaanga Akristo wa kɔlamelo wekɔ lo ndɔshana la nsaki kakawahowɔ ka nsala kɔlɔ. Onde otema ayɛ wekɔ lo kaanya? Naka ngasɔ, kete wɛ ayokondja esambelo lo mbeya dia ndo ekambi wa Jehowa wa kɔlamelo wakalɔshanaka la tokanyi takɔ taamɛ. Ɛnyɛlɔ, ɔpɔstɔlɔ Pɔɔlɔ akayaɔsaka oko ose paa etena kakandakanyiyaka lo dikambo dia wandja ande. (Rɔmɔ 7:24) Lo mɛtɛ, Pɔɔlɔ akashile ndjatshumoya oma lo pɛkato yande ndo akabatizama. Koko, ndamɛ akayaɔsaka “ɔpɔstɔlɔ woleki tshitshɛ” ndo lo nsala pɛkato nde kaki “pidii.”—1 Kɔr. 15:9; 1 Tim. 1:15.

7. Kakɔna kahombaso ntetemala nama lo yimba lo dikambo dia pɛkato yaso ya lo nshi yakete?

⁷ Shɛso lele l’olongo tolakaka dia todimanyiya naka sho ndjatshumoya. (Os. 86:5) Ɔnkɔnɛ, naka mɛtɛ tambonyanga l’ɔtɛ wa pɛkato kakatasale, sho koka monga l’eshikikelo lo kɛnɛ kata Jehowa ɔnɛ kekɔ mɛtɛ, mbuta ate nde akatodimanyiya.—Kɔl. 2:13.

8-9. Ngande wakokaso ndɔshana la nsaki k’ɔnɛ hatokokaki nsala pondjo awui efula dia ngɛnyangɛnya Jehowa?

⁸ Sho tshɛ nangaka nsala tshɛ kakokaso nsala dia kambɛ Jehowa. Koko, amɔtshi mbeyaka ndjaoka diele oko vɔ hawokokaki nsala akambo efula dia mbetawɔma le nde. Kadiyɛso kelɛwɔ Amanda mbutaka ate: “Mbala la mbala lakakombolaka dia mbisha Jehowa kɛnɛ koleki tshɛ dimɛna. Mbala efula lakahembaka nsala kɛnɛ kakaleke lo dihole dia nsala kɛnɛ kakamakokaka nsala. Etena kakimi kotondoyaka, lakɔsaka dia Jehowa hambetawɔki oko wemi dimɛ hayaetawɔ.”

⁹ Ngande wakokaso ndɔshana la nsaki k’ɔnɛ hatokokaki pondjo nsala awui efula dia ngɛnyangɛnya Jehowa? Ohɔka dia Jehowa ekɔ l’ekanelo k’ɔlɔlɔ. Nde hatɔlɔmbɛ dia nsala akambo oleki kɛnɛ kakokaso nsala. Nde mongaka la lowando lo kɛnɛ tshɛ kasalaso lo dikambo diande edja tshɛ kayotosalaka kɛnɛ koleki dimɛna kakokaso nsala. Ndo nto, kana yimba la bɛnyɛlɔ di’oma lo Bible di’anto wakakambɛ Jehowa l’anima awɔ tshɛ. Kana yimba lo dikambo dia Pɔɔlɔ. Nde akakambe l’ohetoheto tshɛ l’edja k’ɛnɔnyi efula, atande nkɛndɔ lo nunu dia kilɔmɛtrɛ, ataate tshumanelo. Ko etena kakandayohomanaka l’awui wakayowodjɛka elelo l’olimu ande w’esambishelo, onde laasɔ, Nzambi kombetawɔ? Aha ngasɔ. Nde akatetemala nsala kɛnɛ kakandakoke nsala ndo Jehowa akɔɔtshɔkɔla. (Ets. 28:​30, 31) Woho akɔ waamɛ mbele, kɛnɛ kakokaso mbisha Jehowa mbeyaka ntshikitana lo tena la tena. Koko kɛnɛ koleki ohomba le nde ele, kɛnɛ katotshutshuya dia mbokambɛ. Nyɛsɔ tɔsɛdingole toho tɔmɔtshi tɛnya Jehowa dia nde tetawɔka.

NGANDE WƐNYA JEHOWA DIA NDE TETAWƆKA?

10. Ngande wakokaso “mpokamɛ” Jehowa dia mɛnya dia sho mbetawɔmaka le nde? (Jni. 16:27)

¹⁰ Nde akatosha Bible. Jehowa nyangaka toho ta mɛnya ekambi ande dia nde mbowaokaka ngandji ndo nde mbangɛnangɛnaka. Afundelo kɔndɔlaka waaso ahende wele Jehowa akatɛ Yeso dia nde mbookaka ngandji, mbuta ate Ɔnande lakandetawɔka. (Mat. 3:17; 17:5) Onde wɛ kombolaka mboka Jehowa akoshikikɛ dia wɛ mbetawɔmaka le nde? Jehowa hatɛkɛta laso oma l’olongo, koko nde tɛkɛtaka laso lo tshimbo y’Ɔtɛkɛta ande. Sho koka mboka dui dia Jehowa di’ɔnɛ nde tetawɔka etena kadiaso ɛtɛkɛta wa Yeso watanema lo Evanjiliɔ. (Adia Joani 16:27.) Yeso akakɛnɛmɔla lo yoho ya kokele l’onto laki She. Ɔnkɔnɛ etena kadiaso woho wakatɛka Yeso ambeki ande waki komonga kokele koko waki la kɔlamelo dia nde mbowaetawɔka, sho koka mbɔsa diele oko Jehowa mbatotɛ ɛtɛkɛta ɛsɔ.—Jni. 15:​9, 15.

11. Lande na kele mpomana l’ehemba hɛnya dia hatoyetawɔma le Jehowa? (Jakɔba 1:12)

¹¹ Nde toshaka kɛnɛ keso la tɔ ohomba. Jehowa nomɔlomɔka dia tokimanyiya, ɛnyɛlɔ tosha diangɔ dia l’emunyi diele laso ohomba. Lo tena dimɔtshi, Jehowa mbetawɔka dia sho nsowa oko wakasowe Jɔbɔ onto ɔlɔlɔ. (Jɔbɔ 1:​8-11) Ehemba bu djembetelo yɛnya dia hatoyetawɔma le Nzambi. Koko, vɔ toshaka waaso wa mɛnya ngandji k’efula kokaso Nzambi ndo woho wayaɛkɛso le nde. (Adia Jakɔba 1:12.) Ndo etena keso l’ehemba tayɛna polo lo yɛdikɔ yatokande ngandji ndo woho watokimanyiyande dia mbikikɛ.

12. Wetshelo akɔna wakokaso nkondja oma lo kɛnɛ kakakomɛ Dmitrii?

¹² Tɔsɛdingole kɛnɛ kakakomɛ ɔnangɛso ladjasɛ l’Asie lelɛwɔ Dmitrii. Nde akashisha olimu ande ndo nde kotana olimu okina l’edja ka ngɔndɔ efula. Ɔnkɔnɛ, nde akɔshi yɛdikɔ ya mfudia olimu ande w’esambishelo, lo mɛnya dia nde ndjaɛkɛka le Jehowa. Ngɔndɔ efula yakete koko nde kotana olimu. Oma laasɔ, nde akayongaka l’ekakatanu wendana la yoonge polo nde ndjokoma ko hayetɔ oma la mbeto. Nde akayotatɛka ndjakiyanya dia nde bu omi ndo papa k’ɔlɔlɔ ndo akatatɛ ndjambola dia kana nde hayetawɔma le Jehowa. Oma laasɔ, la dikɔlɔ dimɔtshi ɔnande la womoto akafunde lo dikatshi ɛtɛkɛta watanema lo Isaya 30:15 wata ɔnɛ: “Wolo anyu wayonga lo ntshikala ki ndo lo mɛnya wɛkamu anyu.” Nde akasukana la le she laki la mbeto ko akawosha dikatshi diakɔ ndo akawotɛ ate: “Ipa etena kayoyaokaka kɔlɔ, wɛ koka mbohɔka ɛtɛkɛta wa lo divɛsa nɛ.” Dmitrii akayoshihodiaka dia diɛsɛ l’ekimanyielo ka Jehowa, nkumbo kande kaki la mbo ya ndɛ yahombama, ahɔndɔ ndo dihole dia mbishama. Nde mbutaka ate: “Kɛnɛ kaki ohomba lemi dia nsala ele, ntshikala ki ndo ntetemala ndjaɛkɛ le Nzambi kami.” Naka wɛ ekɔ la ntondo ka ekakatanu wa ngasɔ, kete onga l’eshikikelo dia Jehowa ndjakiyanyaka lo dikambo diayɛ ndo nde ayokokimanyiya dia mbikikɛ.

13. Anto akɔna wakoka Jehowa nkamba lawɔ dia mɛnya dia sho mbetawɔmaka le nde ndo lo ngande?

¹³ Nde toshaka anangɛso l’akadiyɛso. Jehowa kambaka l’anangɛso l’akadiyɛso dia mɛnya dia nde tetawɔka. Ɛnyɛlɔ, nde mbeyaka tshutshuya anto akina dia nkamba l’ɛtɛkɛta wakeketsha l’etena k’ɔlɔlɔ. Kadiyɛso kadjasɛ l’Asie akahomana la dui dia ngasɔ etena kakinde l’ekiyanu w’efula. Nde akashisha olimu ande ndo akakite baka la hemɔ ka wolo. Oma laasɔ, omɛnde akasale pɛkato ka woke ndo nde komonga ekumanyi nto. Nde mbutaka ate: “Takamakoke nshihodia lande na kakakomɛka awui asɔ. Lakafɔnya dia ondo lakasale dui dimɔtshi dia kɔlɔ ndo ondo Jehowa hayombetawɔ.” Kadiyɛso akasɛngasɛnga Jehowa dia nde mboshikikɛ dia nde mbowetawɔka. Ngande wakookadimola Jehowa? Nde mbutaka ate: “Dikumanyi dia l’etshumanelo wakasawola lami ndo wakashikikɛ dia Jehowa mbokakami ngandji.” L’ɔkɔngɔ, nde akanyomɔlɔmba nto Jehowa dia mbokimanyiya. Nde mbutaka ate: “Lushi lakɔ laamɛ, lakalongola mukanda w’oma le olui w’anangɛso l’akadiyɛso wa l’etshumanelo. Etena kakamadiaka ɛtɛkɛta awɔ w’esambelo, lakayaoke dia Jehowa akampokamɛka.” Eelo, mbala efula Jehowa mɛnyaka dia nde tetawɔka lo tshimbo y’ɛtɛkɛta w’esambelo w’oma le anto akina.—Os. 10:17.

14. Naa yoho kina yɛnya dia sho mbetawɔmaka le Jehowa?

¹⁴ Jehowa mɛnyaka nto dia sho mbetawɔmaka le nde lo nkamba l’asekaso ambetawudi dia tosha alako etena keso l’ohomba awɔ. Ɛnyɛlɔ, lo ntambe ka ntondo, Jehowa akakambe l’ɔpɔstɔlɔ Pɔɔlɔ dia mfunda mikanda 14 wakasambiyama otsha le asekande ambetawudi. Mikanda ɛsɔ wekɔ l’alako wa wolo koko ndo wa la ngandji. Lande na kakasambiyɛ Jehowa Pɔɔlɔ dia mfuda alako wa ngasɔ? Jehowa ekɔ Papa k’ɔlɔlɔ ndo nde mbishaka ana ‘wangɛnangɛnande’ dilanya. (Tok. 3:​11, 12) Ɔnkɔnɛ, naka tambolongola alako wotombi oma lo Bible, kete sho koka shikikɛ dia ɔsɔ ekɔ yoho mɔtshi yɛnya dia sho mbetawɔmaka le Nzambi, koko aha ɔnɛ hatoyetawɔma le nde. (Hɛb. 12:6) Naa tolembetelo tokina tɛnya dia sho mbetawɔmaka le Jehowa?

TOHO TAKOKASO MBEYA DIA JEHOWA TETAWƆKA

15. Jehowa waa na washande nyuma kande k’ekila ndo lande na kakoka dui sɔ tosha eshikikelo?

¹⁵ Jehowa mbishaka nyuma k’ekila le wanɛ wetawɔma le nde. (Mat. 12:18) Sho koka ndjambola ɔnɛ: ‘Onde lekɔ l’akoka wa nkɛnɛmɔla dionga dimɔtshi dia l’olowa wa nyuma k’ekila ka Nzambi lo lɔsɛnɔ lami?’ Onde wɛ amboshola dia wɛ amboleka nkɛnɛmɔla solo dia lotutsha otsha le anto akina oleki woho wakayasalaka dui sɔ la ntondo ka wɛ mbeya Jehowa? Etena tshɛ kayotalekaka nkɛnɛmɔla waonga w’amɛna wa l’olowa wa nyuma ka Nzambi, mbayotalekaka monga l’eshikikelo dia wɛ mbetawɔmaka le Jehowa!—Enda kiombo yele l’ɔtɛ a dui ɔnɛ: “Olowa wa nyuma ele . . . ”

16. Anto akɔna wele Jehowa ekɔ lo nkamba lawɔ dia nsambisha lokumu l’ɔlɔlɔ ndo ngande wayaokayɛ? (1 Tɛsalɔnika 2:4)

¹⁶ Jehowa ngɛnangɛnaka mbisha wanɛ wetawɔnde ɔkɛndɛ wa nsambisha lokumu l’ɔlɔlɔ. (Adia 1 Tɛsalɔnika 2:4.) Enda woho wakakondja kadiyɛso kelɛwɔ Jocelyn wahɔ lo nsambisha anto akina lokumu l’ɔlɔlɔ. Lushi lɔmɔtshi, Jocelyn aketɔ l’ɔkɔmwɛlɔ w’efula. Nde mbutaka ate: “Lakayaoke diele oko ndooko k’ɔlɔ kasalami. Koko laki ombatshi mboka ndo ɔsɔ aki lushi latomosambishaka. Ɔnkɔnɛ, lakalɔmbɛ ndo lakatshu l’esambishelo.” La pindju kɛsɔ, Jocelyn akahomana la Mary, womoto ɔmɔtshi l’ɔlɔlɔ laketawɔ mbeka Bible. L’ɔkɔngɔ wa ngɔndɔ ngana, Mary mbutaka dia nde akalɔmbaka Nzambi dia nde mbokimanyiya etena kakakɔkɔla Jocelyn lo lokuke lande. Lo nkana yimba la dui sɔ, Jocelyn mbutaka ate: “Lakayaoke diele oko Jehowa ekɔ lo mbutɛmi ate, ‘wɛ mbetawɔmaka le mi.’” Lo mɛtɛ, aha onto tshɛ mbayetawɔ esambishelo kaso. Koko, sho koka monga l’eshikikelo dia Jehowa ngɛnangɛnaka etena kasalaso kɛnɛ tshɛ kakokaso nsala dia nsambisha anto akina lokumu l’ɔlɔlɔ.

17. Wetshelo akɔna wakondjayɛ oma lo kɛnɛ kakate Vicky lo kɛnɛ kendana l’oshinga w’etshungwelo? (Osambo 5:12)

¹⁷ Jehowa kambaka la nɛmɔ di’oshinga w’etshungwelo le anto wetawɔma le nde. (1 Tim. 2:​5, 6) Ko kakɔna kayotosala naka toyaoka oko Jehowa hatetawɔ kaanga mbeso la mbetawɔ l’oshinga w’etshungwelo ndo kakatabatizama? Kɛnɛ kahombaso mbohɔka ele, hatokoke ndjaɛkɛ lo nsaki yaso hita, koko sho koka ndjaɛkɛ le Jehowa. Nde mbɔsaka wanɛ wele la mbetawɔ l’oshinga w’etshungwelo oko anto w’ɛlɔlɔ lo washo ande ndo nde mbalakaka dia nde ayowatshɔkɔla. (Adia Osambo 5:12; Rɔmɔ 3:26) Nkana yimba l’oshinga w’etshungwelo akakimanyiya Vicky. Lushi lɔmɔtshi l’ɔkɔngɔ wa nde nkana yimba l’oshinga w’etshungwelo, nde akashikikɛ ɔnɛ: “Jehowa aki la solo dia lotshutsha oya lemi l’etena k’otale. . . . Koko, aki oko lakawotɛka nte: ‘Ngandji kayɛ keema wolo dia nkoma le mi. Olambo w’ɔnayɛ hawokoke nkomba pɛkato yami.’” Lo nkana yimba la woshasha w’oshinga w’etshungwelo, nde akatatɛ ndjaoka dia Jehowa mbookaka ngandji. Sho lawɔ koka ndjaoka dia Jehowa tokaka ngandji ndo sho mbetawɔmaka le nde, etena kakanaso yimba l’oshinga w’etshungwelo.

18. Eshikikelo kakɔna kakokaso monga la tɔ naka sho ntetemala mboka Shɛso kele l’olongo ngandji?

¹⁸ Kaanga mbakokaso nsala la wolo dia nkamba la wetshelo w’oma lo sawo nɛ, ondo lo tena dimɔtshi sho mbeyaka nkɔmɔ ndo ndjambola dia kana sho mbetawɔmaka le Jehowa. Naka dui dia ngasɔ diambotokomɛ, tohɔ dia nde mbetawɔka “wanɛ watetemala mbooka ngandji.” (Jak. 1:12) Ɔnkɔnɛ, nyɛsɔ totetemale monga suke suke la Jehowa ndo mbidja yimba lo tolembetelo tashikikɛ dia sho mbetawɔmaka le nde. Tatohɛke pondjo dia Jehowa “bu etale oma le ɔmɔmɔ la l’atei aso.”—Ets. 17:27.