Woho wakadimanyiyamaka pɛkato la ntondo k’oshinga w’etshungwelo kimɔma

Sho koka dimanyiyama pɛkato yaso paka lo tshimbo y’olambo w’oshinga w’etshungwelo wakafute Yeso la dikila diande. (Ɛf. 1:7) Koko, Bible mbutaka ɔnɛ: “Nzambi akadimanyiyaka anto pɛkato yakawasalaka lo nshi yakete,” mbuta ate, la ntondo ka Yeso nkimɔ oshinga w’etshungwelo. (Rɔmɔ 3:25) Ngande wakakoke Jehowa dimanyiya pɛkato la ntondo ka olambo w’oshinga w’etshungwelo futama ko l’etena kakɔ kaamɛ nde ntetemala monga Nzambi ka losembwe?

Lo washo wa Jehowa, oshinga w’etshungwelo wakafutama etena kakandɔshi yɛdikɔ ya ntondja “kanula” yakahombe ndjoshimbɛ anto waki la mbetawɔ. (Eta. 3:15; 22:18) Nzambi aki l’eshikikelo dia l’etena kahombama, Ɔnande ɛtɔi ayohomba ndjakimɔ la lolango dia nkimɔ oshinga w’etshungwelo. (Ngal. 4:4; Hɛb. 10:​7-10) Etena kakinde la nkɛtɛ oko onyimpala waki Nzambi, Yeso aki la lowandji la dimanyiya pɛkato la ntondo ka oshinga w’etshungwelo kimɔma. Yeso akahombe dimanyiya pɛkato ya wanɛ waki la mbetawɔ nɛ dia nde akeyaka dia olambo ande wayoyokomba pɛkato yawɔ.—Mat. 9:​2-6.