Woho wa minya taamu

1-2. a) Naa taamu tɔmɔtshi takoka mpomana l’ekambi wa Jehowa? b) Kakɔna kayotɔsɛdingola lo sawo nɛ?

SHO tshɛ mongaka la taamu tena dimɔtshi oyadi ɛnɔnyi akɔna wele la so.a Ɛnyɛlɔ, tokanyiya di’ɔlɔngɔlɔngɔ ɔmɔtshi w’Ɔmɛnyi wayambola dia kana Jehowa mbɔɔsaka la nɛmɔ. Nde mbeyaka mengenga dia batizama. Tokanyiya dia ɔnangɛso l’opalanga lele lam’akinde ɔlɔngɔlɔngɔ akɔshi yɛdikɔ ya mbetɛ wahɔ wa Diolelo la ntondo lo dihole dia nyanga elimu wa l’andja ɔnɛ. Ndo kakianɛ nde aya opalanga ndo aya bu l’akuta wa nkotsha ehomba w’ase nkumbo kande. Nde mbeyaka monga la taamu dia kana nde akɔshi yɛdikɔ ya dimɛna etena kakinde ɔlɔngɔlɔngɔ. Tɔshi ɛnyɛlɔ ka kadiyɛso k’osombe kele aya la elelo ndo aya bu la wolo efula. Nde mbeyaka nkɔmɔ nɛ dia nde aya bu l’akoka wa nsala kɛnɛ kakandasalaka ntondo. Onde wɛ atayambolaka ndooko lushi ambola wayela anɛ: ‘Onde Jehowa mbidjakami yimba mɛtɛ? Onde awui wakamayahondja lo dikambo dia Jehowa wekɔ la nɛmɔ? Onde laakatetemala monga ohomba dia Jehowa nkamba la mi?’

² Naka sho ntshika ambola wele oko anɛ aha la nkadimola, vɔ koka monga la shɛngiya ya kɔlɔ l’ɔtɛmwɛlɔ aso. Lo sawo nɛ, tayɔsɛdingola woho wakoka Bible tokimanyiya naka tekɔ la taamu ɔnɛ: 1) Jehowa ndjashaka le so, 2) tɛdikɔ takatɔshi lo nshi yakete taki amɛna kana 3) taakatetemala monga ohomba dia Jehowa nkamba la so.

WOHO WAKOKAYƐ MINYA TAAMU

3. Naa yoho mɔtshi yakokaso minya taamu taso?

³ Yoho mɔtshi yakokaso minya taamu ele lo ndjaɛkɛ l’Ɔtɛkɛta wa Nzambi dia ntana ekadimwelo lo ambola aso. Naka sho nsala ngasɔ, kete tayokeketala, tayohama lo nyuma ndo tayonga la kɛnɛ kele la so ohomba dia ‘ntshikala nge lo mbetawɔ.’—1 Kɔr. 16:13.

4. Ngande ‘wasɛdingolaso akambo tshɛ?’ (1 Tɛsalɔnika 5:21)

⁴ Adia 1 Tɛsalɔnika 5:21. Tolembete dia Bible tokeketshaka dia ‘nsɛdingola akambo tshɛ.’ Ngande wakokaso nsala dui sɔ? Sho koka ndjashikikɛ dia kɛnɛ ketawɔso kekɔ mɛtɛ lo mbɛdika la kɛnɛ kata Bible. Ɛnyɛlɔ, tɔsɛdingole dikambo di’ɔlɔngɔlɔngɔ lakayambolaka dia kana nde ekɔ la nɛmɔ lo washo wa Nzambi. Onde nde pombaka mbetawɔ tsho dia kanyi shɔ yekɔ mɛtɛ? Ndooko, nde pombaka ‘nsɛdingola akambo tshɛ’ lo monga la tokanyi ta Jehowa lo dikambo diakɔ.

5. Ngande watanaso ekadimwelo wa Jehowa lo ambola aso?

⁵ Etena kadiaso Ɔtɛkɛta wa Nzambi, sho ‘pokamɛka’ Jehowa asawola la so. Koko dia sho monga la tokanyi tande lo dikambo dimɔtshi shikaa, nɔmbamaka mbidja welo. Sho pombaka mbidjaka yimba lo wadielo aso wa Bible lo dikambo dimɔtshi shikaa diendana la so. Sho koka nsala eyangelo lo dikambo diakɔ, lo nkamba la dihomɔ dia wekelo diatondja okongamelo wa Jehowa. (Tok. 2:​3-6) Sho koka nɔmba Jehowa dia nɔmbɔla eyangelo aso ndo tokimanyiya dia ntana tokanyi tande lo dimbola diaso. Oma laasɔ sho koka mbika washo l’atɔndɔ wa lo Bible ndo l’awui shikaa wakoka tokimanyiya lo dikambo diele la so. Sho koka nto nsɛdingola ɛkɔndɔ w’anto watɛkɛtama lo Bible wakahomana l’akambo wa woho akɔ waamɛ.

6. Ngande watokimanyiya nsanganya dia minya taamu?

⁶ Sho pokamɛka nto woho watɛkɛta Jehowa la so lo nsanganya yaso. Naka sho mbɔtɔka nsanganya mbala la mbala, kete sho koka mboka dui dimɔtshi lo sawo kana lo kɔmatɛrɛ k’onto ɔmɔtshi kele mɛtɛ kɛnɛ kele la so ohomba dia sho minya taamu. (Tok. 27:17) Nyɛsɔ tɔsɛdingole woho wakokaso minya taamu lo awui amɔtshi shikaa.

ETENA KONGAYƐ LA TAAMU DIA KANA JEHOWA NDJASHAKA LE YƐ

7. Dimbola diakɔna diakoka anto ɔmɔtshi ndjaoka?

⁷ Onde wɛ atayambolaka wate: ‘Onde Jehowa mɛnakami mɛtɛ?’ Naka wɛ ndjaokaka dia wɛ bu la nɛmɔ, kete wɛ mbeyaka nkanyiya dia ekɔ wolo le yɛ dia monga ɔngɛnyi w’Otungi w’andja. Ondo kanyi ya ngasɔ mbaki la nkumekanga Davidɛ. Nde akaambe dia Jehowa mbidjaka anto w’anyanya yimba ndo akambola ate: “Jehowa le, onto eende katoyowɛna, ɔna onto okovɔ eende katoyowodja yimba?” (Os. 144:3) Lende akokayɛ ntana ekadimwelo lo dimbola sɔ?

8. Lo 1 Samuɛlɛ 16:​6, 7, 10-12, kakɔna kɛna Jehowa le anto?

⁸ Lo Bible, sho mbekaka dia Jehowa mɛnaka anto wɔsama oma le anto akina dia vɔ bu la nɛmɔ. Ɛnyɛlɔ, Jehowa akatome Samuɛlɛ lo luudu la Jɛse dia tokita ɔmɔtshi la l’atei w’anande esɔ dia ndjonga nkumekanga k’Isariyɛlɛ. Jɛse akelɛ anande esambele l’atei w’anande enanɛi dia tohomana la Samuɛlɛ, koko nde kombelɛ Davidɛ lakaleke dikɛnda.b Koko Jehowa akasɔnɛ Davidɛ. (Adia 1 Samuɛlɛ 16:​6, 7, 10-12.) Jehowa akɛnyi woho w’onto waki Davidɛ mɛtɛ, mbuta ate nde akeyaka dia nde akoolangaka efula.

9. Lande na kakokayɛ ndjashikikɛ dia Jehowa ndjashaka le yɛ? (Enda ndo osato.)

⁹ Tokanyiya woho wambokɛnyaka Jehowa dia nde kɛnaka. Nde koshaka alako w’amɛna lo dikambo diele la yɛ shikaa. (Os. 32:8) Ngande wakokande nsala dui sɔ naka nde atakeye dimɛna? (Os. 139:1) Etena kakambayɛ l’alako wa Jehowa ndo kɛnayɛ woho wakokimanyiyawɔ, wɛ ayonga l’eshikikelo dia Jehowa ndjashaka le yɛ. (1 Ɛk. 28:9; Ets. 17:​26, 27) Jehowa mɛnaka welo wadjayɛ dia mbokambɛ. Nde mɛnaka waonga ayɛ wa l’etei k’otema ndo nde nangaka monga ɔngɛnyi ayɛ. (Jɛr. 17:10) Nde nangaka dia wɛ mbetawɔ dia nde nangaka monga Ɔngɛnyi ayɛ.—1 Jni. 4:19.

ETENA KEYƐ LA TAAMU DIA KANA TƐDIKƆ TAKAYƆSHI LO NSHI YAKETE TAKI TA LOMBA

10. Etena kakanyiyaso lo dikambo dia tɛdikɔ takatɔshi lo nshi yakete, ambola akɔna wakokaso ndjaoka?

¹⁰ Tena dimɔtshi lo lɔsɛnɔ, anto amɔtshi mbeyaka mfɔnya dia kana tɛdikɔ takawɔshi lo nshi yakete taki t’amɛna. Ondo wakɔshi yɛdikɔ ya ntshika ndjela ɛngɔnyi wa l’andja ɔnɛ l’oyango wa ndeka kambɛ Jehowa. Koko mbeyaka monga ko ɛnɔnyi efula wambeta. Vɔ mbeyaka nkanyiya lo dikambo dia wanɛ wakasalaka elimu wa l’andja ɔnɛ wele kakianɛ waya la dikuta efula. Etombelo wakoka monga la dui sɔ ele, vɔ mbeyaka ndjambola ɔnɛ: ‘Onde kɛnɛ kakamayahondja lo dikambo dia Jehowa kekɔ mɛtɛ la nɛmɔ? Kana onde tɔ pandjɛkami waaso akina?’

11. Kakɔna kakatshindjaka ofundji wa Osambo 73 wɔɔngɔ?

¹¹ Naka ambola wa ngasɔ wambokoyɛ lo yimba, kete sɛdingola woho wakayaoke ofundji w’Osambo 73. Nde akɛnyi anto amɔtshi wele l’ɔngɛnɔngɛnɔ, wele l’alemba w’amɛna, wekɔ lo ngɔna ndo wele bu l’ekiyanu. (Os. 73:​3-5, 12) Lo mbaenda dia vɔ wakatondoyaka, nde akoke dia welo wakandadjaka dia kambɛ Jehowa waki anyanya. Nde ‘akatshimbaka wɔɔngɔ lushi l’otondo’ la tokanyi t’ɔkɔmwɛlɔ tɔsɔ. (Os. 73:​13, 14) Kakɔna kakandasale dia mbahemɛ tokanyi takootshindjaka wɔɔngɔ tɔsɔ?

12. Lo ndjela Osambo 73:​16-18, ngande wakakandola ofundji w’osambo ekiyanu ande?

¹² Adia Osambo 73:​16-18. Omembi w’osambo akɔtɔ lo dihole dia wɔladi dia lo tɛmpɛlɔ k’ekila ka diambo ka Jehowa. Lɛkɔ, mbakandatonga l’akoka wa nkana yimba dimɛna. Nde akashihodia dia kaanga mbakoka mɛnama dia lɔsɛnɔ l’anto akina lekɔ wɔɔdu, vɔ komonga la nshi yayaye y’amɛna. La kanyi shɔ lo yimba, nde akakondja wɔladi wa lo yimba ndo akɛnyi dia mbesa awui wa lo nyuma mbele yɛdikɔ yoleki dimɛna. Etombelo waki la dui sɔ ele, nde akanyomoyashikikɛ dia ntetemala kambɛ Jehowa.—Os. 73:​23-28.

13. Ngande wakokayɛ ntana wɔladi wa lo yimba naka wɛ ekɔ lo ndjakiyanya l’ɔtɛ wa tɛdikɔ takayɔshi lo nshi yakete? (Enda ndo osato.)

¹³ Woho akɔ waamɛ mbele l’ekimanyielo k’Ɔtɛkɛta wa Nzambi wɛ koka nkondja wɔladi wa lo yimba. Lo ngande? Ohɔ nɛmɔ diele la yɛ ndo woho wakɔtshɔkɔla Jehowa, ohɔ dia wanɛ wahakambɛ Jehowa hawokondja ɛtshɔkɔ ande. Vɔ mbeyaka ndjaɛkɛ tshɛ lo tshɛ lo kɛnɛ kasalawɔ lo lɔsɛnɔ lɔnɛ nɛ dia vɔ bu l’elongamelo ka lo nshi yayaye. Koko, Jehowa kolakaka ɛtshɔ woleki ndo kɛnɛ kakokayɛ nongamɛ. (Os. 145:16) Ndo nto, sɛdingola dui nɛ: Onde sho mbeyaka mɛtɛ woho wotonga lɔsɛnɔ laso otondonga takɔshi tɛdikɔ totshikitanyi la tɔnɛ takatɔshi? Kɛnɛ kele mɛtɛ ele, wanɛ wɔsa tɛdikɔ tohikami lo ngandji ka Nzambi ndo ka wonyaso onto, hawohombe ndooko ɛngɔ k’ɔlɔlɔ.

ETENA KEYƐ LA TAAMU DIA KANA JEHOWA AAKATETEMALA NKAMBA LA YƐ

14. Akambo akɔna wahomana l’anto amɔtshi ndo kɛsɔ mbakonyaka dia ndjaoka dimbola diakɔna?

¹⁴ Ekambi wa Jehowa ɛmɔtshi wekɔ lo diɛnɛ la lotshundu l’osombe, yoonge ya kɔlɔ kana wekɔ la dikɔmɔ. Kɛsɔ koka mbakonya dia vɔ ndjaoka oko vɔ bu la nɛmɔ lo washo wa Jehowa. Vɔ koka ndjambola ɔnɛ: ‘Onde laakatetemala monga ohomba dia Jehowa nkamba la mi?’

15. Eshikikelo kakɔna kaki l’ofundji wa Osambo 71?

¹⁵ Ofundji wa Osambo 71 aki la tokanyi takɔ taamɛ. Nde akalɔmbɛ ate: “Tonkalɛke lam’ayoshila wolo ami.” (Os. 71:​9, 18) Koko, omembi w’esambo aki l’eshikikelo dia naka nde kambɛ Nzambi kande la kɔlamelo tshɛ, kete Jehowa ayowɔlɔmbɔla ndo ayowosukɛ. Omembi w’esambo akɛnyi dia Jehowa ngɛnangɛnaka wanɛ wasala kɛnɛ tshɛ kakokawɔ nsala dia mbokambɛ oyadi elelo wele la wɔ.—Os. 37:​23-25.

16. Lo toho takɔna tɛnya dia Jehowa kambaka l’esombe? (Osambo 92:​12-15)

¹⁶ Esombe le, nyoyaɔshi oko wanyɔsa Jehowa. Nde koka nyokimanyiya dia nyu ndjasha l’akambo wa lo nyuma kaanga mbadiɛnɛnyu l’ekakatanu wendana la yoonge. (Adia Osambo 92:​12-15.) Lo dihole dia mbika washo lo kɛnɛ kenyu bu l’akoka wa nsala, nyu koka mbika washo lo kɛnɛ kenyu l’akoka wa nsala. Ɛnyɛlɔ, nyu koka nkimanyiya anto oma l’ɛnyɛlɔ kanyu ka kɔlamelo ndo woho wayashanyu le wɔ l’onto ndo l’onto. Wɛ koka mbatɛ woho wambokosukɛ Jehowa l’edja k’ɛnɔnyi ndo wɛ koka nkahana la wɔ elongamelo kayɛ kendana l’ekotshamelo k’alaka ande ndo tɔnyɔlake pondjo woho wakoka alɔmbɛlɔ ayɛ wa l’otema ɔtɔi nkimanyiya anto akina. (1 Pe. 3:12) Oyadi akambo akɔna wele la so, sho tshɛ tekɔ l’ɛngɔ kɛmɔtshi kakokaso mbisha Jehowa ndo anto akina.

17. Lande na kahatahombe ndjaɛdika l’anto akina?

¹⁷ Naka wɛ ekɔ lo ndjakiyanya dia wɛ hayokoka nsala awui efula l’olimu wa Jehowa, kete eya dia kɛnɛ tshɛ kasalayɛ kekɔ la nɛmɔ lo washo ande. Lo tena dimɔtshi, wɛ koka mbɛdika kɛnɛ kasalayɛ la kɛnɛ kasala anto akina. Tosalake dui sɔ! Lande na? Nɛ dia Jehowa hasale wɛdikelo wa ngasɔ. (Ngal. 6:4) Ɛnyɛlɔ, Mariya akasha Yeso woshasha wa malashi w’oshinga wolo. (Jni. 12:​3-5) Lo yoho yotshikitanyi, wadi aki odo akakimɔ woshasha lo tɛmpɛlɔ wa ekenga ehende wa falanga waki la nɛmɔ dia tshitshɛ efula. (Luka 21:​1-4) Koko, Yeso akɛnyi weshasha akɔ ehende oko djembetelo ya mbetawɔ. She, Jehowa, mbɔsaka la nɛmɔ kɛnɛ tshɛ kasalayɛ l’otema ɔtɔi ndo ngandji kawokayɛ kaanga mbakokayɛ mɛna dia kekɔ tshitshɛ le yɛ.

18. Kakɔna kayotokimanyiya dia minya taamu? (Enda ndo kiombo yele l’ɔtɛ a dui ɔnɛ: “Ɔtɛkɛta wa Jehowa koka kokimanyiya dia minya taamu.”)

¹⁸ Sho tshɛ mongaka la taamu lo tena dimɔtshi. Koko Ɔtɛkɛta wa Nzambi, Bible, koka tokimanyiya dia ndɔshana la tɔ. Laasɔ, sala la wolo dia minya taamu tayɛ ndo onga l’eshikikelo lo dihole dia ndjakiyanya. Jehowa keyaka dimɛna. Nde mbɔsaka kɛnɛ kakaayahondja la nɛmɔ ndo nde kolakaka dia kofuta. Jehowa nangaka ekambi ande tshɛ wa kɔlamelo ndo nde ndjakiyanyaka dikambo diawɔ.