Wahɔ wakondjaso oma lo ngandji ka Jehowa

1. Kakɔna kakokaso nsala dia ngɛnyangɛnya Jehowa?

OHƆSA dia wɛ ambosha onto lokayɛ ngandji woshasha wa laande wa dimɛna efula ndo w’ohomba. Ande woho wayoyonyanga naka onto akɔ mbɔsa woshasha akɔ ko mbokitsha aha la nkamba la wɔ lee! Lo wedi okina, wɛ ayɔngɛnangɛna naka nde nkamba la woshasha akɔ ndo mɛnya lowando l’ɔtɛ awɔ. Ngande wɔtɔnɛ ɛnyɛlɔ kɛnɛ la woshasha wa Jehowa w’oshinga w’etshungwelo? Jehowa akakimɔ Ɔnande lo wahɔ aso. Ande ɔngɛnɔngɛnɔ wahomba monga la Jehowa etena kɛnyaso lowando lo woshasha wa nɛmɔ ɔsɔ ndo lo ngandji kande kakootshutshuya dia nde nkimɔ oshinga w’etshungwelo lee!—Jni. 3:16; Rɔmɔ 5:​7, 8.

2. Kakɔna kayotɔsɛdingola lo sawo nɛ?

² Koko l’edjedja ka wonya, sho koka ndjɔsa oshinga w’etshungwelo ɔsɔ oko ɛngɔ k’anyanya. Kɛsɔ koka monga oko onto lɔsa woshasha wa Nzambi ɔsɔ ko mbodja lo luudu aha la nkamba la wɔ. Koko naka sho hatɛnyisha lowando laso l’oshinga w’etshungwelo, kete ayonga oko anto wɔsa woshasha wa Jehowa wa nɛmɔ ɔsɔ ko mbokitshaka lo dihole diahatakoke nkamba la wɔ. Di’aha dui dia ngasɔ tokomɛ, sho pombaka tena la tena mɛnyaka lowando laso lo kɛnɛ kakatosalɛ Nzambi la Kristo. Sawo nɛ kokaka tokimanyiya dia nsala dui sɔ. Tayɔsɛdingola wahɔ wakondjaso diɛsɛ l’oshinga w’etshungwelo oma ko kakianɛ ndo woho wakokaso nkondja wahɔ oma lɔkɔ lo nshi yayaye. Tayɔsɛdingola nto woho wakokaso mɛnya lowando laso lo ngandji ka Jehowa, djekoleko lo nshi ya Eohwelo nyɛ.

WOHO WAKONDJASO WAHƆ OMA KO KAKIANƐ

3. Naa yoho mɔtshi yakondjaso wahɔ oma l’oshinga w’etshungwelo oma ko kakianɛ?

³ Tekɔ lo nkondja wahɔ oma l’olambo wa Kristo w’oshinga w’etshungwelo. Ɛnyɛlɔ, diɛsɛ l’oshinga w’etshungwelo, Jehowa todimanyiyaka pɛkato yaso. Nde hatshutshuyama la wolo dia todimanyiya pɛkato yaso. Koko nde nangaka dia todimanyiya. La lowando tshɛ omembi w’esambo akembe ate: “Nɛ dia Jehowa le, wɛ ekɔ ɔlɔlɔ ndo suke dia dimanyiya.”—Os. 86:5; 103:​3, 10-13.

4. L’ɔtɛ w’anto akɔna wakakimɔ Jehowa oshinga w’etshungwelo? (Luka 5:32; 1 Timɔte 1:15)

⁴ Anto amɔtshi fɔnyaka dia hawosungana dimanyiyama oma le Jehowa. Lo mɛtɛ, sho tshɛ hatosungana dimanyiyama. Ɔpɔstɔlɔ Pɔɔlɔ akashihodia dia nde ‘hasungana mbelamɛ ɔpɔstɔlɔ.’ Koko, nde akakotsha ate: “Oma lo ɔlɔlɔ waheyama mbɛdika waki Nzambi mbemi kɛnɛ kemi.” (1 Kɔr. 15:​9, 10) Etena kayatshumoyaso oma lo pɛkato yaso, Jehowa todimanyiyaka. Lande na? Aha l’ɔtɛ wasunganaso dimanyiyama oma le nde, koko l’ɔtɛ wa ngandji katokande. Naka wɛ fɔnyaka dia wɛ hakoke dimanyiyama, kete ohɔ dia Jehowa akakimɔ oshinga w’etshungwelo, aha l’ɔtɛ w’anto wahasale pɛkato, koko l’ɔtɛ w’atshi wa pɛkato wayatshumoya.—Adia Luka 5:32; 1 Timɔte 1:15.

5. Onde onto ɔmɔtshi la l’atei aso koka mbuta dia nde sunganaka dimanyiyama oma le Jehowa? Lembetshiya.

⁵ Ndooko onto la l’atei aso lakoka mbidjangɛ Jehowa dia mbodimanyiya l’ɔtɛ wambondookambɛ l’edja k’ɛnɔnyi efula. Jehowa mbohɔka kɛnɛ tshɛ kakatasale lo dikambo diande. (Hɛb. 6:10) Nde akatosha Ɔnande oko woshasha wa la lolango, aha dia nde tofuta l’ɔtɛ wambotookambɛ. Naka sho mbuta dia sho sunganaka dimanyiyama oma le Jehowa l’ɔtɛ w’awui efula wambotoosalɛ, kete aha la taamu, tekɔ lo nanga mbuta ɔnɛ sho bu l’ohomba w’oshinga w’etshungwelo.—Ɛdika la Ngalatiya 2:21.

6. Lande na kakayasha ɔpɔstɔlɔ Pɔɔlɔ efula l’olimu wa Jehowa?

⁶ Pɔɔlɔ akeyaka dia nde totondokoka mbetawɔma le Nzambi. Ko laasɔ, lande na kakandayasha efula l’olimu wa Jehowa? Aha dia mɛnya ɔnɛ nde sunganaka, koko dia mɛnya lowando lande l’ɔlɔlɔ waheyama mbɛdika waki Jehowa. (Ɛf. 3:7) Oko Pɔɔlɔ, sho tetemalaka kambɛ Jehowa l’ohetoheto tshɛ, aha dia mbokama kɛtshi oma le Jehowa, koko dia mɛnya lowando laso lo kɛtshi kande.

7. Naa yoho kina yakondjaso wahɔ oma l’oshinga w’etshungwelo oma ko kakianɛ? (Rɔmɔ 5:1; Jakɔba 2:23)

⁷ Yoho kina yakondjaso wahɔ oma l’oshinga w’etshungwelo oma ko kakianɛ ele sho koka monga la diɔtɔnganelo dia dimɛna la Jehowa, l’onto ndo l’onto.a Oko wakatɛnyi lo sawo di’etshi, etena kotɔso, sho hatonge la diɔtɔnganelo la Nzambi. Koko diɛsɛ l’oshinga w’etshungwelo, sho koka monga la “wɔladi lam’asaso la Nzambi” ndo sho koka ndjasukanya la nde.—Adia Rɔmɔ 5:1; Jakɔba 2:23.

8. Lande na kakokaso monga la lowando le Jehowa lo diɛsɛ diele la so dia mbɔlɔmba?

⁸ Tɔsɛdingole dui ɔtɔi to lo kɛnɛ kendana la diɔtɔnganelo diasaso la Jehowa, mbuta ate diɛsɛ diele la so dia mbɔlɔmba. Jehowa pokamɛka aha tsho alɔmbɛlɔ wa lo sɛkɛ w’ekambi ande etena kasanganawɔ, koko ndo alɔmbɛlɔ walɔmba ɔmɔmɔ la l’atei aso. Dɔmbɛlɔ koka mbɔladia otema aso ndo tosha wɔladi wa lo yimba. Koko ekɔ wahɔ ekina wakondjaso oma lo dɔmbɛlɔ, diɔ koka mfudia lɔngɛnyi lasaso la Nzambi. (Os. 65:2; Jak. 4:8; 1 Jni. 5:14) Etena kakinde la nkɛtɛ, Yeso akalɔmbaka mbala la mbala nɛ dia nde akeyaka dia Jehowa akohokamɛka ndo ɔnɛ dɔmbɛlɔ sɔ diakakoke nkeketsha diɔtɔnganelo dia dimɛna diasande la She. (Luka 5:16) Ande lowando lele la so, dia diɛsɛ l’olambo wa Yeso, tokoka monga angɛnyi wa Jehowa ndo nsawola la Nde lo dɔmbɛlɔ lee!

WOHO WAKOKASO NKONDJA WAHƆ LO NSHI YAYAYE

9. Wahɔ akɔna wayokondja atɛmɔdi wa kɔlamelo oma l’oshinga w’etshungwelo lo nshi yayaye?

⁹ Ngande wayokondja atɛmɔdi wa Jehowa wa kɔlamelo wahɔ oma l’oshinga w’etshungwelo lo nshi yayaye? Vɔ wayokondja lɔsɛnɔ la pondjo. Dui sɔ diayonga wolo nɛ di’anto wekɔ lo ntetemala la mvɔ. Koko, sangwelo dia Jehowa di’oma l’etatelo aki di’anto nsɛna pondjo pondjo. Otondonga Adama kosala pɛkato, tshike ndooko onto lotɔfɔnya dia lɔsɛnɔ laha l’ekomelo bu dui dia mɛtɛ. Ndo kaanga mbediɔ wolo nkanyiya dikambo dia lɔsɛnɔ la pondjo l’etena kɛnɛ, sho koka nsɛna pondjo pondjo, nɛ dia sho mbeyaka dia Jehowa akafute oshinga w’etshungwelo, mbuta ate lɔsɛnɔ l’Ɔnande.—Rɔmɔ 8:32.

10. Kakɔna kalongamɛ akitami ndo ɛkɔkɔ ekina?

¹⁰ Kaanga mbele lɔsɛnɔ la pondjo ekɔ ɔtshɔkɔ wayotokondja lo nshi yayaye, Jehowa nangaka dia sho nkana yimba lo dikambo dialɔ oma ko kakianɛ. Akitami wekɔ lo nkongɛɛ l’asolo walomɔlomɔ dia tɔsɛna l’olongo etena kayowolɛ nkɛtɛ kaamɛ la Kristo. (Ɛny. 20:6) Ɛkɔkɔ ekina wekɔ lo nongamɛ dia nsɛna lo paradiso ka la nkɛtɛ, lɛnɛ ahawatonga l’ekiyanu ndo l’asui. (Ɛny. 21:​3, 4) Onde wɛ ekɔ ɔmɔtshi la l’atei w’ɛkɔkɔ ekina wele l’elongamelo ka nsɛna lɔsɛnɔ laha l’ekomelo lanɛ la nkɛtɛ? Ndo ɔsɔ nto ekɔ difuto diele la nɛmɔ efula! Jehowa akatotonge dia sɛnaka la nkɛtɛ. Laasɔ, lɔsɛnɔ la pondjo la la nkɛtɛ layotosha ɔngɛnɔngɛnɔ wa mɛtɛ.

11-12. Naa ɛtshɔkɔ ɛmɔtshi wa lo paradiso wakokaso kanaka yimba lɔkɔ? (Enda ndo esato.)

¹¹ Ohokanyiya woho wayonga lɔsɛnɔ layɛ lo paradiso ka la nkɛtɛ. Wɛ hatonga l’ekiyanu waya oma lo hemɔ kana nyɔi. (Isa. 25:8; 33:24) Jehowa ayokotsha nsaki yele la yɛ tshɛ lo tshɛ. Kakɔna kayoyolanga mbeka? Onde awui wendana la Fizikɛ, Shimi, Mishiki, ko kana woho wa nsanga asango? Aha la taamu, tayotonga l’ohomba w’anto weya nsanga asango, ambiki wa mvudu ndo akambi wa dikambɔ. Ndo nto tayonga l’ohomba w’anto wayoyasha l’elimu wele oko monɛ diangɔ ndo dikokɛ, ntshula dihomɔ, nsala tojardɛ ndo tikokɛ. (Isa. 35:1; 65:21) Lam’ele wɛ ayɔsɛna pondjo, wɛ ayonga l’etena ka nsala awui asɔ tshɛ ndo awui akina efula.

¹² Ande ɔngɛnɔngɛnɔ wayonga la so lo nongola wakiso wa ngandji wakavu lee! (Ets. 24:15) Ohokanyiya nto ɔngɛnɔngɛnɔ wayonga la yɛ, dia mbeka akambo efula wendana la Jehowa lo nsɛdingola diangɔ diakandatonge! (Os. 104:24; Isa. 11:9) Kɛnɛ koleki tshɛ ele, tayonga l’ɔngɛnɔngɛnɔ wa tɛmɔlaka Jehowa nɛ dia hatotosalaka pɛkato nto pondjo! Onde wɛ ayolanga mengɔnya ɛtshɔkɔ wa lo nshi yayaye ɛsɔ “l’ɔngɛnɔngɛnɔ wa pɛkato wa tshanda mɔtshi tsho”? (Hɛb. 11:25) Ndooko kaanga yema! Ɛtshɔkɔ ɛsɔ ndeka kɛnɛ tshɛ kakokaso ndjahondja ɛlɔ kɛnɛ. Ohɔ dia paradiso ka la nkɛtɛ, hatongaka nshi tshɛ elongamelo ka lo nshi yayaye. Tɔ kayonga dikambo dia mɛtɛ mɛtɛ. Awui asɔ tshɛ totowonga otondongaka Jehowa kotoka ngandji k’efula lo nkimɔ Ɔnande oko olambo!

ƐNYA LOWANDO LAYƐ LO NGANDJI KA JEHOWA

13. Ngande wakokaso mɛnya lowando laso lo ngandji ka Jehowa? (2 Kɔrɛtɔ 6:1)

¹³ Ngande wakokaso mɛnya lowando laso le Jehowa lo woho wakandatosha oshinga w’etshungwelo? Lo mbetsha olimu ande lo dihole dia ntondo lo nsɛnɔ yaso. (Mat. 6:33) Laadiko dia laasɔ, Yeso akavu “diaha wanɛ wasɛna ntetemala nsɛna dikambo diawɔ vɔamɛ, koko wasɛnɛ dikambo dia ɔnɛ lakavu dikambo diawɔ ndo lakolɔ.” (2 Kɔr. 5:15) Lo mɛtɛ, hatokombola nshisha oyango wele l’ɔlɔlɔ waheyama mbɛdika wa Jehowa.—Adia 2 Kɔrɛtɔ 6:1.

14. Ngande wakokaso mɛnya mbetawɔ kaso l’ɛlɔmbwɛlɔ ka Jehowa?

¹⁴ Sho koka nto mɛnya lowando laso lo ngandji ka Jehowa lo monga la mbetawɔ lo ɛlɔmbwɛlɔ kande. Lo ngande? Etena kalangaso mbɔsa tɛdikɔ, ɛnyɛlɔ woho wa kalasa yalangaso mbɔtɔ kana woho w’olimu walangaso nkamba, sho pombaka nshihodia kɛnɛ kalanga Jehowa dia sho nsala. (1 Kɔr. 10:31; 2 Kɔr. 5:7) Etena kɛnyaso mbetawɔ kaso l’etsha, dui dia diambo mongaka, mbuta ate mbetawɔ kaso ndo diɔtɔnganelo diasaso la Jehowa ndekaka nkeketala. Elongamelo kaso keketalaka.—Rɔmɔ 5:​3-5; Jak. 2:​21, 22.

15. Ngande wakokaso mɛnya lowando laso lo nshi ya Eohwelo?

¹⁵ Ekɔ yoho kina nto yakokaso mɛnya lowando laso lo ngandji ka Jehowa. Yoho yakɔ ele lo nkamba la nshi ya Eohwelo nyɛ dia mɛnya Jehowa lowando laso l’ɔtɛ w’oshinga w’etshungwelo. Laadiko dia ndjaalɔngɔsɔla dia mbɔtɔ lo Eohwelo, sho koka mbelɛ anto akina dia ndjosangana la so. (1 Tim. 2:4) Lembetshiya wanɛ wayoyelɛ kɛnɛ kayosalema lo Eohwelo. Ayonga ohomba efula wɛ mbaɛnya vidɛo yele lo jw.org, yele l’ɔtɛ a dui ɔnɛ: Lande na kakavu Yeso? ndo Tohɔ nyɔi ka Yeso. Dikumanyi pombaka nkongɛ dia mbelɛ wanɛ wambɔla lo nyuma. Ohokanyiya ɔngɛnɔngɛnɔ wonga l’olongo ndo la nkɛtɛ etena kɔsa ɔkɔkɔ ɔmɔtshi wa Jehowa wakashishɔ yɛdikɔ ya nkalola lo lokoto! (Luka 15:​4-7) Lo Eohwelo, katosale la wolo diaha mbishana mɔyɔ paka lam’asaso koko djekoleko la wanɛ weke eyoyo kana wanɛ wambɔtɔka Eohwelo ambeta edja. Sho nangaka dia vɔ ndjaoka dia wakalongɔmi dimɛna!—Rɔmɔ 12:13.

16. Lande na kahombaso mfudia olimu aso lo nshi ya Eohwelo?

¹⁶ Onde wɛ hakoke ndeka ndjasha lo awui wa lo nyuma lo nshi ya Eohwelo? Nsala ngasɔ ekɔ yoho ya dimɛna ya mɛnya lowando laso lo kɛnɛ tshɛ kakasale Nzambi ndo Kristo lo dikambo diaso. Lam’ayototalekaka ndjasha l’olimu wa Jehowa, mbayototalekaka nkondja osukɔ ande ndo etombelo wayonga la dui sɔ ele wɛkamu aso le nde wayokeketala. (1 Kɔr. 3:9) Ndo nto, tetemala la wadielo wa Bible dikambo dia Eohwelo oko wɛnyamidiɔ lo Tɔsɛdingolake Afundelo lushi la lushi kana lo ekongelo katanema lo dikatshi dia losanganya. Wɛ koka kaanga nkamba l’avɛsa wa lo Bible asɔ dia nsala ekongelo ka wekelo.

17. Kakɔna kangɛnyangɛnya Jehowa? (Enda ndo kiombo yele l’ɔtɛ a dui ɔnɛ: “Toho takokaso mɛnya lowando laso lo ngandji ka Jehowa.”)

¹⁷ Aha la taamu, akambo wele la yɛ mbeyaka monga ko hawokosha diaaso dia nsala awui tshɛ wɔtɛkɛtami lo sawo nɛ. Ohɔka dia Jehowa hɛdika kɛnɛ koosalɛyɛ la kɛnɛ kawosalɛ anto akina; koko nde mɛnaka kɛnɛ kele l’otema ayɛ. Nde ngɛnangɛnaka efula etena kɛnande lowando lele la yɛ l’ɔtɛ wa woshasha wa nɛmɔ efula w’oshinga w’etshungwelo.—1 Sa. 16:7; Makɔ 12:​41-44.

18. Lande na keso la lowando le Jehowa Nzambi ndo le Yeso Kristo?

¹⁸ Paka l’ɔtɛ w’oshinga w’etshungwelo mbeso la diɛsɛ dia dimanyiyama pɛkato yaso, monga la lɔngɛnyi la dimɛna la Jehowa ndo monga l’elongamelo ka lɔsɛnɔ la pondjo. Totetemale mɛnya lowando laso lo ngandji ka Jehowa kakootshutshuya dia tosha ɛtshɔkɔ ɛsɔ tshɛ. (1 Jni. 4:19) Tɛnya lowando laso nto le Yeso, ɔnɛ lakatooke ngandji k’efula ndo lakakimɔ lɔsɛnɔ lande dikambo dia wahɔ aso!—Jni. 15:13.