“Nyɔsɔnɛ nyuamɛ . . . ɔnɛ layonyokambɛka”

1. Kakɔna kahombaso nsala dia monga l’ɔngɛnɔngɛnɔ wa mɛtɛ, ndo lande na? (Isaya 48:​17, 18)

SHƐSO lele l’olongo tolangaka efula ndo nde nangaka dia sho ngɛnangɛnaka la lɔsɛnɔ oma ko kakianɛ ndo lo nshi yayaye. (Ond. 3:​12, 13) Nde akatotonge l’akoka amɔtshi wa laande, koko nde kotosha dikoka dia ndjaalɔmbɔla kana dia ndjadjɛ ɛlɛmbɛ lo kɛnɛ kendana la ɔlɔlɔ la kɔlɔ. (Ond. 8:9; Jɛr. 10:23) Nde mbeyaka ɔnɛ dia sho monga l’ɔngɛnɔngɛnɔ wa mɛtɛ, sho pombaka mbokambɛ ndo nsɛna lo yoho yɔtɔnɛ l’ɛlɛmbɛ ande.—Adia Isaya 48:​17, 18.

2. Kakɔna kalanga Satana tetawoya ndo ngande wakakadimola Jehowa lo kashi kɛsɔ?

² Satana nangaka tetawoya dia sho koka monga l’ɔngɛnɔngɛnɔ aha paka l’ekimanyielo ka Jehowa ndo ɔnɛ anto koka ndjaalɔmbɔla vɔamɛ. (Eta. 3:​4, 5) Jehowa akakadimola lo kashi kɛsɔ lo mbetawɔ di’anto wakɔtɔmbɔkwɛ ndjaalɔmbɔla vɔamɛ l’etena kɛmɔtshi. Ekɔ wɔdu mɛna dia ɛlɔmbwɛlɔ k’ana w’anto kambokita tatala. Otshikitanyi l’anto amɔtshi wayalɔmbɔla vɔamɛ, Bible shilaka nkombo y’apami ndo ya wamato wakonge la lɔsɛnɔ l’ɔngɛnɔngɛnɔ l’ɔtɛ wakawayasha l’olimu wa Jehowa. Yeso Kristo ekɔ ɔmɔtshi l’atei w’anto asɔ. Ntondotondo, nyɛsɔ tɔsɛdingole ɛkɔkɔ wakootshutshuya dia nsɔna dia kambɛ Jehowa. Oma laasɔ, tayɔsɛdingola lande na kahombaso ntɛmɔla Jehowa. Ndo l’ekomelo, tayoyɔsɛdingola ɛkɔkɔ ɛmɔtshi watotshutshuya dia nsɔna dia kambɛ Jehowa.

LANDE NA KAKASƆNƐ YESO DIA KAMBƐ JEHOWA?

3. Satana akandɛnya Yeso ndo ɔsɔnwɛlɔ akɔna wakasale Yeso?

³ Lam’akinde la nkɛtɛ, Yeso akahombe nsɔna onto lakandahombe kambɛ. Yema tshitshɛ l’ɔkɔngɔ wa Yeso batizama, Satana akawɛnya waolelo tshɛ wa la nkɛtɛ dia mboshawɔ naka nde nsala tshelo tshɔi ya tshitshɛ ya mbɔtɛmɔla. Yeso akokadimola ate: “Satana, mɔ! Nɛ dia akafundama ate: ‘Jehowa Nzambi kayɛ kahombayɛ ntɛmɔla ndo paka ndamɛ oto kahombayɛ kambɛ olimu w’ekila.’” (Mat. 4:​8-10) Lande na kakasale Yeso ɔsɔnwɛlɔ ɔsɔ? Nyɛsɔ tɔsɛdingole ɔkɔkɔ ɔmɔtshi wakootshutshuya dia nsala ɔsɔnwɛlɔ ɔsɔ.

4-5. Naa ɛkɔkɔ ɛmɔtshi wakatshutshuya Yeso dia nsɔna dia kambɛ Jehowa?

⁴ Ɔkɔkɔ wa ntondo wakatshutshuya Yeso dia nsɔna dia kambɛ Jehowa ele ngandji k’efula kakandokaka She. (Jni. 14:31) Ndo nto, Yeso akasɔnɛ dia kambɛ Jehowa nɛ dia nde akeyaka dia ɔsɔ aki dui dia dimɛna dia nde nsala. (Jni. 8:​28, 29; Ɛny. 4:11) Nde akeyaka dia Jehowa mbele Kiɔkɔ ya lɔsɛnɔ, onto lakokaso mbɛkɛ otema ndo ɔnɛ Nde ekɔ la lokaho. (Os. 33:4; 36:9; Jak. 1:17) Jehowa akatɛka Yeso nshi tshɛ akambo wa mɛtɛ ndo kɛnɛ tshɛ kaki la Yeso, nde mbakawosha. (Jni. 1:14) Otshikitanyi la Jehowa, Satana akatela nyɔi. Satana ekɔ kanga kashi, ekɔ la lokaki ndo nyangaka paka wahɔ ande hita. (Jni. 8:44) L’akambo asɔ tshɛ lo yimba, Yeso kosombɔ kaanga yema dia mbokoya Satana dia tɔmbɔkwɛ Jehowa.—Flpɛ. 2:​5-8.

⁵ Ɔkɔkɔ okina wakatshutshuya Yeso dia nsɔna dia kambɛ Jehowa ele, nde akakaka washo lo etombelo w’amɛna wakakoke monga l’olimu ande wa kɔlamelo. (Hɛb. 12:2) Yeso akeyaka ɔnɛ naka nde ntshikala la kɔlamelo le Jehowa, kete nde ayokidia lokombo la She ndo ayosala dia nɔngɔsala asui tshɛ wakela Diabolo.

LANDE NA KAHOMBASO NTƐMƆLA PAKA JEHOWA?

6-7. Lande na kele anto efula hawokambɛ Jehowa ɛlɔ kɛnɛ, ndo lande na kahombaso mbɔtɛmɔla?

⁶ Ɛlɔ kɛnɛ, anto efula tonaka kambɛ Jehowa l’ɔtɛ wahaweye waonga ande w’amɛna ndo l’ɔtɛ wahawashihodia kɛnɛ tshɛ kakandawasalɛ. Mɛtɛ ka dikambo sɔ kakɛnama le anto wakasambishama oma le ɔpɔstɔlɔ Pɔɔlɔ l’Atɛna.—Ets. 17:​19, 20, 30, 34.

⁷ Pɔɔlɔ akalembetshiya ampokami ande ate: Nzambi ka mɛtɛ “kasha anto tshɛ lɔsɛnɔ, lomu ndo diangɔ tshɛ.” Nde akakotsha ate: “Nɛ dia oma le nde mbeso la lɔsɛnɔ, mbakɛndakɛndaso ndo mbeso lo andja ɔnɛ.” Nzambi ekɔ Otungi ‘lakatonge anto wa lo wedja tshɛ.’ Ɔnkɔnɛ, nde sunganaka tɛmɔma.—Ets. 17:​25, 26, 28.

8. Kakɔna kahasalaki Jehowa pondjo ndo ngande wakandɛnya ngandji k’efula katokande?

⁸ Oko wende Otungi ndo Nkum’Olongo kaheme laadiko dia tshɛ, Jehowa hatshutshuya anto dia mbokambɛ ndo nde hasalaki dui sɔ pondjo. Lo dihole dia nsala ngasɔ, nde tɛnyaka tolembetelo tatoshikikɛ dia nde ekɔ ndo tolangaka l’onto ndo l’onto. Nde nangaka di’anto efula monga angɛnyi ande pondjo pondjo. (1 Tim. 2:​3, 4) Ndo l’ɔtɛ ɔsɔ, Jehowa akatolowanya dia mbetsha anto akina sangwelo diande ndo mbatɛ awui w’amɛna wayondosalɛ anto lo nshi yayaye. (Mat. 10:​11-13; 28:​19, 20) Nde akatokongɛ lo tshumanelo dia sho mbɔtɛmɔlaka ndo nongolaka ekimanyielo k’oma le dikumanyi la ngandji tshɛ.—Ets. 20:28.

9. Lo toho takɔna takɛnya Jehowa ngandji kokande anto?

⁹ Ngandji ka Jehowa kahadjama anya mɛnamaka lo woho wasalɛnde anto wele bu la mbetawɔ le nde akambo. Tɔsɛdingole akambo anɛ: L’edja k’ɔkɔndɔ w’ana w’anto, miliyɔ y’anto wakasɔnɛ dia nsɛna lo ndjela atɔndɔ awɔ wendana la kɛnɛ kele ɔlɔlɔ la kɛnɛ kele kɔlɔ. Kaanga mbediɔ ngasɔ, Jehowa akawasha kɛnɛ kaki la wɔ ohomba dia ngɛnangɛna la lɔsɛnɔ lanɛ la nkɛtɛ. (Mat. 5:​44, 45; Ets. 14:​16, 17) Jehowa akawasha dikoka dia vɔ mbokana ngandji lam’asawɔ, monga la nkumbo ndo nkondja wahɔ oma l’olimu awɔ wa wolo. (Os. 127:3; Ond. 2:24) Mbokɛmaka hwe dia Shɛso lele l’olongo mbokaka weho w’anto tshɛ ngandji. (Eto. 34:6) Kakianɛ, nyɛsɔ tɔsɛdingole ɛkɔkɔ watotshutshuya dia nsɔna dia kambɛ Jehowa ndo tende woho watofutande l’ɔtɛ wa dikambo sɔ.

LANDE NA KASƆNASO DIA KAMBƐ JEHOWA?

10. a) Naa ɔkɔkɔ wa ntondo watotshutshuya dia kambɛ Jehowa? (Mateo 22:37) b) Wahɔ akɔna wakayakondja oma lo solo dia lotutsha dia Jehowa? (Osambo 103:​13, 14)

¹⁰ L’ɛnyɛlɔ ka Yeso, ɔkɔkɔ wa ntondo watotshutshuya dia kambɛ Jehowa ele, ngandji k’efula kawokaso. (Adia Mateo 22:37.) Sho ndjaokaka suke la Jehowa etena kekaso waonga ande. Ɛnyɛlɔ, tɔsɛdingole woho watɛnya Jehowa solo dia lotutsha. Etena kakɔɔtɔmbɔkwɛ ana w’ase Isariyɛlɛ, Jehowa akaasɛngasɛnga ate: “Lam’alanganyu, nyokalole oma lo mboka yanyu ya kɔlɔ.” (Jɛr. 18:11) Jehowa mbohɔka dia tekɔ anto wele keema kokele ndo ɔnɛ tekɔ ditshu. (Adia Osambo 103:​13, 14.) Etena kakanayɛ yimba lo solo dia lotutsha dia Jehowa ndo lo waonga ande akina w’amɛna, onde kɛsɔ hakotshutshuya dia mbokambɛ pondjo pondjo?

11. Naa ɛkɔkɔ ekina watokonya dia nsɔna dia kambɛ Shɛso lele l’olongo?

¹¹ Sho sɔnaka nto dia kambɛ Jehowa nɛ dia ɔsɔ ekɔ dui dia dimɛna le so. (Mat. 4:10) Laadiko dia laasɔ, sho mbeyaka di’olimu aso wa kɔlamelo wayonga l’etombelo w’amɛna. Kɔlamelo yaso kimanyiyaka dia nkidia lokombo la Jehowa, dia mɛnya ɔnɛ Diabolo ekɔ kanga kashi ndo dia ngɛnyangɛnya otema wa Shɛso. Ndo naka sho nsɔna dia kambɛ Jehowa ɛlɔ kɛnɛ, kete tayonga la diɛsɛ dia mbokambɛka pondjo pondjo!—Jni. 17:3.

12-13. Wetshelo akɔna wambotokondja oma lo kɛnɛ kakakomɛ Jane nde la Pam?

¹² Oma ko etena kekeso akɛnda, sho koka mɛnya ngandji k’efula kokaso Jehowa ndo ngandji kɛsɔ kayotafulaka etena katatole. Tɔsɛdingole kɛnɛ kakakomɛ akadiyɛso ahende welɛwɔ Jane nde la Pam.a Jane aki l’ɛnɔnyi 11 ndo Pam aki l’ɛnɔnyi 10 etena kakawatatɛ mbeka Bible. Kaanga kele ambutshi awɔ konangaka wekelo awɔ wa Bible, vɔ wakayosha Jane nde la Pam lotshungɔ la mbeka Bible l’Ɛmɛnyi wa Jehowa koko paka naka vɔ ketawe nto dia tshɔɔka l’ambutshi awɔ l’ɔtɛmwɛlɔ lo wikɛndɛ. Jane mbutaka ate: “Kɛnɛ kakambetsha Ɛmɛnyi wa Jehowa oma lo Bible kakakimanyiya dia nshika tanga la ntondo ka tɔsɛngiya t’asekami tendana la nnɔ didjoyadjoya ndo nsala awui wa mindo oko wakasalaka asekami amɔtshi wa la kalasa.”

¹³ L’ɔkɔngɔ w’ɛnɔnyi engana, vɔ ahende wakakome apandjudi wa Diolelo. L’ɔkɔngɔ diko, vɔ wakayokambaka olimu w’ombatshi mboka ko l’etena kakɔ kaamɛ wakotsha ehomba w’ambutshi awɔ waya esombe. Jane mbutaka ate: “Etena kakanaso yimba lo kɛnɛ kakatokomɛ, lakashihodia dia Jehowa kokɛka angɛnyi ande wa kɔlamelo oko wata 2 Timɔte 2:19 ɔnɛ: ‘Jehowa mbeyaka anto ande.’” Aha la taamu, Jehowa kokɛka wanɛ wasɔna dia mbooka ngandji ndo mbokambɛ!

14. Ngande wamɛso lokombo la Jehowa? (Enda ndo esato.)

¹⁴ Sho nangaka nkimanyiya anto akina dia vɔ mbeya akambo wa mɛtɛ wendana la Jehowa. Tɔsɛdingole dikambo nɛ: Tɔshi dia wɛ ekɔ l’ɔngɛnyi w’ɔlɔlɔ, wele la lokaho ndo wadimanyiyana. Lushi lɔmɔtshi, wɛ amboka di’anto amɔtshi wekɔ lo ntɛkɛta kɔlɔ lo dikambo diande, wata ɔnɛ nde ekɔ epetenge ndo ekɔ la lokeso. Kakɔna kayoyosala? Aha la taamu, wɛ ayamɛ lokombo lande. Woho akɔ waamɛ mbele, Satana la wanɛ wele l’ɛse k’ɛlɔmbwɛlɔ kande salaka la wolo dia mpandjola lokumu la kɔlɔ lo dikambo dia Jehowa. Sho mamɛka lokombo la Jehowa lo mbutɛka anto akina akambo wa mɛtɛ wendana la Nde ndo lo mamɛka lokombo Lande la wolo tshɛ. (Os. 34:1; Isa. 43:10) Sho mɛnyaka dia sho nangaka kambɛ Jehowa la tshondo tshɛ, oma lo ɛtɛkɛta ndo oma l’etsha aso.

15. Wahɔ akɔna wakakondja ɔpɔstɔlɔ Pɔɔlɔ lo woho wakandasale etshikitanu lo lɔsɛnɔ lande? (Filipɛ 3:​7, 8)

¹⁵ Tekɔ suke dia nsala etshikitanu lo lɔsɛnɔ laso l’oyango wa kambɛ Jehowa ndo nsala akambo efula l’olimu ande. Ɛnyɛlɔ, ɔpɔstɔlɔ Pɔɔlɔ aketawɔ ntshika dihole dia lokumu diaki la nde l’ɔtɛmwɛlɔ w’ase Juda l’oyango wa ndjela Kristo ndo kambɛ Jehowa. (Ngal. 1:14) Etombelo waki la dui sɔ ele, nde akatshɔkwama efula lo lɔsɛnɔ lande ndo akakondja ɔkɛndɛ wa tolɛ kaamɛ la Yeso l’olongo. Nde konyanga l’ɔtɛ wa yɛdikɔ yakandɔshi ya kambɛ Jehowa ndo sho lawɔ hatonyangaki pondjo.—Adia Filipɛ 3:​7, 8.

16. Wetshelo akɔna wambotokondja oma l’ɛnyɛlɔ ka Julia? (Enda ndo esato.)

¹⁶ Naka sho ndjasha lo kambɛ Jehowa, kete sho koka tshɔkwama oma ko kakianɛ ndo ndjokondja lɔsɛnɔ la pondjo lo nshi yayaye. Nyɛsɔ tɔsɛdingole kɛnɛ kakakomɛ kadiyɛso kelɛwɔ Julia. La ntondo ka nde ndjeeka Bible, nde akembaka l’ɔtɛmwɛlɔ awɔ oma ko etena kakinde eke dikɛnda. Ombeyi ɔmɔtshi w’awui wendana la mishiki akɛnyi diewo dia Julia ndo akoolowanya. Kombeta edja, Julia akayokomaka omembi waki la lokumu l’ahole efula ndo akembaka esambo w’amɛna l’ahole wa lokumu wotshikitanyi. Etena kakandɔtɔka kalasa yetshawɔ woho wa memba, osekande ɔmɔtshi la la kalasa akatatɛ nsawola la nde awui wendana la Nzambi ndo akoolembetshiya dia lokombo la Nzambi ele Jehowa. Oshimu kele edja, Julia akayotatɛka mbeka Bible mbala hiende lo lomingu. L’ɔkɔngɔ diko, nde akayɔsaka yɛdikɔ ya kambɛ Jehowa lo dihole dia ntetemala la kalasa ka mishiki. Komonga ɔtɔmbɔ l’esɔ le nde dia mbɔsa yɛdikɔ shɔ. Nde mbutaka ate: “Anto efula wakatatɛ mɔnyɔlami lo woho wakamatshike losha lami la memba esambo l’oyango wa kambɛ Jehowa, koko lakalangaka nkamba la lɔsɛnɔ lami l’otondo dia kambɛ Jehowa.” Ngande wayaokande ɛlɔ kɛnɛ lo kɛnɛ kendana l’ɛsɔnwɛlɔ wakandasale ambeta ɛnɔnyi ndekana 30? Nde kotshaka ate: “Lekɔ la wɔladi wa lo yimba ndo lekɔ l’eshikikelo dia Jehowa ayokotsha nsaki tshɛ y’otema ami lo nshi yayaye.”—Os. 145:16.

TETEMALA KAMBƐ JEHOWA

17. Shɛngiya yakɔna yele la woho wamboleka nsukana ekomelo ka dikongɛ nɛ di’akambo le wanɛ wakasɔnɛ dia kambɛ Jehowa ndo le wanɛ wahatasɔnɛ dia mbokambɛ?

¹⁷ Tekɔ lo nsɛna l’etena k’ekomelo ka dikongɛ nɛ di’akambo. Ɔpɔstɔlɔ Pɔɔlɔ akafunde ate: “Keema edja, kete ‘ɔnɛ layaye ayokoma ndo nde hatotshimbatshimba.’” (Hɛb. 10:37) Shɛngiya yakɔna yele la ɛtɛkɛta ɛnɛ le so? Dui ɔtɔi dieyaso ele, etena kambotshikala k’anto nsɔna dia kambɛ Jehowa kaya mondo. (1 Kɔr. 7:29) Ndo naka tambɔsɔnaka dia kambɛ Nzambi, kete sho pombaka mbeya dia kaanga mbayotohomba mbikikɛ ehemba, vɔ wayangashila “keema edja.”

18. Kakɔna kalanga Jehowa la Yeso dia sho nsala?

¹⁸ Yeso akakeketsha ambeki ande aha tsho dia ntatɛ mboyela, koko dia ntetemala mboyela. (Mat. 16:24) Toyashikikɛ diaha mpekɔ oyadi edja ka ngande kambotokambɛ Jehowa. Sho pombaka nkamba wolo ndo ntetemala nsɛna lo ndjela yɛdikɔ yakatɔshi ya mbokambɛ. Mbeyaka monga ko bu ɔtɔmbɔ l’esɔ dia nsala ngasɔ, koko tayokondja ɛtshɔkɔ ndo ɔngɛnɔngɛnɔ w’efula oma ko kakianɛ ndo lo nshi yayaye, lɔsɛnɔ la pondjo naka sho mbokambɛ.—Os. 35:27.

19. Wetshelo akɔna wambotokondja oma lo kɛnɛ kakakomɛ Gene?

¹⁹ Anto amɔtshi fɔnyaka dia kambɛ Jehowa nɔmbaka ndjahondja awui efula. Naka wɛ ekɔ ɔlɔngɔlɔngɔ, onde wɛ ayɔsa diele oko wɛ amboshisha ɛngɔ kɛmɔtshi k’ohomba naka wɛ kambɛ Jehowa? Ɔnangɛso ɔmɔtshi l’ɔlɔngɔlɔngɔ lelɛwɔ Gene mbutaka ate: “Lakafɔnyaka dia monga Ɔmɛnyi wa Jehowa ekɔ oko onto lele lo shasa. Akɛnamaka dia ana wakayolaka kaamɛ la mi wakangɛnangɛnaka la lɔsɛnɔ lo ntshɔ lo waa fɛtɛ, lo monga l’eseka, lo nkɛnya tɔkɛnyɔ ta lo tovidɛo ta ngala, etena kele dimi laketshaka wenya lo nsanganya ndo l’olimu w’esambishelo.” Shɛngiya yakɔna yaki l’ekanelo ka yimba ka ngasɔ le Gene? Nde mbutaka ate: “Lakayotatɛka monga la lɔsɛnɔ la dungi pende ndo lakayoyashaka l’ɛngɛnɔngɛnɔ kaamɛ l’asekami. Koko, kɛsɔ kombishami ɔngɛnɔngɛnɔ wa mɛtɛ. Lakayotatɛka nkana yimba lo ɛtshɔkɔ wakondjaso lo nkamba la kɛnɛ kata Bible ndo lakayɔsaka yɛdikɔ ya kambɛ Jehowa nto l’otema ɔtɔi. Oma laasɔ, lakayɛnaka dia Jehowa akakadimola alɔmbɛlɔ ami tshɛ.”

20. Kakɔna kahombaso ndjashikikɛ dia nsala?

²⁰ Omembi w’esambo akembɛ Jehowa ate: “Ɔngɛnɔngɛnɔ le ɔnɛ lasɔnayɛ ndo lelayɛ suke dia mbidjasɛ lo asɛkɛ ayɛ.” (Os. 65:4) Laasɔ, sho koka ndjashikikɛ dia ntetemala kambɛ Jehowa. Oko Jashua, sho koka mbuta ɔnɛ: “Dimi l’ase luudu lami tayokambɛka Jehowa.”—Jas. 24:15.