SAWO DIA WEKELO 17
OSAMBO 99 Nunu la nunu di’anangɛso
Sho keema opoko
“Dimi layokokimanyiya.”—ISA. 41:10.
KƐNƐ KAYOTEKA
Tayɛna toho tɔnɛi tatokimanyiya Jehowa ɛlɔ kɛnɛ.
1-2. a) Lande na kakokaso mbuta dia sho keema opoko etena kahomanaso l’ehemba? b) Kakɔna kayotɔsɛdingola lo sawo nɛ?
ETENA kahomanaso l’ekakatanu wa wolo, sho koka ndjaoka oko onto lele ndamɛ l’okonda wa woke ko hayeya woho wa ntomba. Koko etena kahomanaso l’ehemba, sho keema opoko. Shɛso lele l’olongo hɛnyi tsho ekakatanu aso koko nde tolakaka dia tokimanyiya. Jehowa shikikɛka ekambi ande wa kɔlamelo ate: ‘Dimi layonyokimanyiya.’—Isa. 41:10.
2 Lo sawo nɛ, tayɔsɛdingola woho watokimanyiya Jehowa 1) lo tɔlɔmbɔla, 2) lo tokotshɛ ehomba aso, 3) lo tokokɛ ndo 4) lo tosamba. Jehowa toshikikɛka dia oyadi woho w’ohemba akɔna tshɛ wayohomana la so lo lɔsɛnɔ, nde hatohɛki ndo hatokalɛki pondjo. Ɔnkɔnɛ, sho keema opoko.
JEHOWA TƆLƆMBƆLAKA
3-4. Ngande watɔlɔmbɔla Jehowa? (Osambo 48:14)
3 Adia Osambo 48:14. Jehowa halongamɛ dia sho ndjaalɔmbɔla. Ko ngande walɔmbɔlande atɛmɔdi ande wa kɔlamelo ɛlɔ kɛnɛ? Yoho mɔtshi yasalande dui sɔ ele lo tshimbo ya Bible. (Os. 119:105) Lo tshimbo y’Ɔtɛkɛta ande wakasambiyama, Jehowa tokimanyiyaka dia mbɔsa tɛdikɔ t’amɛna ndo dia nkɛnɛmɔla waonga wayotokimanyiya dia monga l’ɔngɛnɔngɛnɔ kakianɛ ndo lo nshi yayaye lɔsɛnɔ la pondjo.a Ɛnyɛlɔ, nde tetshaka woho wa dimanyiyanaka ndo waha mombanɛ tokumbɛkumbɛ, monga la losembwe lo dui tshɛ diasalaso ndo mboka anto akina ngandji k’oma k’ɛse otema. (Os. 37:8; Hɛb. 13:18; 1 Pe. 1:22) Etena kakɛnɛmɔlaso waonga w’amɛna asɔ, sho komaka ambutshi w’eshika, elonganyi w’eshika ndo angɛnyi w’eshika.
4 Ndo nto, lo Bible Jehowa tosholɛka anto amɔtshi wakahomana l’ehemba wele oko waso ndo waki la nsaki yele oko yaso. (1 Kɔr. 10:13; Jak. 5:17) Etena kadiaso ɛkɔndɔ wa mɛtɛ ɛsɔ ndo kakambaso la wetshelo wakondjaso oma lɔkɔ, sho kondjaka wahɔ lo toho tohende. Yoho ya ntondo, sho shihodiaka dia sho keema opoko nɛ dia anto akina wakahomana l’ekakatanu wa woho akɔ wamɛ ndo wakakikɛ ekakatanu akɔ. (1 Pe. 5:9) Ndo yoho ya hende, sho mbekaka woho wa ntondoya ekakatanu aso.—Rɔmɔ 15:4.
5. Anto akɔna wakamba la Jehowa dia tɔlɔmbɔla lo mboka ka lɔsɛnɔ?
5 Jehowa kambaka nto l’anangɛso l’akadiyɛso dia tɔlɔmbɔla.b Ɛnyɛlɔ, emendji w’etshimbedi membolaka tshumanelo diaso mbala la mbala dia tokeketsha. Asawo awɔ keketshaka mbetawɔ kaso ndo tokimanyiyaka dia nama kaamɛ kaso. (Ets. 15:40–16:5) Dikumanyi dia l’etshumanelo diɔ lawɔ mbidjaka welo wa l’otema ɔtɔi dia nkimanyiya opandjudi tshɛ dia ntshikala suke la Jehowa. (1 Pe. 5:2, 3) Ambutshi mbetshaka anawɔ dia mboka Jehowa ngandji, mbɔsa tɛdikɔ t’amɛna ndo monga la mbekelo y’amɛna. (Tok. 22:6) Ndo Akristo wa wamato w’epalanga wambotshunda lo nyuma kimanyiyaka akadiyɛso w’esekaseka oma lo ɛnyɛlɔ kawɔ ka dimɛna, lo mbasha alako w’eshika ndo lo mbakeketsha.—Tito 2:3-5.
6. Kakɔna kahombaso nsala dia nkondja wahɔ oma lo ɛlɔmbwɛlɔ ka Jehowa?
6 Jehowa akatosha kɛnɛ tshɛ keso l’ohomba dia mbɔsa tɛdikɔ t’amɛna ndo monga la lɔsɛnɔ l’ɔngɛnɔngɛnɔ. Ngande wakokaso mɛnya lowando lo kɛnɛ kakasale Jehowa lo dikambo diaso? Tokedi 3:5, 6 mbutaka ɔnɛ: “Yaɛkɛ le Jehowa la otema ayɛ tshɛ, tɛkamake yimba yayɛ hita.” Naka sho nsala ngasɔ, kete ‘nde ayotosembolɛ ɛsɛsɛ aso,’ mbuta ate nde ayotokimanyiya dia mbewɔ ekakatanu ndo monga la lɔsɛnɔ l’ɔngɛnɔngɛnɔ. Ande lowando lele la so lo woho watosha Jehowa ekimanyielo ka la ngandji tshɛ ndo alako w’amɛna lee!—Os. 32:8.
JEHOWA TOKOTSHƐKA EHOMBA ASO
7. Lo toho takɔna tɔmɔtshi tatokotshɛ Jehowa ehomba aso? (Filipɛ 4:19)
7 Adia Filipɛ 4:19. Laadiko dia tɔlɔmbɔla lo nyuma, Jehowa tshɔkɔlaka welo wadjaso dia nkondja mbo ya ndɛ, ahɔndɔ wa ndɔta ndo dihole dia ndala. (Mat. 6:33; 2 Tɛs. 3:12) Kaanga mbele keema kɔlɔ ndjaakiyanya dikambo di’ehomba aso wa l’emunyi, Jehowa tokeketshaka diaha sho ndeka ndjaakiyanya lo dikambo di’awui asɔ. (Enda nɔtɛ ka wekelo ka lo Mateo 6:25 lo Falase.) Lande na? Nɛ dia Shɛso hakalɛki pondjo atɛmɔdi ande wa kɔlamelo etena kewɔ lo dihombo. (Mat. 6:8; Hɛb. 13:5) Sho koka ndjaɛkɛ le nde tshɛ lo tshɛ etena katande dia nde ayokotsha ehomba aso.
8. Kakɔna kakasalɛ Jehowa Davidɛ?
8 Tɔsɛdingole woho wakakimanyiya Jehowa Davidɛ. Lo etena kakatalawɔka Davidɛ nkumekanga Saolo, Jehowa akakotshaka ehomba ande ndo w’apami ande dia vɔ ntshikala la lɔsɛnɔ. Lo nkana yimba lo woho wakookokɛ Jehowa l’edja k’ɛnɔnyi, Davidɛ akafunde ate: “Dimi laki dikɛnda ndo wonya ɔnɛ laya osombe, koko dimi talɛnaka onto ɔlɔlɔ akalema, kana anande walɔmbana mbo ya ndɛ.” (Os. 37:25) Ondo oko Davidɛ, wɛ lawɔ ambɛnaka woho wakakotsha Jehowa ehomba ayɛ la ngandji tshɛ kana ehomba wa anangɛyɛ l’akadiyɛyɛ lo tena dia wolo.
9. Ngande wakotsha Jehowa ehomba w’ekambi ande ɛlɔ kɛnɛ etena kahomanawɔ la mpokoso? (Enda ndo esato.)
9 Jehowa kotshaka nto ehomba w’ekambi ande etena kahomanawɔ la mpokoso. Ɛnyɛlɔ lo ntambe ka ntondo, etena kaki ndjala ka kasha la Jɛrusalɛma, anangɛwɔ w’oma lo esomba wotshikitanyi wakaatomɛ kɛnɛ kaki la wɔ ohomba. (Ets. 11:27-30; Rɔmɔ 15:25, 26) Ɛlɔ kɛnɛ, ekambi wa Nzambi kɛnɛmɔlaka woho wa yimba yakɔ yaamɛ ya lokaho. Etena katomba mpokoso, la ngandji tshɛ Jehowa tshutshuyaka ekambi ande dia nkimɔ mbo ya ndɛ, ashi, ahɔndɔ ndo ekanga le anto wa lo ɛtshi ka nkɛtɛ kakahomana la mpokoso. Elui wa wokelo nɔngɔsɔlaka mvudu yawɔ yakalana ndo Mbalasa ya Diolelo. Ndo ekambi wa Jehowa mongaka suke dia mbisha ekimanyielo ka lo yimba ndo ka lo nyuma dia nsukɛ wanɛ wakashisha mvudu yawɔ kana wakiwɔ wa ngandji.c
Ngande watosamba Jehowa etena kahomanaso la mpokoso? (Enda odingɔ 9)e
10-11. Wetshelo akɔna wakondjayɛ oma lo kɛnɛ kakakomɛ Borys?
10 Jehowa kotshaka nto la lokaho tshɛ ehomba ndo wa wanɛ wele watonge atɛmɔdi ande. Woho akɔ waamɛ mbele, sho nyangaka waaso wa monga ɔlɔlɔ ndo le wanɛ wahatɛmɔla Jehowa kaamɛ la so. (Ngal. 6:10) Etena kasalaso dui sɔ, sho mbeyaka nkimanyiya anto efula dia mbeka akambo wendana la Jehowa. Tɔsɛdingole kɛnɛ kakakomɛ Borys ladjasɛ l’Ukraine, lele owandji wa kalasa kɛmɔtshi. Kaanga mbele Borys bu Ɔmɛnyi wa Jehowa, nde akasalɛka ambeki ande wele Ɛmɛnyi akambo l’ɔlɔlɔ tshɛ ndo nde akalɛmiyaka waetawɔ awɔ. Etena kakɔshi Borys yɛdikɔ ya ndawɔ ta diakalɔmaka lo dihole diakandadjasɛka ndo dia ntshɔ lo dihole dikina dia lo wodja lɛnɛ aki kɔndɔmaka ta, anangɛso wakookimanyiya. Oma laasɔ, Borys akayɔtɔka lo Eohwelo ka nyɔi ka Kristo. Lo menda kɛnɛ kakookomɛ, Borys akate ate: “Ɛmɛnyi wa Jehowa wakayasha le mi ndo wakakimanyiya. Lekɔ la lowando l’efula le wɔ.”
11 Sho lawɔ koka mbokoya Shɛso lele l’olongo lele la kɛtshi lo nkimanyiya wanɛ wele lo dihombo, oyadi vɔ bu la so dietawɔ ɔtɔi. (Luka 6:31, 36) Tekɔ l’elongamelo dia welo wadjaso dia nkimanyiya anto akina ayowakimanyiya dia nkoma ambeki wa Kristo. (1 Pe. 2:12) Koko oyadi etombelo akɔna wayonga la dui sɔ, tayonga l’ɔngɛnɔngɛnɔ w’efula waya lo mbisha.—Ets. 20:35.
JEHOWA TOKOKƐKA
12. Ngande wayokokɛ Jehowa ekambi ande oko olui? (Osambo 91:1, 2, 14)
12 Adia Osambo 91:1, 2, 14. Ɛlɔ kɛnɛ, Jehowa tolakaka dia tosha ekokelo ka lo nyuma. Nde hetawɔki pondjo dia Satana ndanya ɔtɛmwɛlɔ wa mɛtɛ. (Jni. 17:15) Ndo etena kayotatɛ “mfɔnu ka woke,” sho koka monga l’eshikikelo ɔnɛ Jehowa ayokotsha daka diande dia nkokɛ ekambi ande aha tsho lo nyuma koko ndo lo demba.—Ɛny. 7:9, 14.
13. Lo toho takɔna tatokokɛ Jehowa l’onto ndo l’onto?
13 Ngande watokokɛ Jehowa l’onto ndo l’onto? Lo tshimbo ya Bible, Jehowa tokimanyiyaka dia nshihodia ɔlɔlɔ la kɔlɔ. (Hɛb. 5:14) Etena kasɛnaso lo ndjela atɔndɔ watanema l’Ɔtɛkɛta wa Nzambi, sho ndjaakokɛka oma lo waale wa lo nyuma ndo wa lo demba. (Os. 91:4) Ndo nto, Jehowa tokokɛka lo tshimbo y’etshumanelo. (Isa. 32:1, 2) Lo monga kaamɛ la wanɛ wooka Jehowa ngandji ndo wasɛna lo ndjela atɔndɔ ande, sho keketshamaka ndo kimanyiyamaka dia nshika tanga la ntondo ka tɔsɛngiya ta kɔlɔ.—Tok. 13:20.
14. a) Lande na ketawɔ Nzambi dia sho mpomana l’ehemba? b) Eshikikelo kakɔna katanaso lo Osambo 9:10? (Enda ndo nɔtɛ.)
14 L’etena kɛmɔtshi lo nshi yakete, Jehowa akakokɛ atɛmɔdi ande oma le anto wakalange mbasalɛ kɔlɔ kana mbadiaka. Koko, nde kosalaka ngasɔ l’oseka dikambo tshɛ. Tena dimɔtshi, sho pomanaka la “awui wa shashimoya.” (Ond. 9:11) Ndo nto, oma ko nshi y’edjedja, Jehowa aketawɔ di’ekambi ande mpomana l’ɔlɔshamelo ndo kaanga ndjakema dia mɛnya dia Satana ekɔ kanga kashi. (Jɔbɔ 2:4-6; Mat. 23:34) Dui sɔ koka komɛ ekambi wa Nzambi ɛlɔ kɛnɛ. Kaanga mbahotonyɛ Jehowa ehemba, sho koka monga l’eshikikelo dia nde hakalɛki pondjo wanɛ wawoka ngandji.d—Os. 9:10.
JEHOWA TOSAMBAKA
15. Ngande watosamba dɔmbɛlɔ, Ɔtɛkɛta wa Nzambi ndo asekaso Akristo? (2 Kɔrɛtɔ 1:3, 4)
15 Adia 2 Kɔrɛtɔ 1:3, 4. Lo tena dimɔtshi, sho mongaka la lɔkɔnyɔ, la ekiyanu kana la lonyangu. Ondo wɛ ekɔ la dikambo dimɔtshi nshi nyɛ diakokiyanya ndo diakokonya dia wɛ ndjaoka opoko. Onde ekɔ onto ɔmɔtshi lashihodia woho wayaokayɛ? Aha la taamu, Jehowa shihodiaka. Nde hashihodia tsho ɔkɛyi aso, koko nde “[tosambaka] lo asui aso tshɛ.” Lo woho akɔna? Etena kalɔmbaso Jehowa, nde toshaka “wɔladi wa Nzambi woleki tokanyi tshɛ.” (Flpɛ. 4:6, 7) Sho sambemaka nto etena kadiaso lo Bible ɛtɛkɛta wa Jehowa oya le so. Lɔkɔ, Jehowa totɛka woho watookande ngandji, tetshaka woho wa monga la lomba ndo toshaka elongamelo. Ndo nsanganya y’Akristo tosambaka etena kongaso kaamɛ l’asekaso Akristo ndo sho kondjaka ekeketshelo k’oma lo Bible.
16. Wetshelo akɔna wakondjayɛ oma lo kɛnɛ kakakomɛ Nathan nde la Priscilla?
16 Tɔsɛdingole kɛnɛ kakakomɛ Nathan nde la Priscilla wadjasɛ l’États-Unis dia mɛna woho watosamba ndo watokeketsha Jehowa lo tshimbo y’Ɔtɛkɛta ande. Ambeta ɛnɔnyi ɛmɔtshi, vɔ wakɔshi yɛdikɔ ya monɔ oma lo dihole diawɔ dia ntshɔ lo ɛtshi ka nkɛtɛ kakiwɔ l’ohomba efula w’apandjudi wa Diolelo. Nathan mbutaka ate: “Taki l’eshikikelo dia Jehowa ayɔtshɔkɔla welo aso.” Koko, l’ɔkɔngɔ wa vɔ nkoma lɛkɔ, vɔ wakatohomana l’ekakatanu wendana la yoonge ndo l’ekondjelo. Atshukanyi asɔ wakahombe nkalola lakawɔ, lɛnɛ akawahombe totetemala monga l’okakatanu wendana l’ekondjelo. Nathan mbohɔka ate: “Lakayambola lande na kaki Nzambi kotɔtshɔkɔla lo yoho yakatafɔnyaka. Lakatatɛ ndjambola dia kana lakasale dui dimɔtshi dia kɔlɔ.” Koko l’etena kɛmɔtshi, Nathan nde la Priscilla wakayoshihodiaka dia Nzambi kombakalɛ etena kakiwɔ lo dihombo. Nathan kɔndɔlaka ate: “Lo tena dia wolo sɔ, Bible kakakome oko ɔngɛnyi ami wa lomba wakakeketshaka ndo wakanɔmbɔlaka. Mbika washo lo woho wakatokimanyiya Jehowa dia mbikikɛ tena dia wolo sɔ lo dihole dia mbika washo l’ohemba, akatɔlɔngɔsɔla dia ndjɔlɔshana l’ekakatanu wakahombe ndjohomana la so lo nshi yayaye la mbetawɔ tshɛ.”
17. Ngande wakasambema kadiyɛso kelɛwɔ Helga? (Enda ndo osato.)
17 Anangɛso l’akadiyɛso koka tosamba. Lo ngande? Tɔsɛdingole ɛnyɛlɔ ka Helga ladjasɛ la Hongrie. L’edja k’ɛnɔnyi akumi, nde akahomana l’ekakatanu efula wakookonya dia monga la lɔkɔnyɔ ndo mbokonya dia ndjaoka oko nde bu la nɛmɔ. Koko etena kakanyiyande kɛnɛ kakookomɛ, nde mɛnaka woho wakoosambe Jehowa lo tshimbo y’etshumanelo. Nde mbutaka ate: “Jehowa akakimanyiyaka nshi tshɛ etena kakandɛnaka dia lambɔmɛnama l’ekiyanu l’ɔtɛ w’olimu wa l’emunyi wakamakambaka, woho wakamakokɛka ɔnami laki la hemɔ ndo ekakatanu ekina. Lushi tshɛ l’edja k’ɛnɔnyi 30 w’etshi, Jehowa akakotshaka daka diande dia sambami. Nde akakeketshaka mbala la mbala oma lo tshimbo ya kɔmatɛrɛ yakeketsha y’oma le anto akina wa l’etshumanelo. Lakalongolaka mesajɛ, mikanda ndo ɛtɛkɛta wa lowando paka l’etena kakimi la wɔ l’ohomba.”
Ngande wakoka Jehowa nkamba la yɛ dia nsamba anto akina? (Enda odingɔ 17)
18. Ngande wakokaso nsamba anto akina?
18 Tekɔ la diɛsɛ dia mbokoya Nzambi kaso lo nsamba anto akina. Ngande wakokaso nsala dui sɔ? Sho koka mbahokamɛka la solo dia lotutsha tshɛ, mbasambaka oma l’ɛtɛkɛta aso ndo mbakimanyiyaka lo toho tɔmɔtshi shikaa. (Tok. 3:27) Tekɔ lo nsala la wolo dia nsamba wanɛ tshɛ wasowa, mbidja ndo wanɛ wahatakambɛ Nzambi. Etena koonga asukanyi aso l’ɔkɛyi, hemɔ kana ekiyanu, sho mbaembolaka, mbahokamɛka ndo mbakeketshaka lo tshimbo y’avɛsa wa lo Bible. Etena kokoyaso Jehowa “Nzambi k’esambelo tshɛ,” sho hatokimanyiya tsho asekaso ambetawudi dia mbikikɛ ehemba koko ndo dia nkotola wanɛ wele bu ambetawudi oya lo ɔtɛmwɛlɔ wa pudipudi.—Mat. 5:16.
JEHOWA AYOTOKIMANYIYAKA NSHI TSHƐ
19. Kakɔna katosalɛ Jehowa, ndo ngande wakokaso mbookoya?
19 Jehowa ndjakiyanyaka lo yɛdikɔ y’efula lo dikambo dia wanɛ tshɛ wawoka ngandji. Nde hotokalɛ etena kahomanaso l’ekakatanu. Paka oko wayakiyanya ombutshi wele la ngandji lo dikambo di’ɔnande, mbele ndo Jehowa ndjakiyanyaka lo dikambo di’atɛmɔdi ande wa kɔlamelo. Nde tɔlɔmbɔlaka, tokotshɛka ehomba aso, tokokɛka ndo tosambaka. Sho mbokoyaka Shɛso ka ngandji etena kasukɛso ndo kakeketshaso anto akina etena kewɔ lo ehemba. L’andja ɔnɛ, sho mbeyaka mpomana l’ekakatanu ndo l’ekiyanu koko sho koka monga l’eshikikelo dia Jehowa ekɔ kaamɛ la so. Ndo nto, nde akalake ate: “Tokake wɔma, nɛ dia dimi lekɔ kaamɛ la yɛ.” (Isa. 41:10) Ɛtɛkɛta ɛsɔ toshikikɛka dia oko weso kaamɛ la Jehowa, sho keema opoko.
OSAMBO 100 Nyaalongole dimɛna
a Enda sawo diele l’ɔtɛ a dui ɔnɛ: “Tɔsake tɛdikɔ tangɛnyangɛnya Nzambi” lo Tshoto y’Etangelo ya Ngɔndɔ ka nɛi 15, 2011.
b Enda odingɔ 11-14 wa lo sawo diele l’ɔtɛ a dui ɔnɛ: “Tetemala ndjela ɛlɔmbwɛlɔ ka Jehowa” lo Tshoto y’Etangelo ya Ngɔndɔ ka hende 2024.
c Wɛ koka ntana bɛnyɛlɔ dieke ka ntomba lo jw.org lo mfunda lo dihole diasalawɔ eyangelo ɔnɛ: “Ekimanyielo etena katomba mpokoso.”
d Enda “Ambola w’oma le ambadi” lo Tshoto y’Etangelo ya Ngɔndɔ ka hende 2017.
e ELEMBETSHIELO W’OSATO: Anangɛso wa la Malawi walongola ekimanyielo ka l’emunyi ndo ka lo nyuma l’ɔkɔngɔ wa vɔ diɛnɛ l’etombelo wa kɔlɔ w’oma lo mpokoso k’oma lo diangɔ diakatongama.