TETEMALA NSUNGUKALA!
Ɔwɔ wa wolo—Kakɔna kata Bible lo dikambo sɔ?
Ase Chine mbutaka di’ɔnɔnyi ɔnɛ mbamboleka tshɛ taanyi ta wolo ndo ɔwɔ wa sato wamboleka wolo lo ɛwɔ tshɛ wambonga.”—The Guardian, Ngɔndɔ ka divwa 7, 2022.
Ɔwɔ wa wolo wayotetemala ɔnɔnyi wa tanu l’ahole efula wa l’Afrikɛ.”—UN News, Ngɔndɔ k’enanɛi 26, 2022.
“Kahende ɔtɔi ka Erɔpɛ kekɔ lo waale wa diɛnɛ la ɔwɔ wamboleka tshɛ wolo l’edja k’ɛnɔnyi 500.”—BBC News, Ngɔndɔ k’enanɛi 23, 2022.
Waa nomb’ewo efula wekɔ lo mbuta dia ɛwɔ wa wolo wa ngasɔ wayotetemala monga ndo wayoleka tshɛ wolo. Onde elongamelo kekɔ k’ɔnɛ tayonga la nshi yayaye y’amɛna? Kakɔna kata Bible lo dikambo sɔ?
Ɔwɔ ndo prɔfɛsiya ka lo Bible
Bible akatatshi dia lo nshi yaso nyɛ:
‘Ndjala ya kasha yayoyala lo dihole la dihole.’—Luka 21:11.
Mbala efula ɔwɔ wa wolo konyaka lo ndjala ya kasha. Ndjala ya kasha ya ngasɔ ndo paa la nyɔi kaya oma lɔkɔ kotshaka prɔfɛsiya kɛmɔtshi ka lo Bible.—Ɛnyɛlɔ 6:6, 8.
Ɔkɔkɔ wataleke ɔwɔ woleki tshɛ wolo monga
Bible mɛnyaka ɔkɔkɔ wamboleka ɛwɔ woleki wolo monga. Tɔ mbutaka ɔnɛ:
“Lam’akɛndakɛnda onto, nde bu la lotshungɔ la nɔmbɔla kaanga ekolo ande.”—Jɛrɛmiya 10:23.
Kɛsɔ mɛnyaka di’anto hawokoke ‘nɔmbɔla ekolo awɔ’ kana ndjalɔmbɔla vɔamɛ dimɛna. Mbala efula, tɛdikɔ ta kɔlɔ tɔsa anto konyaka lo ɔwɔ wa wolo ndo l’ohombelo w’ashi w’amɛna.
Ase siansɛ efula suyaka dia kɛnɛ kasala anto ambokonya dia taanyi ta wolo monga ndo dia andja w’otondo diɛnɛ la ɔwɔ wa wolo.
Lokaki lele l’anto lo mbɔsa tɛdikɔ aha la kanyiya etombelo wa lo nshi yayaye ambokonya l’olanyelo w’ekonda, w’ashi ndo hiɛlɛlɛ ndo l’okambelo wa kɔlɔ la diangɔ diakatongama. Etombelo ele, ashi efula wayoma.
Koko, Bible mbishaka elongamelo.
Onde elongamelo kekɔ kendana la nshi yayaye?
Bible ndakaka dia Nzambi ayokandola okakatanu wele nshi nyɛ w’ohombelo w’ashi. Lo ngande?
1. Nzambi ‘ayolanya wanɛ walanya nkɛtɛ.’ (Ɛnyɛlɔ 11:18) Nde ayonya dui dimɔtshi diasala di’ashi pombama: Nde ayonya anto wa kɔlɔ, anto wa lokaki wele kɛnɛ kasalawɔ kekɔ lo ndanya nkɛtɛ.—2 Timɔte 3:1, 2.
2. “Nkɛtɛ ya dja yayokadimɔ oduwa wele la asɔpɔ.” (Isaya 35:1, 6, 7) Nzambi ayosala diaha ɔwɔ wa wolo monga ndo ayokadimola nkɛtɛ paradiso koludi l’ashi.
3. “Wɛ kokɛka nkɛtɛ, lo ndjietɛ ɛtɛtɔ k’efula ndo ɔngɔnyi w’efula.” (Osambo 65:9) Nzambi ayosala dia nkɛtɛ ndola la mbo ya ndɛ ndo l’ashi w’amɛna dikambo di’anto tshɛ.