Naa oyango wele la lɔsɛnɔ?
Okadimwelo washa Bible
Dimbola diendana l’oyango wele la lɔsɛnɔ kokaka mimbɔma lo toho efula. Ɛnyɛlɔ ɔnɛ: Lande na keso lanɛ la nkɛtɛ? Onde lɔsɛnɔ lami lekɔ la oyango ɔmɔtshi? Bible mɛnyaka dia oyango wa lɔsɛnɔ laso ele wa monga la lɔngɛnyi la Nzambi. Tɔsɛdingole wetshelo ɛmɔtshi w’etatelo watosholɛ Bible lo dikambo sɔ.
Nzambi ekɔ Otungi aso. Bible mbutaka ɔnɛ: “Nde [mbuta ate Nzambi] kakatosale [koko] aha shoamɛ.”—Osambo 100:3; Ɛnyɛlɔ 4:11.
Nzambi ekɔ la sangwelo lo ɛngɔ tshɛ katongande, mbidja ndo sho.—Isaya 45:18.
Nzambi akatotonge la ‘ehomba wa lo nyuma,’ wendana ndo la nsaki ka monga la lɔsɛnɔ lele l’oyango. (Mateo 5:3) Nde nangaka dia nsaki kaso kɛsɔ kotshama.—Osambo 145:16.
Tayokotsha ehomba aso wa lo nyuma lo monga la lɔngɛnyi la nde. Kaanga mbakoka anto amɔtshi mfɔnya di’onto hakoke pondjo monga ɔngɛnyi wa Nambi, Bible tokeketshaka ɔnɛ: “Nyoyasukanya la Nzambi, konde ayoyasukanya la nyu.”—Jakɔba 4:8; 2:23.
Dia nkoma ɔngɛnyi wa Nzambi, sho hpombaka nsɛna lo yoho yɔtɔnɛ la sangwelo diande lo dikambo diaso. Bible mɛnyaka sangwelo sɔ l’Ondaki 12:13 lo mbuta ɔnɛ: “Onga la wɔma wɔsɔhanyemi la dilɛmiɛlɔ otsha le Nzambi ndo nkitanyiya ɛlɛmbɛ ande, nɛ dia l’ɔtɛ wa dikambo mbakatatongama.”—Good News Translation.
Lo nshi yayaye, tayoshihodia dimɛna dimɛna sangwelo dia l’etatelo diaki Nzambi lo dikambo diaso etena kayondonya asui tshɛ ndo kayondosha angɛnyi ande, mbuta ate wanɛ wɔtɛmɔla lɔsɛnɔ la pondjo.—Osambo 37:10, 11.