ƐLƆNGƆLƆNGƆ WEKƆ LO NDJAMBOLA
Kakɔna kahombami mbeya lo dikambo dia wanu?
Bible hashimbe anto dia nnɔ wanu lo yoho yakoka naka ɛlɛmbɛ wa lɛɛta mbetawɔka. Koko, tɔ shimbaka wodjwelo a wanu.—Osambo 104:15; 1 Kɔrɛtɔ 6:10.
Ko kakɔna kayoyosala naka wekɔ lo kotshutshuya dia wɛ nnɔ wanu etena kele ɛlɛmbɛ kana ambutshi ayɛ hawolange?
Kana yimba la ntondo ka nnɔ
Asekayɛ amɔtshi koka mfɔnya ɔnɛ dia mbetsha etena ka dimɛna paka nnɔ wanu. Ko kakɔna kakoka ntomba l’ɔkɔngɔ wa nnɔ wanu?
Ayonga l’okakatanu l’aseka lɛɛta. Nɛmanɛka la lɛnɛ akayole, naka wɛ nnɔ wanu wakashimbe lɛɛta diaha nnɔ, wɛ pombaka mfuta kibawo, wɛ ayɔsama oko onto lambosala dui dia kɔlɔ efula, wayokɔhɔtɔla mikanda wakosha lotshungɔ la nkɛndjakɛndja mutuka kana mututu, wayokokandja ntumu ya welo aha la nongola difuto ndo wɛ koka kaanga tɔlama lo lokanu.—Rɔmɔ 13:3.
Ayonga la lokumu la kɔlɔ. Wodjwelo a wanu shishɛka onto dikoka dia ndjasɛdingola. Wodjwelo a wanu koka kokonya dia mbita kana nsala awui wakokayɛ ndjonyanga l’ɔkɔngɔ. (Tokedi 23:31-33) Lo nshi yambokita rɛzo sɔsio dikuma nyɛ, kɛnɛ kasalayɛ koka ndanya lokumu layɛ.
Ayonga wolo dia wɛ ndjakokɛ. Mbidjɔ wanu koka nkonya onto dia vɔ mbɔkɔmɔla kana mbeyana la nde aha l’okakatanu. Vɔ koka kokonya dia wɛ nsala kɛnɛ kasala anto akina ndo kɛsɔ koka ndjokokonya dia nsala dui dimɔtshi dia waale kana diantona ɛlɛmbɛ.
Wɛ koka ndjokoma mfumbe. Eyangelo ɛmɔtshi mɛnyaka dia etena katatɛso nnɔ wanu teke akɛnda, kɛsɔ koka ndjotokonya mfumbe ka wanu. Nnɔ wanu dia mbewɔ ekiyanu, diaha ndjaoka oko ompoko kana l’ɔlɛmbɛlɔ wonga etena kasalaso paka dui diakɔ diamɛ, konyaka dia onto ntetemala nnɔ wanu ndo kɛsɔ ndjokonyaka wolo dia onto ntshika dia nnɔ wanu.
Nyɔi. L’ɔnɔnyi weke kambeta, l’États-Unis, onto ɔtɔi ekɔ lo mvɔ lo minitɛ 52 tshɛ l’ɔtɛ wakɛndjakɛndja anto mutuka etena kambowodjɔ wanu. L’ɛnɔnyi etanu weke kambeta ɛnɛ, ndekana ɛlɔngɔlɔngɔ 1 500 wele l’ɛse k’ɛnɔnyi 21 vɔka ɔnɔnyi tshɛ lo w’aksida l’ɔtɛ wambowodjɔ wanu. Kaanga naka wɛ hadjwe wanu lɔsɛnɔ layɛ koka monga lo waale naka wɛ mbetawɔ dia onto lambodjɔ wanu kɛmba.
Ɔsa yɛdikɔ mɔtshi
Wɛ koka mbewɔ waale wakomɛ wanɛ wambodjɔ wanu naka wɛ tɔshi yɛdikɔ la ntondo lo kɛnɛ kayoyosala.
Tɔndɔ dia lo Bible: “Kanga yewo atɛnaka waale, ko nde atoyashɛka.” (Tokedi 22:3) Hatonga dui dia dimɛna dia nkɛndjakɛndja mutuka kana nsala dui dimɔtshi dialɔmba dia monga la yambalo etena kambotɔnɔ wanu.
Yɛdikɔ: ‘Layɔnɔ paka wanu wetawɔ lɛɛta ndo l’etena kahombama.’
Tɔndɔ dia lo Bible: “Nyekɔ ɛhɔmbɔ wa ɔnɛ lakitanyiyanyu.” (Rɔmɔ 6:16) Naka wɛ ambɔnɔ wanu paka l’ɔtɛ w’ɔnɛ asekami nɔka, kete ekɔ oko wɛ ambetawɔ dia vɔ kɔlɔmbɔla. Naka wɛ ekɔ lo nnɔ wanu paka dia nkitshakitsha ekinanu, kete wɛ hatɔkɛnɛmɔla dikoka diayɛ dia nkandola ekakatanu.
Yɛdikɔ: ‘Hambetawɔki pondjo di’asekami tshutshuyami dia nnɔ wanu.’
Tɔndɔ dia lo Bible: “Tongake l’atei wa wanɛ wanɔ wanu efula.” (Tokedi 23:20) Angɛnyi wa kɔlɔ koka ndanya yɛdikɔ yayɛ. Wɛ ndjadjaka lo waale etena kongayɛ kaamɛ la wanɛ wanɔ wanu efula.
Yɛdikɔ: ‘Hamongaki pondjo kaamɛ la wanɛ wanɔ wanu efula.’