Lande na kelamɛ Yeso ɔnɛ Ɔna Nzambi?

Okadimwelo washa Bible

Mbala efula Bible mbelɛka Yeso ɔnɛ “Ɔna Nzambi.” (Joani 1:49) Etelo k’ɔnɛ “Ɔna Nzambi” mɛnyaka dia Nzambi ekɔ Otungi, Kiɔkɔ ya nsɛnɔ tshɛ, mbidja ndo laki Yeso. (Osambo 36:9; Ɛnyɛlɔ 4:11) Bible hetsha dia Nzambi akote woho woota anto ana.

Bible mbelɛka nto andjelo ɔnɛ “ana wa Nzambi ka mɛtɛ.” (Jɔbɔ 1:6) Ndo Bible mbutaka dia onto la ntondo, Adama, aki “Ɔna Nzambi.” (Luka 3:38) Koko lam’ele Yeso mbele etongami ka ntondo ndo nde mbakatongama mbala kakɔ ɔtɔi oma le Nzambi, Bible mbelɛka Yeso ɔnɛ Ɔna enondo laki Nzambi.

• Onde Yeso aki la lɔsɛnɔ l’olongo la ntondo ka nde ndjotɔ lanɛ la nkɛtɛ?

• Kakɔna kakasale Yeso la ntondo ka nde ndjoya lanɛ la nkɛtɛ?

Onde Yeso aki la lɔsɛnɔ l’olongo la ntondo ka nde ndjotɔ lanɛ la nkɛtɛ?

Eelo. Yeso aki etongami ka lo nyuma l’olongo la ntondo ka nde ndjotɔ oko onto lanɛ la nkɛtɛ. Yeso ndamɛ akate ate: “Dimi lakaye oma l’olongo.”​—Joani 6:38; 8:23.

Nzambi akatonge Yeso la ntondo ka nde ntonga diangɔ dikina tshɛ. Bible mbutaka lo dikambo dia Yeso ɔnɛ:

• “Nde ekɔ . . . enondo wa diangɔ tshɛ diakatongama.”​—Kɔlɔsayi 1:15.

• Nde ekɔ “etatelo k’etongelo ka Nzambi.”​— Ɛnyɛlɔ 3:14.

Yeso akakotsha prɔfɛsiya kendana la “Ɔnɛ lakayala edja efula la ntondo, oma ko nshi y’edjedja.”​—Mika 5:2; Mateo 2:4-6.

Kakɔna kakasale Yeso la ntondo ka nde ndjoya lanɛ la nkɛtɛ?

Nde aki la nɛmɔ di’efula l’olongo. Yeso akate lo dikambo dia dihole diaki lande lam’akandalɔmbɛ ɔnɛ: “Papa, ontombole . . . la lotombo lakimi la lɔ la suke la yɛ ntondo k’andja tongama.”​—Joani 17:5.

Nde akakimanyiya She dia ntonga diangɔ dikina tshɛ. Yeso akakambe suke la Nzambi oko “okambi wa kɔmba.” (Tokedi 8:30) Bible mbutaka lo dikambo dia Yeso ɔnɛ: “Lo tshimbo yande mbakatongama diangɔ dikina tshɛ l’olongo ndo la nkɛtɛ.”​—Kɔlɔsayi 1:16.

Lo tshimbo ya Yeso, Nzambi akatonge diangɔ dikina tshɛ, mbidja ndo ditongami dia lo nyuma kaamɛ ndo olongo la nkɛtɛ. (Ɛnyɛlɔ 5:11) L’awui amɔtshi, woho wakakambe Nzambi kaamɛ nde la Yeso aki oko woho wakamba arshitɛktɛ nde la ombiki wa luudu. Arshitɛktɛ salaka sango ko ombiki wa luudu mbika luudu lo ndjela sango diakɔ.

Nde akakambe oko Dui. Bible mbelɛka Yeso ɔnɛ “Dui,” etena katɛkɛtatɔ dikambo dia lɔsɛnɔ laki la Yeso ntondo l’olongo. (Joani 1:1) Lo mɛtɛ, kɛsɔ nembetshiyka dia Nzambi akakambe la Yeso dia mbewoya ditongami dikina dia lo nyuma awui ndo atɔndɔ ande.

Yeso akakambe nto oko Yɛmb’awui yaki Nzambi oya le anto wa lanɛ la nkɛtɛ. Ondo Nzambi akakambe la Yeso oko Dui lam’awakandashaka Adama la Eva wadjango l’ekambɔ ka Ɛdena. (Etatelo 2:16, 17) Ondo Yeso mbaki ondjelo wakalɔmbɔla Isariyɛlɛ w’edjedja l’oswe wa shɛnga ndo dui diande mbakawahombe nkitanyiya.​—Etombelo 23:20-23.a