Nɔtɛ ka l'ɛse ka dikatshi

a Enda sawo diele l’ɔtɛ a dui ɔnɛ: “Ngande wakokayɛ nsɔna ekadimwelo ka dimɛna ka Bible?” diele lo Tshoto y’Etangelo ya Ngɔndɔ ka tanu 1, 2008 lo Falase.

LOKOMBO L’EKILA LA NZAMBI LO BIBLE

Bible—Ekadimwelo k’andja w’oyoyo kambaka la lokombo l’ekila laki Nzambi, mbuta ate Jehowa lo Afundelo wa lo Hɛbɛru ndo lo Afundelo w’Akristo wa lo Grɛkɛ. Bible efula ya l’Angɛlɛ ya nshi nyɛ hayosale ngasɔ. Yɔ kambaka la lokombo “Nkumadiɔndjɔ.” Ɔkɔkɔ ɔmɔ wasalawɔ dui sɔ ele, akadimudi amɔ mbutaka dia lokombo laki Nzambi l’oshika, mbuta ate Tetragramɛ (JHWH) hatanema lo ekadimwelo ka lo Grɛkɛ ka la Septante k’Afundelo wa lo Hɛbɛru. Ko onde dui sɔ diekɔ mɛtɛ?

L’atei atei wa ntambe ka 20, wakashola dikoho dimɔ di’edjedja dia la Septante diakikɔ lo nshi ya Yeso. Diɔ diakikɔ la lokombo l’ekila laki Nzambi fundama l’alɛta wa lo Hɛbɛru. Mɛnamaka dia l’ɔkɔngɔ diko, asangodi wakayonya lokombo laki Nzambi l’ahole alɔ ko lihɛnya la tshɛkɛta Kyʹri·os ya lo Grɛkɛ yalembetshiya “Nkumadiɔndjɔ.” Ekadimwelo k’andja w’oyoyo kaloyaka lokombo laki Nzambi l’ahole watanemalɔ l’Afundelo.