Lushi la hende, Ngɔndɔ ka divwa 16
Sho taketawɔ ndo takeye dia wɛ kele l’Ekila laki Nzambi.—Jni. 6:69.
Ɔpɔstɔlɔ Petero aki la kɔlamelo; nde kombetawɔ dia kaanga dui ɔtɔi mbokonya dia ntshika kambɛ Jehowa lo pondjo. Nde akɛnya kɔlamelo shɔ lo diaaso dimɔ etena kakate Yeso dui dimɔ diaki ambeki ande koshihodia. (Jni. 6:68) Aha la vɔ nkonga elembetshielo, ambeki efula wakatshike ndjela Yeso. Koko aha Petero. Nde aketawɔ dia paka Yeso mbaki “l’ɛtɛkɛta wa lɔsɛnɔ la pondjo.” Yeso akeyaka dia Petero ndo apɔstɔlɔ akina wayowotshika. Koko, aki l’eshikikelo dia Petero ayokalola ndo ayotetemala ntshikala la kɔlamelo. (Luka 22:31, 32) Yeso akashihodia dia “otema nangaka koko demba mbele wɔdu.” (Makɔ 14:38) Laasɔ, kaanga l’ɔkɔngɔ wa Petero manguna dia nde haweye, Yeso kopekɔ ɔpɔstɔlɔ ande ɔsɔ. L’ɔkɔngɔ wa eolwelo kande ondo Yeso akɛnama le Petero, mbuta ate etena kaki Petero ndamɛ. (Makɔ 16:7; Luka 24:34; 1 Kɔr. 15:5) Ande woho wakahombe dui sɔ nkeketsha ɔpɔstɔlɔ wakakɔmɔ ɔsɔ lee! w23.09 22 od. 9-10
Lushi la sato, Ngɔndɔ ka divwa 17
Ɔngɛnɔngɛnɔ le wanɛ wele etsha awɔ wa kɔlɔ wambodimanyiyama ndo pɛkato yawɔ yambokombama.—Rɔmɔ 4:7.
Nzambi dimanyiyaka kana kombaka pɛkato ya wanɛ wele la mbetawɔ le nde. Nde mbadimanyiyaka tshɛ lo tshɛ ndo nde hadje yimba nto lo pɛkɛto yawɔ. (Os. 32:1, 2) Nde mbɔsaka anto asɔ l’onto ndo l’onto oko anto wele keema l’onongo l’ɔtɛ wa mbetawɔ kawɔ. Kaanga mbakawelamɛka ɔnɛ anto w’ɛlɔlɔ, Abrahama, Davidɛ, ndo atɛmɔdi akina wa Nzambi waki la mbetawɔ waki paka anto wele keema kokele. L’ɔtɛ wa mbetawɔ kawɔ, Nzambi akawaɔsaka oko anto waki komonga l’onongo, djekoleko lo woho wakandawaɛdikaka l’anto waki komonga la mbetawɔ le nde. (Ɛf. 2:12) Oko wadiɛnya ɔpɔstɔlɔ Pɔɔlɔ hwe lo mukanda ande, mbetawɔ kekɔ ohomba efula le onto dia nde monga la diɔtɔnganelo dia dimɛna la Nzambi. Dui sɔ diaki mɛtɛ lo dikambo dia Abrahama nde la Davidɛ ndo diɔ koka monga ndo lo dikambo diaso. w23.12 3 od. 6-7
Lushi la nɛi, Ngɔndɔ ka divwa 18
Tolambolake Nzambi nshi tshɛ olambo wa lotombo, mbuta ate elowa w’oma l’ɛlɔmɔ aso wasala wotelo wa lo sɛkɛ dikambo dia lokombo lande.—Hɛb. 13:15.
Ɛlɔ kɛnɛ Akristo tshɛ wekɔ la diɛsɛ dia nambola Jehowa elambo awɔ lo nkamba la wenya awɔ, wolo awɔ ndo diangɔ diawɔ dia mbetsha wahɔ wa Diolelo dia Nzambi lo dihole dia ntondo. Sho koka mɛnya dia sho mbɔsaka la nɛmɔ diɛsɛ diaso dia ntɛmɔla Jehowa lo mbolambolaka elambo aso woleki tshɛ amɛna. Ɔpɔstɔlɔ Pɔɔlɔ akashile toho totshikitanyi tendana l’ɔtɛmwɛlɔ aso tahatahombe pondjo minya yimba. (Hɛb. 10:22-25) Toho takɔ mendanaka la ndjasukanya la Jehowa lo dɔmbɛlɔ, nsambisha anto akina dikambo dia elongamelo kaso, sanganaka kaamɛ l’etshumanelo ndo keketshanyaka kaamɛ lam’asaso ndo “toleke nsala dikambo sɔ oko wɛna[so] dia lushi [la Jehowa] laya suke.” Otsha l’ekomelo k’ɔkɔndɔ wa l’Ɛnyɛlɔ, ondjelo wa Jehowa mbutaka mbala hiende dia tɔtɔmiya ɔnɛ: “Tɛmɔla Nzambi!” (Ɛny. 19:10; 22:9) Tatohɛke pondjo awui wa lotshimola wambotɛna wendana la tɛmpɛlɔ ka Jehowa ka woke ka lo nyuma ndo tatohɛke diɛsɛ diele laso dia ntɛmɔla Nzambi kaso ka woke! w23.10 29 od. 17-18