Ɛlɔ kɛnɛ Akristo tshɛ wekɔ la diɛsɛ dia nambola Jehowa elambo awɔ lo nkamba la wenya awɔ, wolo awɔ ndo diangɔ diawɔ dia mbetsha wahɔ wa Diolelo dia Nzambi lo dihole dia ntondo. Sho koka mɛnya dia sho mbɔsaka la nɛmɔ diɛsɛ diaso dia ntɛmɔla Jehowa lo mbolambolaka elambo aso woleki tshɛ amɛna. Ɔpɔstɔlɔ Pɔɔlɔ akashile toho totshikitanyi tendana l’ɔtɛmwɛlɔ aso tahatahombe pondjo minya yimba. (Hɛb. 10:​22-25) Toho takɔ mendanaka la ndjasukanya la Jehowa lo dɔmbɛlɔ, nsambisha anto akina dikambo dia elongamelo kaso, sanganaka kaamɛ l’etshumanelo ndo keketshanyaka kaamɛ lam’asaso ndo “toleke nsala dikambo sɔ oko wɛna[so] dia lushi [la Jehowa] laya suke.” Otsha l’ekomelo k’ɔkɔndɔ wa l’Ɛnyɛlɔ, ondjelo wa Jehowa mbutaka mbala hiende dia tɔtɔmiya ɔnɛ: “Tɛmɔla Nzambi!” (Ɛny. 19:10; 22:9) Tatohɛke pondjo awui wa lotshimola wambotɛna wendana la tɛmpɛlɔ ka Jehowa ka woke ka lo nyuma ndo tatohɛke diɛsɛ diele laso dia ntɛmɔla Nzambi kaso ka woke! w23.10 29 od. 17-18

Sho tshɛ kombolaka ‘ntetemala mbokana ngandji lam’asaso.’ Koko, ekɔ ohomba efula dia sho mbohɔka dia Yeso akatɔhɛmɔla ɔnɛ “ngandji k’anto efula [kayohomba mbɔla].” (Mat. 24:12) Yeso konanga mbuta di’ambeki ande efula wayotshika mɛnyanya ngandji lam’asawɔ. Koko, sho pombaka ntetemala monga la yambalo y’efula diaha sho ndjɔsɛngiyama oma le anto wa l’andja ɔnɛ wahɛnyanya ngandji. La kanyi shɔ lo yimba, nyɛsɔ tɔsɛdingole dimbola di’ohomba nɛ: Onde ekɔ yoho mɔ yakokaso mpemba dia kana ngandji kokaso anangɛso kekɔ wolo? Yoho mɔ yakokaso ndjashikikɛ dia nkeketsha ngandji kaso ele lo nsɛdingola woho wakandolaso awui amɔ wa lo lɔsɛnɔ laso. (2 Kɔr. 8:8) Ɔpɔstɔlɔ Petero akate dui dimɔ l’atei w’awui asɔ ɔnɛ: “Laadiko di’akambo tshɛ, nyonge la ngandji k’efula lam’asanyu, nɛ dia ngandji kombaka lokema la pɛkato.” (1 Pe. 4:8) Ɔnkɔnɛ, wɛɔdu ndo wandja w’anto akina koka mbidja ngandji kaso l’ohemba. w23.11 10-11 od. 12-13

Hatokoke nkitanyiya didjango diaki Yeso diendana la ngandji naka sho mɛnya ngandji otsha le anto amɔ, koko aha anto akina. Lo mɛtɛ, sho koka ndjaoka suke suke l’anto amɔ, oleki anto akina oko wakasale Yeso. (Jni. 13:23; 20:2) Koko ɔpɔstɔlɔ Petero toholaka dia sho pombaka nsala la wolo dia monga la “ngandji k’onto l’ɔnango,” mbuta ate dimama dia wolo diele oko nɛ diele lam’asa ase nkumbo, otsha le anangɛso l’akadiyɛso tshɛ. (1 Pe. 2:17) Petero tokeketshaka dia monga la “ngandji k’efula k’oma k’ɛse otema lam’asaso.” (1 Pe. 1:22) Lanɛ, monga la ngandji “k’efula” nembetshiyaka mboka onto ɔmɔ ngandji kaanga etena kele ekɔ wolo nsala dui sɔ. Ɛnyɛlɔ, kakɔna kayotosala naka ɔnangɛso ɔmɔ ambotosalɛ kɔlɔ lo yoho mɔ? Sho koka sɛngiyama dia nkaloya kɔlɔ lo kɔlɔ lo dihole dia mbɛɛnya ngandji kawokaso. Koko Petero akeke oma le Yeso dia Nzambi hangɛnangɛna onto lakaloya kɔlɔ lo kɔlɔ. (Jni. 18:​10, 11) Petero akafunde ate: “Tanyokaloyake kɔlɔ lo kɔlɔ kana lɔtɛngɔ lo lɔtɛngɔ. Koko nyaatshɔkɔlɛ.” (1 Pe. 3:9) Etawɔ dia ngandji k’efula kokayɛ anto kotshutshuya dia wɛ monga ɔlɔlɔ. w23.09 28-29 od. 9-11