Lushi la lomingu, Ngɔndɔ ka divwa 28
Atunyi ami wayokalola ɛkɔngɔkɔngɔ lushi layomoyanga ekimanyielo.Lekɔ l’eshikikelo nte: Nzambi ekɔ lo wedi ami.—Os. 56:9.
Divɛsa dia la diko nɛ mɛnyaka yoho yakanya Davidɛ wɔma. Kaanga mbaki lɔsɛnɔ lande lo waale, nde akakanaka yimba la kɛnɛ kayowosalɛ Jehowa lo nshi yayaye. Davidɛ akeyaka dia Jehowa ayowotsha l’etena kahombama. Laadiko a laasɔ, Jehowa akatatshi dia Davidɛ ayoyala nkumekanga l’Isariyɛlɛ. (1 Sa. 16:1, 13) Le Davidɛ, kɛnɛ tshɛ kakalake Jehowa kaki oko kambokotshama. Kakɔna kalaka Jehowa dia kosalɛ? Hatokoke nongamɛ dia nde tohandola oma l’ekakatanu tshɛ. Koko oyadi ehemba wakoka mpomana la yɛ lo dikongɛ nɛ di’akambo, Jehowa ayokonyɛwɔ l’andja w’oyoyo wayaye. (Isa. 25:7-9) Otungi aso ekɔ la wolo w’efula wa mbolola wanɛ wakavu, wa nkɔnɔla anto ndo minya atunyi aso tshɛ.—1 Jni. 4:4. w24.01 6 od. 12-13
Lushi l’ɔtɔi, Ngɔndɔ ka divwa 29
Ɔngɛnɔngɛnɔ le ɔnɛ lele kɔlɔ kande kambodimanyiyama, ɔnɛ lele pɛkato kande kambokombama.—Os. 32:1.
Kana yimba lo kɛnɛ kendana la ndjakimɔ ndo la batisimu kayɛ. Wɛ akatakola wanya asɔ nɛ dia wɛ kombolaka mbeta lo wedi wa Jehowa. Ohɔ kɛnɛ kakakokimanyiya dia mbetawɔ dia wɛ amboshola akambo wa mɛtɛ. Wɛ akakondja ewo k’oshika ka Jehowa ndo wɛ akatatɛ nɛmiya ndo mboka Shɔ lele l’olongo ngandji. Wɛ akonge la mbetawɔ ndo akatshutshuyama dia ndjatshumoya. Wɛ akatshike dia nsala awui wahetsha Jehowa ndo wɛ akatatɛ nsala awui w’ɔngɛnyangɛnya. Wɛ akayaoke dimɛna efula etena kakayeye dia Nzambi akakodimanyiya pɛkato yayɛ. (Os. 32:2) Wɛ akatatɛ mbɔtɔ lo nsanganya y’Akristo ndo wɛ akatatɛ mbewoya anto akina awui wa diambo wakayeke. Oko Okristo wakayakimɔ ndo wambobatizama, wɛ ɔkɛndakɛnda wony’ɔnɛ lo mboka ka lɔsɛnɔ ndo amboyashikikɛ dia ntetemala nkɛndakɛnda lɔkɔ. (Mat. 7:13, 14) Tshikala nge ntetemala mboka Jehowa ngandji ndo nkitanyiya wadjango ande. w23.07 17 od. 14; 19 od. 19
Lushi la hende, Ngɔndɔ ka divwa 30
Nzambi ekɔ la kɔlamelo ndo nde hatetawɔ dia nyu pembama oleki kɛnɛ kakokanyu mbikikɛ, koko lam’ayonyokomɛ ohemba, nde ayonyatɛ mboka dia nyu monga l’akoka wa mbikikɛ ohemba akɔ. —1 Kɔr. 10:13.
Lo kanaka yimba lo dɔmbɛlɔ dia ndjakimɔ kayɛ le Jehowa, wɛ ayokondja wolo wa nshika ntanga l’oseka ohemba tshɛ. Ɛnyɛlɔ, onde wɛ ambotatɛ mɛnyanya ngandji l’onto okina lele bu olonganyi ayɛ? Ndooko mɛtɛ! Wɛ amboshilaka mbuta ndooko lo dikambo sɔ. Wɛ ayoyanganya la lɔkɔnyɔ laya lo ndɔshana la nsaki ya kɔlɔ l’ɔkɔngɔ wa yɔ mbika edio. Wɛ ayokadimɔ oma lo “mboka ka akanga wa kɔlɔ.” (Tok. 4:14, 15) Lo nkana yimba la yɛdikɔ yaki la Yeso ya ngɛnyangɛnya She, wɛ hatotshimbatshimba ndo ayotona mbala kakɔ ɔtɔi ɛngɔ tshɛ kayohomba nyangiya Nzambi lakayayakimɔ le nde. (Mat. 4:10; Jni. 8:29) Kɛnɛ kele mɛtɛ ele, ehemba mbishaka diaaso dia mɛnya dia wɛ amboyashikikɛ dia “ntetemala ndjela” Yeso. Lo nsala ngasɔ, wɛ koka ndjashikikɛ dia Jehowa ayokokimanyiya. w24.03 9-10 od. 8-10