Onde Nzambi ekɔ?
Okadimwelo washa Bible
Eelo. Bible kekɔ la tolembetelo ta shikaa tɛnya dia Nzambi ekɔ. Tɔ tokeketshaka dia nkeketsha mbetawɔ kaso le Nzambi, koko aha mbetawɔ kɛnɛ ketsha ɛtɛmwɛlɔ aha la nyanga dia Mbeya dia kana tɔ kekɔ mɛtɛ, koko lo nkamba la “ekanelo kaso ka yimba,” ndo la ‘dikoka diaso dia lo yimba.’ (Rɔmɔ 12:1; 1 Joani 5:20, nɔtɛ) Tɔsɛdingole tokanyi tɔmɔtshi t’oma lo Bible:
Woongelo w’andja wele awui tshɛ wekɔ l’ɔnɔngɔ ndo wele la diangɔ diasɛna, mɛnyaka di’Otungi ɔmɔtshi wekɔ. Bible mbutaka ɔnɛ: “Lo mɛtɛ, luudu tshɛ tokamaka oma le onto ɔmɔtshi, koko Otungi wa diangɔ tshɛ ele Nzambi.” (Hɛbɛru 3:4) Kaanga mbele kɛnɛ kata Bible kɛsɔ bu wolo nshihodia, anto efula wakeke mbutaka kitana wolo nshihodia.a
Anto mbotɔka la nsaki ka Mbeya oyango wa lɔsɛnɔ. Nsaki kɛsɔ ekɔ woho ɔmɔtshi wa mposa katetemala onto monga la tɔ, oyadi ehomba ande wa l’emunyi wambokotshama. Bible tɛkɛtaka dia dikambo sɔ etena katɛkɛtatɔ dia “ehomba wa lo nyuma,” wendana ndo la nsaki ka Mbeya ndo ka ntɛmɔla Nzambi. (Mateo 5:3; Ɛnyɛlɔ 4:1) Ehomba ɛsɔ mɛnyaka dia Nzambi ekɔ ndo vɔ mɛnyaka nto dia nde ekɔ Otungi woludi tɔɔ la ngandji lalanga dia ehomba aso kotshama.—Mateo 4:4.
Bible kekɔ la prɔfɛsiya y’amɛna efula yakafundama ambeta ɛnɔnyi nkama la ntondo ndo yakakotshama lo kiambokambo tshɛ. Mɛtɛ prɔfɛsiya shɔ mɛnyaka dia yɔ hayoye oma le onto k’onto.—2 Petero 1:21.
Afundji wa Bible waki l’ewo k’awui wa siansɛ kaki komonga l’anto wa lo nshi yawɔ. Ɛnyɛlɔ, lo nshi y’edjedja, anto efula wakafɔnyaka dia nkɛtɛ mbahema laadiko wa nyama kɛmɔtshi, djɔvu, ngɔmbɛ kana nyama kekina ka woke. Etena kele Bible mbutaka dia Nzambi “nɛndjalɛndjaka nkɛtɛ lam’aha ndooko ɛngɔ.” (Jɔbɔ 26:7) Woho akɔ waamɛ mbele, Bible mbutaka dia nkɛtɛ kekɔ “okama,” kana “obolonga.” (Isaya 40:22, nɔtɛ) Anto efula mbutaka dia eokelo kaki l’afundji wa Bible kaki komonga l’anto akina kɛsɔ mɛnyaka mɛtɛ dia vɔ wakalongola awui asɔ oma le Nzambi.
Bible kadimolaka ambola efula wa wolo, anto wakoka nkonya onto dia nde mbuta ɔnɛ Nzambi bu naka nde hakondjisha ekadimwelo w’eshika. Ɛnyɛlɔ: Naka Nzambi ekɔ ngandji ndo kanga-wolo-tshɛ, lande na kambolola andja l’asui ndo l’awi wa kɔlɔ? Lande na kele ɔtɛmwɛlɔ mbala efula la shɛngiya ya kɔlɔ lo dihole dia monga la shɛngiya ya dimɛna?—Tito 1:16.
a Ɛnyɛlɔ, ombewi w’awui wa tɔɔtɔ welɛwɔ Allan Sandage akate lo kɛnɛ kendana la loowa ate: “Woho wele awui tshɛ l’ɔnɔngɔ mɛnyaka dia dui kondja oyaya. Onto ɔmɔtshi lakakongɛ awui anɛ pombaka monga. Le mi, Nzambi ekɔ ehekesa, ndo paka nde mbakasale dihindo nɛ diendana la etongelo, woho wele lo dihole monga ndooko ɛngɔ, ɛngɔ kɛmɔtshi kekɔ.”