OKOTSHA
Kɛnɛ kata Bible lo dikambo di’odiakelo wa diwala ndo di’okakitɔnelo
Jehowa nongamɛka dia wanɛ wambotshukana tshikala la kɔlamelo lo dɔkɔlɔkɔ dia diwala. Etena kakandatshukanya pami la womoto la ntondo, Jehowa akate ate: “Pami . . . ayumamana la wadendi, ku vo wayuyala dimba otoi.” L’ɔkɔngɔ diko, Yeso Kristo akakalolɛ ɛtɛkɛta ɛsɔ ndo akakotsha ɔnɛ: “Untu tamamitulaki kene kakamamanya [Nzambi].” (Etatelu 2:24; Mateu 19:3-6) Ɔnkɔnɛ, le Jehowa la Yeso, diwala diekɔ dimama diahomba tshikala pondjo ndo paka l’ɔtɛ wa nyɔi k’olonganyi ɔmɔtshi mbakoka diwala komɛ. (1 Koreto 7:39) Lam’ele diwala diekɔ ekila, odiakelo adiɔ hawohombe mbɔsama oko yangɔ y’anyanya. Lo mɛtɛ, Jehowa mpetshaka odiakelo wa diwala wasalema aha lo ndjela Afundelo.—Malaki 2:15, 16.
Naa ɛkɔkɔ wetawɔ Afundelo dia diwala mvɔ? Jehowa mpetshaka monanyi ndo loseka. (Etatelu 39:9; 2 Samuele 11:26, 27; Osambu 51:4) Eelo, nde mbɔsaka loseka oko ɛngɔ ka kɔlɔ, diakɔ dietawɔnde dia diwala mvɔ l’ɔtɛ alɔ. (Dia mbeya awui efula lo kɛnɛ kalembetshiya loseka, enda Tshapita 9, odingɔ 7.) Jehowa mbishaka olonganyi okina lotshungɔ la nde sɔna dia tetemala mbidjasɛ la olonganyi wakasale loseka kana nde ndjaka diwala. (Mateu 19:9) Omalɔkɔ, naka otshukanyi okina ambɔsa yɛdikɔ ya ndjaka diwala, kete nde hasadi dui diahetsha Jehowa. Koko l’etena kakɔ kâmɛ, etshumanelo ka Akristo hatshutshuya onto dia ndjaka diwala. Awui amɔtshi mbeyaka tshutshuya olonganyi okina dia nde tetemala mbidjasɛ la olonganyi ande wosadi loseka, djekoleko naka nde ndjatshumoya l’otema ɔtɔi. Lo mɛtɛ, wanɛ wɔsa yɛdikɔ ya ndjaka diwala lo ndjela kɛnɛ kata Afundelo pombaka mbɔsa yɛdikɔ yawɔ vɔamɛ ndo mbetawɔ etombelo tshɛ wakoka monga la dikambo sɔ.—Ngalatiya 6:5.
Lo akambo amɔtshi wa wolo, Akristo amɔtshi wakɔshi yɛdikɔ ya kakitɔna l’elonganyi awɔ kana ndjaka diwala kânga mbaki elonganyi awɔ kosala loseka. L’etena kɛsɔ, Bible mbutaka dia olonganyi wambokakitɔna l’osekande pombaka ‘tshikala onyemba kana kalolɛ olonganyi ande.’ (1 Koreto 7:11) Okristo ɔsɔ bu la lotshungɔ la tshukana la onto okina. (Mateu 5:32) Tɔsɛdingole awui amɔtshi wa lânde wakakonya anto amɔtshi dia vɔ kakitɔna.
Tonaka l’okonda tshɛ dia kotsha ehomba w’ase nkumbo. Nkumbo kɛmɔtshi mbeyaka koma wola w’efula polo lo yɛdikɔ ya pomba diangɔ diele ohomba lo lɔsɛnɔ l’ɔtɛ watona omi l’okonda tshɛ dia kotshɛ ase nkumbo kande ehomba awɔ kânga mbende l’akoka wa sala dui sɔ. Bible mbutaka ɔnɛ: “Naka untu humbi . . . wa lu khumbu kandi, ndi ambutuna mbetawo kandi, ambuleka untu lahetawo kolo.” (1 Timote 5:8) Naka pami ka ngasɔ halange tshikitanya lɔkɛwɔ lande, kete wadi mbeyaka mbɔsa tɛdikɔ dia kokɛ lɔsɛnɔ lande ndo la anande lo nɔmba lɛɛta lotshungɔ la vɔ kakitɔna. Lo mɛtɛ, etena kafundama Okristo ɔmɔtshi dia nde tonaka dia kotshɛ ase nkumbo kande ehomba awɔ, dikumanyi dia Akristo pombaka sɛdingola dikambo sɔ dimɛna dimɛna. Onto kokaka mbitshanyema oma l’etshumanelo naka nde halange kotsha ehomba w’ase nkumbo kande.
Dikɔmɔdi diamboleka. Olonganyi ɔmɔtshi wasalɛ olonganyi okina akambo la ngala tshɛ mbeyaka ndjodja yônge ndo lɔsɛnɔ l’osekande lo wâle. Naka olonganyi wasala akambo asɔ ekɔ Okristo, kete dikumanyi pombaka sɛdingola dikambo sɔ dimɛna dimɛna dia mbeya kana ekɔ mɛtɛ. Onto lomala lo yoho ya tshambandeko ndo lasala awui wa ngala kokaka mbitshanyema oma l’etshumanelo.—Ngalatiya 5:19-21.
Mbidjaka lonyuma l’olonganyi ande lo wâle. Olonganyi ɔmɔtshi mbeyaka tetemala nyanga dia shimba osekande dia ndjasha l’ɔtɛmwɛlɔ wa mɛtɛ ndo mbotshutshuyaka dia nde sekola ɛlɛmbɛ waki Nzambi lo weho ɛmɔtshi. L’etena kɛsɔ, Okristo wahɛnyahɛnyama mbeyaka menda dia kana nɔmba okakitɔnelo le lɛɛta mbele yoho yâmɛ ya nde ‘kitanyiya Nzambi oko wende owandji lo dihole dia anto.’—Etsha 5:29.
Lo akambo wa lânde asɔ tshɛ womaso la sɛdingola, ndoko onto lahomba tshutshuya olonganyi wele kema l’onongo dia nde kakitɔna l’osekande kana dia nde mbidjasɛ la nde. Kânga mbakoka angɛnyi wambotshunda lo nyuma ndo dikumanyi mbisha ekimanyielo ndo alako w’oma lo Bible, vɔ hawokoke mbeya kiambokambo tshɛ yatomba lam’asa wadi l’omi. Paka Jehowa oto mbakoka mɛna. Lo mɛtɛ, Okristo hatɛnya dia nde nɛmiyaka Nzambi ndo yɛdikɔ ya diwala naka nde mbidjaka oshimu esɔ lo ekakatanu wa lo diwala diawɔ l’oyango wa kakitɔna l’olonganyi ande. Jehowa mbeyaka kiambokambo tshɛ yatshutshuya onto dia nde kakitɔna l’olonganyi ande oyadi kânga nde koyishɛka. Lo mɛtɛ, “diango tshe dieko etakataka ndu diatenamaka hwe la ntundu ka ashu wa one lahumbasu [ndjokoya la nde].” (Heberu 4:13) Koko naka dui dimɔtshi dia wâle diekɔ lo tetemala salema, kete ndoko onto lakoka mɔnyɔla Okristo wambɔsa yɛdikɔ ya kakitɔna l’olonganyi ande. L’ekomelo, “shu tshe tayemala l’elumbwelu la ntundu ka [Nzambi].”—Romo 14:10-12.