‘Tokambɛke Jehowa Olimu l’Ɔngɛnɔngɛnɔ’

1. Kakɔna kakoka monga kiɔkɔ y’ɔngɛnɔngɛnɔ w’efula l’ekambi wa Jehowa?

¹ Ɔpɔstɔlɔ Paulo akafunde ate: “Nyongenangenaki le Khumadiondjo tena tshe. Dimi lambunyutela ntu nti: Nyongenangenaki!” (Fil. 4:⁠4) Diɛsɛ dia sambisha lokumu l’ɔlɔlɔ ndo dia kimanyiya anto wele oko ɛkɔkɔ dia vɔ tɛmɔla Jehowa ekɔ kiɔkɔ y’ɔngɛnɔngɛnɔ w’efula. (Luka 10:17; Etsha 15:3; 1 Tes. 2:19) Ɔnkɔnɛ, naka sho mɛnaka dia tena dimɔtshi sho shishaka ɔngɛnɔngɛnɔ l’olimu aso, kakɔna kakokaso sala?

2. Ngande wele mbohɔka nshi tshɛ ɔnɛ lele kiɔkɔ y’olimu aso toshaka ɔngɛnɔngɛnɔ?

² Olimu Wakatosha Nzambi: Ohɔ di’ɔkɛndɛ aso wa sambisha ndja oma le Jehowa. Eelo, tekɔ la diɛsɛ dia monga “ekambi kame la [Nzambi]” lo sambisha losango la Diolelo ndo lo mbetɛ anto ambeki! (1 Kor. 3:⁠9) Yeso Kristo ekɔ kâmɛ la so l’olimu ɔsɔ wahasalemaki nto pondjo. (Mat. 28:​18-20) Andjelo nto ndjashaka tshɛ l’olimu ɔsɔ ndo wekɔ lo kamba kâmɛ la so lo dinela dia woke dia lo nyuma diasalema kakianɛ. (Etsha 8:26; Eny. 14:⁠6) Afundelo, ndo awui wakakomɛ ekambi wa Nzambi mbishaka djembetelo yɛnya hwe dia Jehowa sukɛka olimu ɔsɔ. Ɔnkɔnɛ, lam’asambishaso, sho tshɔka “uku wane wakatumama uma le [Nzambi], la lu ashu a [Nzambi], [kâmɛ la] Kristu.” (2 Kor. 2:17) Ɔsɔ mɛtɛ ekɔ ɔkɔkɔ w’ɔngɛnɔngɛnɔ!

3. Ngande watokimanyiya dɔmbɛlɔ dia sho namaka ɔngɛnɔngɛnɔ aso l’olimu waki Nzambi?

³ Dɔmbɛlɔ ekɔ ohomba dia namaka ɔngɛnɔngɛnɔ aso l’olimu waki Nzambi. (Ngal. 5:22) Lam’ele sho kokaka kamba olimu waki Nzambi paka oma lo wolo ande, ekɔ ohomba sho mbɔlɔmbaka nyuma kande l’otema ɔtɔi, nɛ dia nde tokishaka la lokaho tshɛ wanɛ wɔlɔmbatɔ. (Luka 11:13; 2 Kor. 4:​1, 7; Ef. 6:​18-20) Nɔmba lo dikambo di’olimu aso ayotokimanyiya dia nama kanyi y’ɔlɔlɔ lam’ahomanaso la wendjudi. Dɔmbɛlɔ diayotokimanyiya dia tetemala sambisha la dihonga ndo l’ɔngɛnɔngɛnɔ.​—⁠Etsha 4:​29-31; 5:​40-42; 13:​50-52.

4. Ngande wele ɔlɔngɔswɛlɔ wa dimɛna tokimanyiyaka dia pamia ɔngɛnɔngɛnɔ aso l’esambishelo, ndo naa toho tɔmɔtshi tokokiso ndjalɔngɔsɔlaka?

⁴ Toyalɔngɔsɔlake Dimɛna: Yoho mɔtshi ya dimɛna ya pamia ɔngɛnɔngɛnɔ aso l’esambishelo ele lo ndjalɔngɔsɔla dimɛna. (1 Pet. 3:15) Ɔlɔngɔswamelo wa ngasɔ halɔmbɛ wenya efula. Vɔ mbɔsaka minitɛ ngana tsho dia vusola mbɔtwɛlɔ yakashama dikambo dia periodikɛ yêke katomba kana mbɔtwɛlɔ kɔtɔnganɛ l’ekanda wakayalɔngɔsɔdi dia tokahɛ anto. Dia kondja mbɔtwɛlɔ kahombama, wɛ kokaka menda lo biukubuku Woho wa Tatɛ ndo Tetemala kana numɛlɔ y’edjedja y’Olimu Aso wa Diolelo. Apandjudi amɔtshi mɛnaka di’ekɔ ohomba funda mbɔtwɛlɔ kɛmɔtshi lo tshena pe lo kiatshikatshi mɔtshi. Mbala la mbala, vɔ mbokaka sso lo kiatshikiatshi shɔ dia mbohɔ akambo wakawafunde. Kɛsɔ mbakimanyiyaka dia minya wɔma ndo mbashaka eshikikelo dia sambisha la dihonga.

5. Ɛlɔlɔ akɔna watela ɔngɛnɔngɛnɔ ndo welawɔ anto akina?

⁵ Ɔngɛnɔngɛnɔ mbelaka ɛlɔlɔ efula. Eongelo k’ɔngɛnɔngɛnɔ pamiaka nɛmɔ diele la losango laso. Ɔngɛnɔngɛnɔ keketshaka ekikelo kaso. (Neh. 8:10; Heb. 12:⁠2) Lâdiko dia tshɛ, olimu wakambaso l’ɔngɛnɔngɛnɔ tombolaka Jehowa. Ɔnkɔnɛ, nyɛsɔ “[tu]kambelaki [Jehowa] olimu l’ongenongeno.”​—⁠Osam. 100:⁠2.

Woho wa Mbisha Anto Periodikɛ

(Numɛlɔ kele bu l’ɔtɛkɛta anyu, ko nyu menda lo Falase)

Tshoto y’Etangelo Ngɔ. ka 10, 15

MBEWOYAKA DIOLELO DIAKI JEHOWA

“Tɛdikɔ efula tɔsaso mongaka la shɛngiya ya wolo efula lo lɔsɛnɔ laso. Kakɔna kakoka tokimanyiya dia mbewɔ mbɔsa tɛdikɔ taha la lomba? [Tshikande akadimole. Oma lâsɔ adia Tukedi 3:⁠6.] Tshoto y’Etangelo nyɛ mbishaka alako atanu wotombi oma lo Bible wakoka tokimanyiya dia sho mbɔsa tɛdikɔ ta lomba.”

Réveillez-vous! Ngɔ. ka 10, 22

“Onde wɛ mɛnaka dia mbala efula, sho mbokaka anto watɛkɛta dikambo dia mikrɔbɛ wahavu kânga onto kɔnɔka ekanga? [Tshikande akadimole.] Periodikɛ kɛnɛ mɛnyaka ɛkɔkɔ wa dikambo sɔ ndo kɛnɛ kakokaso sala dia ndjakokɛ. Ndo tɔ nembetshiyaka nto daka dia lo Bible diendana l’andja ɔnɛ wele ndoko onto layotata.” Adia Isaya 33:⁠24.

Tshoto y’Etangelo Ngɔ. ka 11, 1

MBEWOYAKA DIOLELO DIAKI JEHOWA

“Tena dimɔtshi ambotokomɛka sho tshɛ dia shisha wɛkamu aso le onto ɔmɔtshi. Ko onde wɛ amboyambolaka wate: ‘Onde lekɔ l’onto ɔmɔtshi lakokami monga la wɛkamu le nde? [Tshikande akadimole. Oma lâsɔ adia Tukedi 3:⁠5.] Periodikɛ kɛnɛ nembetshiyaka lande na kakokaso kitsha wɛkamu aso tshɛ le Nzambi. Ndo tɔ mɛnyaka nto nganɛ wakokaso shikikɛ anto wakokaso kitsha wɛkamu aso le wɔ.”

Réveillez-vous! Ngɔ. ka 11, 8

“Diangɔ diosadimi oma l’ekimanyielo ka pitilɔ diekɔ la shɛngiya lo suke la weho w’akambo tshɛ wa lo nsɛnɔ yaso. Onde wɛ amboyambolaka dia mbeya ngande wotoyala lɔsɛnɔ naka diangɔ sɔ kema? [Tshikande akadimole.] Periodikɛ kɛnɛ nembetshiyaka woho wamboyokoma yoho y’esɔ shɔ ohomba efula lo tshunda di’anto dia nshi nyɛ. Yɔ nembetshiyaka nto lande na kahatakoke mboka wɔma ɔnɛ lushi lɔmɔtshi pitilɔ koka ndjoshila.”