‘Nyoyalɔngɔsɔlake’

¹ Lo prɔfɛsiya kande ka woke kendana l’ekomelo ka dikongɛ di’akambo nɛ, Yeso akasha ɔhɛmwɛlɔ lo kɛnɛ kendana la tshelo ya ndjasha tshɛ l’ekiyanu wa lushi la lushi wa lo lɔsɛnɔ. (Mat. 24:​36-39; Luka 21:​34, 35) Lam’ele fɔnu ka woke koka ndja l’etena tshɛ, ekɔ ohomba dia sho ndjela dako diaki Yeso diata ɔnɛ: “[Nyoyalɔngɔsɔlake], ne dia On’a untu ayuya lu unya wahanyalungamela.” (Mat. 24:44) Kakɔna kakoka tokimanyiya lo dikambo sɔ?

² Tɔlɔshane l’Ekiyanu ndo la Tɔkɛnyɔ Takoka Tekola Yimba: Djonga mɔtshi ya lo nyuma yahombaso mbewɔ ele ‘ekiyanu wa lo lɔsɛnɔ.’ (Luka 21:34) Lo wedja ɛmɔtshi, wola, ohombelo w’elimu, ndo woho waya lɔsɛnɔ wolo salaka di’anto monga l’okakatanu dia kotsha ehomba awɔ wa lo lɔsɛnɔ. Lo wedja ekina, monga la mbo ya l’emunyi bu dikambo dia wolo. Naka toyakiyanyaka tsho paka dikambo dia mbo ya l’emunyi, kete tekɔ lo wâle wa minya yambalo yaso oma l’akambo wayosala Diolelo. (Mat. 6:​19-24, 31-33) Nsanganya y’Akristo tokimanyiyaka dia mbidja yambalo yaso l’awui wayosala Diolelo. Onde wɛ ndjadjɛka oyango wa mbɔtɔka l’oseka losanganya tshɛ?​—⁠Heb. 10:​24, 25.

³ Ɛlɔ kɛnɛ andja wambolola tɔɔ la tɔkɛnyɔ takoka tomanɛ wenya aso w’ohomba esadi eto. Okambelo wa l’ɔrdinatɛrɛ kokaka ndjokoma djonga naka onto oshisha wenya efula lo menda akambo wa l’Ɛtɛrnɛtɛ, lo mbadia kana lo toma mikanda lɔkɔ, kana lo kɛnya tɔkɛnyɔ tɔmɔtshi ta l’ɔrdinatɛrɛ. Sho kokaka shisha wenya waheyama mbadia lo menda televisiɔ, waa filmɛ, tɔkɛnyɔ, lo wadielo w’ekanda w’ase andja ɔnɛ, ko tshikala paka la yema ya wenya ndo ya wolo tshitshɛ dia kotsha eyango aso wa lo nyuma. Kânga mbele tɔkɛnyɔ kana mbɔsa yema ya lɔpɛpɛ koka tosha ekeketshelo lo tshanda mɔtshi, wekelo wa Bible w’onto ndamɛ ndo wa lo nkumbo mbelaka wahɔ wa pondjo. (1 Tim. 4:​7, 8) Onde wɛ tshungolaka etena dia kana yimba l’Ɔtɛkɛta waki Nzambi lushi tshɛ?​—⁠Ef. 5:​15-17.

⁴ Ande lowando lakoka monga laso lo woho wambɔlɔngɔsɔla ɔlɔngɔswamelo wa Jehowa ekongelo ka lo nyuma dia tokimanyiya dia “mpanda lu akambu tshe wayuya, la dia memala la ntundu ka On’a untu”! (Luka 21:36) Nyɛsɔ tosale tshɛ dia kondja wahɔ oma lo tɛdikɔ tɔsɔ ta lo nyuma ndo ‘toyalɔngɔsɔlɛ’ dia mbetawɔ kaso monga “la diandu la lutumbu la kenemo l’enelo ka Jesu Kristu.”​—⁠1 Pet. 1:⁠7.

Lowando Keketshaka

¹ Kiɛndakɛnda mɔtshi ya womoto akalelaka wonya wa nde ndala ata ate: “Onde dimi hamongi ɔna l’ɔlɔlɔ ɛlɔ?” Wombola ɔsɔ akâmbia nyango. Kânga mbakandɛnyi woho wakasale ɔnande ɔsɔ la wolo dia monga la lɔkɛwɔ la dimɛna lushi lɔsɔ, nyango kombotɛ kânga tshɛkɛta tshɔi ya lowando. Woho wele kiɛndakɛnda shɔ akalelaka nɛ dia vɔ kombotɛ kânga tshɛkɛta tshɔi ya lowando toholaka dia ɔm’ɔmɔ l’atei aso, oyadi dikɛnda kana opalanga, tekɔ l’ohomba wa lowando. Onde sho keketshaka wanɛ wotodingi lo mandolaka ɔlɔlɔ wasalawɔ?​—⁠Tuk. 25:⁠11.

² Tekɔ l’ɛkɔkɔ efula wa mandola asekaso Akristo. Dikumanyi, ekambi w’olimu, ndo ambatshi mboka kambaka la wolo dia kotsha ɛkɛndɛ awɔ. (1 Tim. 4:10; 5:17) Ambutshi woka Nzambi wɔma salaka la wolo dia mbodia an’awɔ lo mboka ya Jehowa. (Ef. 6:⁠4) Ɛlɔngɔlɔngɔ l’esekaseka w’Akristo ndjaketembolaka dia shika tanga la ntondo ka ‘yimba ya l’andja ɔnɛ.’ (1 Kor. 2:12; Ef. 2:​1-3) Akina wekɔ lo kambɛ Jehowa la kɔlamelo kânga mbayawɔ esombe, mbewɔ la waa hemɔ, kana asui akina. (2 Kor. 12:⁠7) Anto asɔ tshɛ sunganaka mandɔma. Onde sho mbetawɔka welo awɔ wasungana mandɔma ɛsɔ?

³ Le Onto Ndamɛ ndo la Lânde: Sho tshɛ ngɛnangɛnaka mɛtɛ etena kalongolaso lowando oma lo lɔyɛnga. Koko, lowando ndeka mbisha ekeketshelo lam’alilongolaso sho shɔamɛ. Ɛnyɛlɔ, lo tshapita 16 ya mukanda wakandafundɛ ase Rɔma, Paulo akandola Febi, Piriskila la Akula, Turufina la Turufosa, ndo Perisi lo yoho ya lânde, l’atei w’anto akina. (Romo 16:​1-4, 12) Ande ekeketshelo kakahombe monga l’ɛtɛkɛta ande ɛsɔ le akanga wa kɔlamelo asɔ lee! Lowando la ngasɔ shikikɛka anangɛso l’akadiyɛso dia vɔ wekɔ ohomba ndo dikambo sɔ ndeka tokakatanya kâmɛ. Onde êke esadi woshayɛ onto lowando lo yoho ya lânde?​—⁠Ef. 4:⁠29.

⁴ Oma k’Ɛse Otema: Dia mbisha ekeketshelo ka mɛtɛ, lowando pombaka tomba oma k’ɛse otema. Anto koka tshikitanya kana tekɔ lo tɛkɛta oma k’ɛse otema kana tekɔ lo ‘mbâshimboya tsho lâdiko w’ɛlɔmɔ.’ (Tuk. 28:23) Naka tayoyasha dia mɛna waonga w’ɔlɔlɔ wele l’anto akina, kete otema aso ayotshutshuyama dia mbawandola. Nyɛsɔ tosale tshɛ woho wa mbishaka anto lowando la mɛtɛ, teya dia “mvuta diui diukuki mvutama, eli ololo efula!”​—⁠Tuk. 15:⁠23.