¹ Ehomɔ kɛmɔtshi koleka anto kamba la tɔ dia mbewoyana nsango ɛlɔ kɛnɛ ko Internet. Kânga mbele kema kɔlɔ mbewoya ase nkumbo kana angɛnyi akambo kana tokanyi tele laso oma l’ekimanyielo k’internet, naa “akambu w’anyanya” wakoka mendana l’okambelo wa tshambandeko wa l’Internet na?​—⁠Tuk. 12:⁠11.

² Tonge la Yewo l’Okambelo wa l’Internet: Anto amɔtshi mɛnaka dia vɔ ndeka mbeya nsango y’oma l’ɔlɔngɔswamelo waki Jehowa, etena kalongolawɔ nsango y’eyoyo l’Internet. Nsango shɔ mbeyaka monga akambo wakakomɛ anangɛso amɔtshi, waewoyelo wendana l’akambo wakete lo Bɛtɛlɛ, alapɔlɔ wendana la mpokoso kana ɛhɛnyɔhɛnyɔ ɛmɔtshi, kana akambo wa toseke wakewoyama lo Kalasa k’Olimu wa Diolelo. Amɔtshi sasɛka dia toma nsango ya ngasɔ, la kanyi y’ɔnɛ nde onge onto la ntondo la mbewoya angɛnyi ande akambo asɔ.

³ Mbala efula anto wakɔndɔla akambo mbâtshikitanyaka kana ndekaka mbidja oshimu esɔ. Kana ondo lo sala la wolo dia nyomoleka mɔtsha dikambo, anto amɔtshi mbeyaka ndjota kɛnɛ kele bu tshɛ mɛtɛ. Tena efula wanɛ wasaka lokomba dia mbewoya akambo wa ngasɔ haweye akambo tshɛ wendana la dikambo diakɔ. (Tuk. 29:20) Mbala mɔtshi, kânga dikambo diahakoke mbetawɔma, kokaka mɛnyama oko dikambo diele ohomba. Alapɔlɔ wa kashi ndo wanganyiya anto wa ngasɔ wekɔ l’atei w’“ekondo w’anyanya” wahɛnya yimba y’omamemelo le Nzambi.​—⁠1 Tim. 4:​6, 7.

⁴ Naka wɛ ambotomɛ onto okina losango lɔmɔtshi lele bu mɛtɛ, kete lo yɛdikɔ mɔtshi wɛ ekɔ l’ɔkɛndɛ w’etombelo wa kɔlɔ wakoka tomba oma lo losango lɔsɔ. Lam’akawayotɛ Davidi losango lakawadje oshimu esɔ ɔnɛ wambodiaka anayɛ w’apami tshɛ, nde “akatshatsha ahondo” la kandji. Koko lo mɛtɛ, aki paka ɔnande la pami ɔtɔi oto mbakavu. Kânga mbakahombe nyɔi k’ɔn’ɔsɔ mbisha Davidi kandji, woho wakawadje oshimu esɔ akaleke mbosha lɔkɔnyɔ. (2 Sam. 13:​30-33) Lo mɛtɛ, sho hatohombe sala oseka dikambo tshɛ diakoka munganyiya kana tɛwɔla anangɛso l’akadiyɛso.

⁵ Tshimbo Yewoya Nzambi Akambo: Tatohɛke dia Shɛso lele l’olongo tewoyaka akambo oma lo tshimbo yamɛ, mbut’ate ‘ɔhɔmbɔ wa kɔlamelo ndo wa kɛsɔ.’ ‘Ɔhɔmbɔ’ ɔsɔ mbele l’ɔkɛndɛ wa menda akambo wele ohomba mbewoyama le asekawɔ ambetawudi kamɛ ndo ‘wonya’ wahomba akambo akɔ mbewoyama. Sho nongolaka diangɔ dia ndɛ dia lo nyuma sɔ paka oma lo tshimbo y’ɔlɔngɔswamelo wa teokrasi. Sho pombaka nshi tshɛ nongamɛka oma lo tshimbo yakasɔnɛ Nzambi dia tewoyaka akambo, koko aha le wanɛ wakamba l’Internet.​—⁠Mat. 24:⁠45.

⁶ Adrɛsɛ w’Internet: Tekɔ l’adrɛsɛ aso w’Internet weyama, adrɛsɛ akɔ ko: www.watchtower.org. Oma lo tshimbo y’adrɛsɛ ɔsɔ mbahomba anto tshɛ kondja sango yendana laso. Ndoko ohomba w’onto, tshunda di’anto kana etshumanelo tonga adrɛsɛ okina dikambo di’Ɛmɛnyi wa Jehowa. Amɔtshi wakatomɛ angɛnyi awɔ ɛtɛ w’awui wofundami wa l’ekanda aso kâmɛ l’avɛsa ndo wa rɛferansɛ tshɛ wokambemi lawɔ lɔkɔ, ndo kɔpi y’awui wendana la nsanganya ya weke lo nɔmba woshasha. Oyadi kânga tekɔ la wahɔ ɔmɔtshi kana bu lo toma nsango ya ngasɔ, yoho ya sangola ndo kahanya ekanda waki Société Watchtower lo tshimbo y’Internet ekɔ odiakelo w’ɔlɛmbɛ wendana l’osangwelo wa mikanda. Kânga mbele amɔtshi koka mɛna dia ɔsɔ ekɔ yoho ya kimanyiya anangɛso, tshelo shɔ hayetawɔma ndo pombaka komɛ.

⁷ Monga l’ekanelo k’ɔlɔlɔ ndo la yimba ya dimɛna etena kewoyanaso nsango lo tshimbo y’Internet ayɛnya dia timba taso ndola la ‘akambo w’ɔlɔlɔ ndo w’oshinga wolo.’​—⁠Tuk. 24:⁠4.

Woho wa Mbisha Anto Periodikɛ

(Numɛlɔ kele bu l’ɔtɛkɛta anyu, ko nyu menda lo Falase)

Tshoto y’Etangelo Ngɔ. ka 9, 15

MBEWOYAKA DIOLELO DIAKI JEHOWA

“Miliyɔ y’anto mbetawɔka ɔnɛ ‘asato’ wekɔ la wolo wa lânde ndo ɔnɛ ekɔ dimɛna nɔmba Nzambi oma lo tshimbo yawɔ. Akanyiyayɛ lo dikambo sɔ na? [Tshikande akadimole.] Tende kɛnɛ kakate Yeso Kristo. [Adia Joani 14:⁠6.] Ɛtɛkɛta ɛnɛ munyiyaka wembola ɛmɔtshi lo kɛnɛ kendana la nɔmba Nzambi oma lo tshimbo y’‘asato.’ Numɛlɔ kɛnɛ ka Tshoto y’Etangelo tɛkɛtaka dikambo di’ohomba sɔ.”

Réveillez-vous! Ngɔ. ka 9, 22

“Anto efula wekɔ lo ndjakiyanya ɛlɔ kɛnɛ lo dikambo di’awui dengalenga ndo lo kɛnɛ kendana l’okambelo wa l’ekoma wadjawɔ mikrɔbɛ l’etei. Onde wɛ fɔnyaka dia mandji y’anto yayokoka shidiya awui wa dengalenga l’andja ɔnɛ? [Tshikande akadimole.] Bible mɛnyaka kɛnɛ kayanga sala Nzambi. [Adia Ezekiyele 34:28.] Réveillez-vous! ɔnɛ sɛdingolaka awui amɔtshi wendana l’akambo asɔ.”

Tshoto y’Etangelo Ngɔ. ka 10, 1

MBEWOYAKA DIOLELO DIAKI JEHOWA

“Anto efula wekɔ lo ndjambola dia kana efukutanu tshɛ wɛnaso ɛlɔ kɛnɛ wayoshila, ɛnyɛlɔ oko ata, awui wa ngala ndo akambo wa wɔma. Akanyiyayɛ lo dikambo sɔ na? [Tshikande akadimole.] Bible tokeketshaka l’ɛtɛkɛta ɛnɛ. [Adia Osambu 37:​10, 11.] Periodikɛ kɛnɛ mɛnyaka lande na kele Nzambi atakomiya kɔlɔ ndo asui waya oma lɔkɔ.”

Réveillez-vous! Ngɔ. ka 10, 8

“Ɛlɔ kɛnɛ tekɔ lo mɛna dia lofulo l’ambutshi wodia ana vamɛ lekɔ lo tadɛ woho w’anyanya. Bible mɛnyaka di’Otungi aso ekɔ lo mbaoka kɛtshi. [Adia Osambu 146:⁠9.] Réveillez-vous! ɔnɛ mɛnyaka woho wakoka atɔndɔ wa lo Bible kimanyiya ambutshi wodia ana vamɛ dia vɔ tondoya dikambo sɔ.”