Etetemalo Kekɔ la Difuto

¹ ‘Oma lo etetemalo kanyu, mbayonyoshimbela anima anyu.’ (Luka 21:19) Ɛtɛkɛta ɛsɔ watanema lo prɔfɛsiya kaki Yeso kendana la ‘ekomelo ka dikongɛ di’akambo nɛ,’ tôkiyaka hwe ɔnɛ dia sho nama olowanyi aso, sho pombaka ndjâlɔngɔsɔla dia ndɔshana l’ehemba efula. Koko oma lo wolo waki Jehowa, onto tshɛ l’atei aso kokaka ‘mbikikɛ edja ndo l’ekomelo’ ndo ‘shimbamɛ.’​—⁠Mat. 24:​3, 13; Fil. 4:⁠13.

² Ɛhɛnyɔhɛnyɔ, hemɔ, ekakatanu wendana l’ekondjelo ndo efukutanu wa lo yimba kokaka konya lushi tshɛ wolo wa mamba. Koko, hatohombe pondjo mbohɛ dia Satana ekɔ lo nyanga woho wa ndanya olowanyi aso otsha le Jehowa. Lushi tshɛ latshikalaso la kɔlamelo otsha le Shɛso ekɔ lushi lokina latokimanyiya dia mbisha okadimwelo lo emamatanya waki Osolanyi. Ande ɔlɔ dia mbeya ɔnɛ “asoi” aso l’etena kadiɛnɛso l’ehemba hawohamɛ lee! Vɔ wekɔ oshinga wolo le Jehowa, ndo olowanyi aso ngɛnyangɛnyaka otema ande!​—⁠Osam. 56:8; Tuk. 27:⁠11.

³ Mbetawɔ Kambɛdiama oma l’Ehemba: Asui kokaka mɛnya wɔdu ɔmɔtshi wa mbetawɔ kana lɔkɛwɔ la kɔlɔ lele l’onto oko, lotamanya kana solo di’aha la lotutsha. Lo dihole dia sho nyanga woho wa mbewɔ kana kumiya ehemba lo toho tahɔtɔnɛ l’Afundelo, sho la dia ndjela dako dia l’Ɔtɛkɛta wa Nzambi diata ɔnɛ: “Etetemalu aluwanya ulimu ato.” Lande na? Nɛ dia woho wakikɛso ehemba la kɔlamelo tshɛ tokimanyiyaka dia sho “nduwana la nkukiama.” (Jak. 1:​2-4) Etetemalo koka tokimanyiya dia monga la waonga w’ohomba efula, oko ekanelo k’ɔlɔlɔ la kɛtshi.​—⁠Romo 12:⁠15.

⁴ Nɛmɔ Diele la Mbetawɔ Kambohembama: Lam’akikɛso ehemba, sho mongaka la mbetawɔ kambohembama kele la nɛmɔ efula lo washo wa Nzambi. (1 Pet. 1:​6, 7) Mbetawɔ ka ngasɔ tokimanyiyaka dia sho tshikala nge l’ehemba wayohomana laso lo nshi yayaye. Ndo nto, sho koka mbetawɔma le Nzambi, ndo dui sɔ keketshaka elongamelo kaso, lo kikonya ɛngɔ ka shikaa le so.​—⁠Romo 5:​3-5.

⁵ Difuto dioleki woke di’etetemalo mbikama epole ɔsɛkɛ lo Jakoba 1:​12, divɛsa diata ɔnɛ: “Untu lakikitala l’ehimba eko la otshoko, ne dia lam’ayunduleka ehimba wulu, ndi ayulungula dembo dia kusu dia lumu.” Omalɔkɔ, nyɛsɔ totshikale nge lo ndjakimɔ kaso le Jehowa, tele l’eshikikelo ɔnɛ nde ayofuta lo yoho y’efula ‘wanɛ watetemala mboka ngandji.’

Tɔlɔmbɔlɛ Wekelo wa Bible Watahame

Etenyi ka 2: Toyalɔngɔsɔlɛ dia Tɔlɔmbɔla Wekelo

¹ Mbetsha dimɛna lo wekelo wa Bible halembetshiya tsho kɛtshanya awui wa lo wekelo kana mboka tsho sso l’avɛsa woshilami. Sho la dia nɔmbɔla wekelo lo yoho yayonanda otema w’ombeki. Dui sɔ nɔmbaka dia sho nɔngɔsɔla wekelo dimɛna efula lo mbidja yimba l’ehomba w’ombeki.​—⁠Tuk. 15:28.

² Woho wa Ndjalɔngɔsɔla: Tatɛ nɔmba Jehowa lo kɛnɛ kendana l’ombeki ndo l’ehomba ande. Lɔmba Jehowa dia nde kokimanyiya woho wa wɛ munanda otema w’ombeki. (Kol. 1:​9, 10) Dia shihodia lokanyi loleki ohomba dimɛna, tshungola etena ka sɛdingola ɔtɛ a dui wa tshapita kana wa wekelo, ɛtɛ w’awui wahɔnyi ndo dihomɔ tshɛ diɛnama diakoka kamba layɛ. Yambola wate: ‘Naa oyango woleki ohomba w’awui wa lo wekelo ɔnɛ? Kɛsɔ ayokokimanyiya dia tɔtɔmiya awui woleki ohomba etena kalɔmbɔlayɛ wekelo.

³ Nyɔsɛdingole odingɔ l’odingɔ la yambalo tshɛ. Shola ekadimwelo lo wembola wofundami, lo mbekɛ oshidi paka lo ɛtɛkɛta kana ditelo di’ohomba. Sɛdingola woho wɔtɔnɛ avɛsa woshilami l’awui woleki ohomba wa l’odingɔ, ndo shikikɛ avɛsa wahomba mbadiema wonya wa wekelo. Wɛ mbeyaka mɛna ohomba funda towuiwui tɔmɔtshi l’ohembo w’okanda w’ekanyu. Ombeki pombaka mɛna hwe ɔnɛ kɛnɛ kekande ndja oma l’Ɔtɛkɛta wa Nzambi.​—⁠1 Tes. 2:⁠13.

⁴ Ɔtɔnganyiya Wekelo l’Ehomba w’Ombeki: Oma lâsɔ, sɛdingola wekelo lo mbeya ehomba w’ombeki. Takanyiyisha wembola wakokande tôka ndo awui wakokande monga l’okakatanu dia mboka kana dia mbetawɔ. Yambola wate: ‘Kakɔna kende l’ohomba dia shihodia kana lende ahombande ndjalowanya dia nde pama lo nyuma? Ngande wakokami munanda otema ande?’ Oma lâsɔ, ɔtɔnganyiya wetshelo ayɛ l’ehomba w’ombeki. Mbala mɔtshi, wɛ mbeyaka mɛna ohomba nɔngɔsɔla ɛnyɛlɔ kɛmɔtshi, olembetshiyelo ɔmɔtshi kana wembola ɛmɔtshi dia kimanyiya ombeki woho wa nde shihodia kitshimudi ya dui kana divɛsa dimɔtshi. (Neh. 8:⁠8) Ewɔ dia mbidja awui akina wahaleke mbɔtɔnɛ la lokanyi loleki ohomba. Ovuswelo wa lo hiembola wa l’ekomelo ka wekelo ayowokimanyiya dia kimɛ awui woleki ohomba.

⁵ Sho mongaka mɛtɛ l’ɔngɛnɔngɛnɔ etena katɔ eyoyo elowa wa losembwe dia lotombo laki Jehowa! (Fil. 1:11) Dia mbakimanyiya woho wa vɔ kotsha oyango ɔsɔ, yalɔngɔsɔlaka dimɛna mbala tshɛ katayatshu teka l’onto Bible.