Esambishelo ka Diolelo ekɔ diɛsɛ dia woke

¹ Lushi la lushi, miliyara y’anto wa lo okama a nkɛtɛ wekɔ lo kondja wahɔ oma lo mbo ya ndɛ yasukɛ lɔsɛnɔ yawasha Jehowa la lokaho tshɛ. (Mat. 5:45) Koko, anto yema tshitshɛ tsho mbele la diɛsɛ diotshikitanyi dia mɛnya lowando lawɔ le Otungi awɔ lo sambisha lokumu l’ɔlɔlɔ la Diolelo dia Nzambi. (Mat. 24:14) Onde wɛ mbɔsaka diɛsɛ sɔ dia woke la nɛmɔ di’efula?

² Esambishelo ka Diolelo mbishaka Nzambi kɛnɛmɔ ndo mbelaka wanɛ wambɔkɔmɔ l’ɔtɛ wa tena di’ofukutanu dia nshi nyɛ elongamelo ndo wɔladi. (Heb. 13:15) Le wanɛ wetawɔ losango lɔsɔ, lɔ nembetshiyaka lɔsɛnɔ la pondjo. (Joa. 17:⁠3) Naa olimu wa l’emunyi washa wahɔ wa ngasɔ? Ɔpɔstɔlɔ Paulo akɛnya lowando lande lo olimu w’esambishelo lo woho wakandakotsha olimu akɔ. Nde akɔsaka olimu akɔ oko ɛngɔ k’oshinga wolo.​—⁠Etsha 20:20, 21, 24; 2 Kor. 4:1, 7.

³ Tɛnya lowando lo diɛsɛ diaso dia woke: Yoho mɔtshi yɛnyaso lowando laso lo diɛsɛ dia sambisha ele lo mbidja yimba dia kamba olimu akɔ dimɛna. Onde sho mbɔsaka etena dia nɔngɔsɔla mbɔtwɛlɔ kayotonanda etema wa ampokami aso? Onde sho kokaka ndowanya akoka aso lo okambelo wa la Afundelo ndo lo okanelo wa la anto yimba? Onde sho kindjakindjaka ɛtshi kaso ka nkɛtɛ? Onde sho mbeyaka woho wa tatɛ ndo wa nɔmbɔla wekelo wa Bible? Oko Akristo wa kɔlamelo wa lo nshi y’edjedja ndo wa nshi nyɛ, kanyi y’ɔlɔlɔ yele laso dikambo dia olimu ɔsɔ mbatotshutshuya dia sala akambo asɔ, ndo sho ngɛnangɛnaka diɛsɛ diaso.​—⁠Mat. 25:14-23.

⁴ Etena kalɔshanaso la ekakatanu wendana la lotshundu l’osombe, yônge ya kɔlɔ, kana ekakatanu ekina, ekɔ ekeketshelo dia mbeya dia welo wadjaso la ohetoheto dia sambisha wekɔ mɛtɛ la nɛmɔ efula. Ɔtɛkɛta wa Nzambi toshikikɛka dia Jehowa mbɔsaka welo wa ngasɔ wadjaso dia mbokambɛ la nɛmɔ, kânga wɛnɛ wahatambiya anto akina.​—⁠Luka 21:1-4.

⁵ Esambishelo ka Diolelo ekɔ kiɔkɔ ya ɔngɛnɔngɛnɔ w’efula. Kadiyɛso kɛmɔtshi kele la ɛnɔnyi 92, akate ate: “Ande diɛsɛ dia mbohɔ ɛnɔnyi 80 wakamayakimɔ dia kambɛ Nzambi aha la lonyangu lee! Naka dimi kokaka nyomotatɛ lɔsɛnɔ lami nto, kete layɔsɛna lo yoho yakɔ yâmɛ nɛ dia ‘ngandji ka lɔsɛngɔ ka Nzambi ndeka lɔsɛnɔ lɔ lɔamɛ.’ ” (Osam. 63:⁠3) Nyɛsɔ sho lawɔ tɔshi la nɛmɔ diɛsɛ dia woke sɔ di’oma le Nzambi, mbuta ate olimu w’esambishelo ka Diolelo.

Tɔlɔmbɔlɛ wekelo wa Bible watahame

Etenyi 12: Tokimanyiya ambeki dia vɔ tatɛ ndo nɔmbɔla wekelo wa Bible

¹ Etena katatɛ ambeki aso wa Bible sambisha, kanyi ya vɔamɛ tatɛ ndo nɔmbɔla wekelo wa Bible wawɔ hita mbeyaka mbaotsha wɔma. Ngande wakokaso mbakimanyiya dia vɔ monga la kanyi y’ɔlɔlɔ lo kɛnɛ kendana la etenyi kɛsɔ k’ohomba ka olimu aso?​—⁠Mat. 24:14; 28:​19, 20.

² Etena kakotsha ombeki wa Bible kɛnɛ kalɔmbama dia monga opandjudi wahatabatizama, kete ondo nde ambotashilaka tatɛ mbisha asawo lo Kalasa k’olimu wa teokrasi. Wetshelo wayondokondja lo nɔngɔsɔlaka ndo lo mbishaka asawo lo kalasa kɛsɔ ayowokimanyiya dia nde pamia akoka wa mbetsha wahombama le ‘okambi waha la dikambo dia mbotshama sɔnyi ndo walembetshiya ɔtɛkɛta w’akambo wa mɛtɛ dimɛna.’​—⁠2 Tim. 2:⁠15.

³ Etsha oma lo ɛnyɛlɔ kayɛ: Yeso aketsha ambeki ande lo mbasha wetshelo wa hwe ndo lo mbasha ɛnyɛlɔ k’ɔlɔlɔ. Nde akate ate: “Untu tshe layumana mbeka, ayuyala uku umbetsha andi.” (Luka 6:40) Ekɔ ohomba efula dia wɛ mbokoya Yeso lo mbisha ɛnyɛlɔ k’ɔlɔlɔ lo olimu ayɛ. Etena kɛna ombeki ayɛ ɛnyɛlɔ kayɛ lo esambishelo, nde ayoshihodia dia oyango wa waendelo w’eyoyo ele dia tatɛ mbeka la anto Bible.

⁴ Lembetshiyande dia etena kasɛngɔlaso onto dia sho tatɛ mbeka la nde Bible, hatongaka nshi tshɛ ohomba dia kɔndɔla oseka kiambokambo tshɛ yendana la wekelo. Mbala efula, ekɔ ohomba mɛnya paka woho wasalema wekelo lo kamba la odingɔ ɔtɔi kana edingɔ ehende oma lo okanda ɔmɔtshi watotekaka la anto Bible. Alako w’ohomba efula wendana la woho wa sala dikambo sɔ tanemaka lo lɛkɛ 8 la Olimu aso wa Diolelo ɔnɛ ndo lo lɛkɛ 6 la numɛlɔ ka Ngɔndɔ ka ntondo 2002.

⁵ Naka kokaka, kete lɔmba ombeki dia nde kotshindɛ wɛ kana opandjudi okina wa manamana le ambeki akina wa Bible. Nde kokaka mbisha kɔmatɛrɛ lo odingɔ ɔmɔtshi kana lo divɛsa dimɔtshi di’ohomba efula. Ɔnkɔnɛ, oma lo ɔsɛdingwelo ombeki ayeka akambo efula lo kɛnɛ kendana la woho wa nɔmbɔla wekelo wa Bible watahame. (Tuk. 27:17; 2 Tim. 2:⁠2) Andolande, ndo ɛnyande woho wakokande ndjalowanya.

⁶ Mbetsha apandjudi w’eyoyo dia vɔ monga embetsha wa Ɔtɛkɛta wa Nzambi ayowakimanyiya dia ntsha ‘olimu w’ɔlɔlɔ’ wa tatɛ ndo nɔmbɔla wekelo wa Bible wawɔ hita. (2 Tim. 3:17) Ekɔ mɛtɛ ɔngɛnɔngɛnɔ w’efula wa kamba kâmɛ la wɔ dia dianganya leeta la ngandji lata ɔnɛ: “One lalanga ose ashi a lumu wososa”!​—⁠Eny. 22:⁠17.