Totate mbeka la anto Bible lawakawɔ ndo lo telefɔnɛ

1, 2. Ngande wakokaso tshikitanya ekongelo kaso ka wekelo wa Bible dia kimanyiya anto wele la elimu efula wa sala?

¹ Ɛlɔ kɛnɛ anto wekɔ la elimu efula wa sala. Koko, efula ndjashaka lo awui wa lo nyuma. Ngande wakokaso mbakimanyiya dia vɔ kotsha ehomba awɔ wa lo nyuma? (Mat. 5:⁠3) Apandjudi efula wekɔ la akoka wa mbeka la anto Bible lawakawɔ kana lo telefɔnɛ. Onde wɛ kokaka pamia olimu ayɛ lo yoho shɔ?

² Dia tatɛ mbeka la anto Bible, sho pombaka ndjalɔngɔsɔla dia tatɛ mbeka la onto Bible etena tshɛ kakondjaso diaaso. Ngande ndo lende akoka dikambo sɔ salema?

3. Lo wendelo aso wa ntondo, lande na mɛnya onto woho wekaso la anto Bible ndo ngande wakoka dikambo sɔ salema?

³ Lawakawɔ: Etena kahomanayɛ la onto lalanga sawola akambo wendana la Bible, fola tsho lo odingɔ ɔmɔtshi wakayatalɔngɔsɔdi, ɛnyɛlɔ oko odingɔ wa ntondo wa wekelo 1 wa lo biukubuku Katɔlɔmba, ko wɛ tatɛ. Adia odingɔ, oka dimbola ndo nyɔkɛtshanya divɛsa ɔtɔi kana avɛsa ahende woshidiwɔ. Mbala efula, dikambo sɔ salemaka lawakawɔ l’edja ka minitɛ tshanu kana dikumi. Naka onto ambɔngɛnangɛna sawo, kete ɔsa yɛdikɔ ya ndjɔsɛdingola odingɔ kana edingɔ ehende wayela mbala kekina.​—⁠Alako akina wendana la woho wa kamba la mbɔtwɛlɔ ya tatɛ wekelo wa Bible kokaka tanema lo Olimu aso wa Diolelo wa Ngɔndɔ ka ntondo 2002, lɛkɛ 4.

4. Ngande wakokaso tatɛ wekelo wa Bible l’anto lawakawɔ etena kasalaso waendelo w’eyoyo?

⁴ Kokaka kamba la yoho yakɔ yâmɛ dia tatɛ mbeka la anto Bible etena kasalaso waendelo w’eyoyo. Ɛnyɛlɔ, wɛ mbeyaka mbɔtshiya biukubuku Katɔlɔmba ndo tɛkɛta dia lokombo la Nzambi, lo kamba la wekelo 2, odingɔ 1-2. Lo wendelo wayaye, nyu koka ndjɔkɛtshanya kɛnɛ kata Bible lo dikambo dia waonga wa Jehowa, lo kamba la odingɔ 3-4. Lo ɔkɛtshanyelo okina, nyu koka ndjɔsɛdingola odingɔ 5-6 ndo osato wa lo lɛkɛ 5 dia tɔtɔmiya woho watokimanyiya wekelo wa Bible dia mbeya Jehowa. Akambo asɔ tshɛ kokaka salema etena kenyu laka onto.

5, 6. a) Lande na kakoka anto amɔtshi kombola mbeka Bible lo telefɔnɛ? b) Mbɔtwɛlɔ kakɔna kakokaso kamba la tɔ etena kalɔmbaso onto ɔmɔtshi dia mbeka la nde Bible lo telefɔnɛ?

⁵ Lo telefɔnɛ: Anto amɔtshi mbeyaka mbetawɔ esadi eto dia mbeka Bible lo telefɔnɛ oleki lo nyu ahende nyɛnana. Tɔsɛdingole ɛnyɛlɔ kɛnɛ: Etena kakandatasambishaka lo luudu la luudu, kadiyɛso kɛmɔtshi akahomana la womoto ɔmɔtshi lele mama ndo lakamba olimu womanɛ wenya tshɛ. Lam’akayongaka kadiyɛso hayokoka mɛnana la nde lakande, nde akɔshi yɛdikɔ ya mbeta lo telefɔnɛ. Womoto ɔsɔ akolembetshiya dia nde mɛtɛ bu l’etena ka kɛtshanya awui wa lo Bible. Kadiyɛso akokadimola ate: “Lo minitɛ 10 kana 15, wɛ kokaka mbeka dui dimɔtshi di’oyoyo kânga lo telefɔnɛ.” Womoto ɔsɔ akokadimola ate: “Dimɛna, naka lo telefɔnɛ kete kokaka!” Aha la tshimbatshimba, wakatatɛ mbeka Bible mbala la mbala lo telefɔnɛ.

⁶ Onde anto amɔtshi wembolayɛ wayetawɔ dia mbekaka lo telefɔnɛ? Wɛ kokaka pemba mbɔtwɛlɔ komaso la kɔndɔla kingo, kana wɛ mbeyaka mbuta tsho ɔnɛ: “Naka wɛ nangaka, kete sho kokaka kɛtshanyaka awui wa lo Bible lo telefɔnɛ. Onde dikambo sɔ diayonga ɔlɔlɔ efula le yɛ?” Lo mbɔtɔnganyiyaka wekelo aso wa Bible la awui wa anto akina, sho mbeyaka mbakimanyiya dia vɔ ‘kondja ewo ka Nzambi.’​—⁠Tuk. 2:5; 1 Kor. 9:⁠23.

Woho wa mbisha anto periodikɛ

(Numɛlɔ kele bu l’ɔtɛkɛta anyu, ko nyu menda lo Falase)

Tshoto y’Etangelo Ngɔ. ka 8, 15

“Etena kavushawɔ onto ɔmɔtshi, anto efula ndjambolaka kɛnɛ katokomɛka anto etena kavɔwɔ. Onde wɛ fɔnyaka dia kokaka shihodia ele nyɔi? [Tshikande akadimole.] Periodikɛ kɛnɛ nembetshiyaka kɛnɛ kata Bible dikambo dia eongelo k’anto wambovɔ. Tɔ nembetshiyaka nto daka diaki Nzambi dia mbolola wakiso wa ngandji wakavu.” Adia Joani 5:​28, 29.

Réveillez-vous! Ngɔ. ka 8, 22

“Onde wɛ mbeyaka dia l’andja w’otondo turismɛ, mbuta ate wɛɛngɔ wele l’oyango wa tɔsɛnya washo lo dihole dimɔtshi kamboleka mbisha anto elimu? [Tshikande akadimole.] Woho woleka anto mɛngɔla dia tɔsɛnya washo lo ahole amɔtshi ekɔ la etombelo w’ɔlɔlɔ ndo wa kɔlɔ. Periodikɛ kɛnɛ sɛdingolaka ɛlɔlɔ ndo kɔlɔ ka kɔpanyi ya wɛɛngɔ wele l’oyango wa tɔsɛnya washo lo dihole dimɔtshi. Tɔ mbishaka wetshelo w’oshika le amɛngɔdi wa l’andja w’otondo.”

Tshoto y’Etangelo Ngɔ. ka 9, 1

“Lo andja ɔnɛ, kɔlamelo ekɔ dionga dialeka mandɔma, koko diele anto efula bu ladiɔ. Shi otonga dimɛna efula naka anto efula monga oko ɔngɛnyi wɔtɛkɛtshiwɔ dikambo diande lânɛ? [Adia Tukedi 17:17. Oma lâsɔ, tshikande akadimole.] Periodikɛ kɛnɛ mɛnyaka ɛlɔlɔ waya oma lo monga la kɔlamelo le nkumbo kaso ndo le angɛnyi aso.”

Réveillez-vous! Ngɔ. ka 9, 8

“Ondo wɛ akambe efula dia mɛna woho wakamba diangɔ dia lo etongelo kâmɛ. [Shila ɛnyɛlɔ kɛmɔtshi koshidiwɔ lo periodikɛ.] Shi ekɔ mɛtɛ kɔlɔ woho wahataleke mɛna nganɛ wakamba anto kâmɛ lam’asawɔ? [Tshikande akadimole.] Periodikɛ kɛnɛ mɛnyaka woho wayanga mbela Nzambi wɔladi ndo diɔtɔnganelo dia dimɛna lo nkɛtɛ kaso kɛnɛ.” Adia Isaya 11:⁠9.