• Tɔlɔmbɔlɛ Wekelo wa Bible Watahame
    Olimu Aso wa Diolelo—2004 | Ngɔndɔ ka dikumi l’ɔtɔi

    • Tɔlɔmbɔlɛ Wekelo wa Bible Watahame

      Etenyi 3: Okambelo wa Dimɛna wa l’Afundelo

      1. Lande na kahombaso mbidja dikako vɔlɛ l’Afundelo wonya wekaso l’anto Bible?

      1 Oyango walɔmbɔlaso wekelo wa Bible ele wa ‘mbetɛ anto ambeki’ lo mbakimanyiya dia vɔ shihodia ndo mbetawɔ wetshelo wele l’Ɔtɛkɛta wa Nzambi ndo kamba lawɔ lo nsɛnɔ yawɔ. (Mat. 28:​19, 20; 1 Tes. 2:13) Ɔnkɔnɛ, wekelo pombaka mbika etshina l’Afundelo. Ntondotondo, ayonga ohomba mɛnya ambeki woho wa nyanga avɛsa amɔtshi wa shikaa lo Bible yawɔ. Ko, ngande wakokaso kamba l’Afundelo dia kimanyiya ambeki wa Bible dia vɔ mpama lo nyuma?

      2. Ngande washikikɛso avɛsa wa lo Bible wahomba mbadiema ndo kɛtshanyema?

      2 Sɔna Avɛsa wa Mbadia: Wonya walɔngɔsɔlayɛ wekelo, enda woho wɔtɔnɛ oseka divɛsa tshɛ dioshilami lo wekelo l’awui wekama, ndo sɔtɔla avɛsa wayadiema ndo wayɔkɛtshanyema wonya wa wekelo. Mbala tshɛ, ekɔ dimɛna mbadia avɛsa wɛnya atshina w’oma l’Afundelo wa waetawɔ aso. Avɛsa wɛnya awui waketaka l’ahole amɔtshi mbeyaka monga ko bu ohomba mbadiema. Dja yimba l’ehomba ndo l’awui wele l’ombeki l’ombeki.

      3. Naa ohomba wa kamba la wembola, ndo ngande wakokaso sala dikambo sɔ?

      3 Kamba la Wembola: Lo dihole dia wɛ nembetshiyaka ombeki wa Bible avɛsa wa lo Bible, lɔmbande dia nde kolembetshiyawɔ. Wɛ koka mbokimanyiya esadi eto dia sala dikambo sɔ lo kamba dimɛna la wembola. Naka olembetshiyelo wa divɛsa mbokɛmaka hwe, wɛ mbeyaka tsho mbɔlɔmba dia nde mbuta woho wasukɛ divɛsa kɛnɛ kotami l’odingɔ. Tena dimɔtshi, wombola kana wembola wa shikaa mbeyaka monga ohomba dia kimanyiya ombeki wa Bible dia nde mbɔsa yɛdikɔ y’ɔlɔlɔ. Naka ekɔ ohomba mbisha elembetshiyelo ekina, kete vɔ mbeyaka mbishama l’ɔkɔngɔ w’ombeki kadimola.

      4. Elembetshiyelo akɔna wele ohomba l’avɛsa wadiaso?

      4 Etɛka Wekelo Wɔdu: Mengenga ka manyi mbeyaka monga paka l’ohomba wa dikuwa diamɛ dia tsheeta nyama kana fudu. Woho akɔ wâmɛ, ombetsha wa manamana bu l’ohomba w’ɛtɛkɛta efula dia tɔtɔmiya dikambo dimɔtshi. Nde kokaka mbewoya dikambo lo yoho ya wɔdu, yokɛma hwe, ndo ya mɛtɛ. Tena dimɔtshi, wɛ mbeyaka monga l’ohomba wa sala eyangelo l’ekanda w’Akristo dia shihodia ndo nembetshiya dikambo dimɔtshi dimɛna. (2 Tim. 2:15) Koko ewɔ dia nyanga dia nembetshiya oseka divɛsa tshɛ dia lo wekelo lo toho tadiɔ tshɛ. Tɛkɛta paka kɛnɛ kele ohomba dia shikikɛ dikambo diatɛkɛtama.

      5, 6. Ngande wakokaso kimanyiya ambeki wa Bible dia kamba l’Ɔtɛkɛta wa Nzambi lo nsɛnɔ yawɔ, ko kakɔna kahombaso mbewɔ?

      5 Ɛnya Woho Wakamba Dimɛna la Divɛsa: Naka kokaka, kimanyiya ombeki wa Bible dia nde mbeya woho wendana avɛsa wa Bible la nde. Ɛnyɛlɔ, etena kasɛdingolanyu Heberu 10:​24, 25 l’ombeki wa Bible wahatatatɛ mbɔtɔ lo nsanganya y’Akristo, wɛ koka tɛkɛta dikambo dia losanganya ɔtɔi ndo mbɔlɔmba dia nde mbɔtɔ lo losanganya lakɔ. Koko towodjake pandju l’olongo. Tshika Ɔtɛkɛta wa Nzambi wôtshutshuya dia nde mbɔsa yɛdikɔ yahombama dia ngɛnyangɛnya Jehowa.​—⁠Heb. 4:12.

      6 Etena keso lo kotsha ɔkɛndɛ aso wa mbetɛ anto ambeki, nyɛsɔ tonge la “ukitanyia a mbetawo” lo kambaka dimɛna l’Afundelo.​—⁠Romo 16:⁠26.

  • Woho wa Mbisha Anto Periodikɛ
    Olimu Aso wa Diolelo—2004 | Ngɔndɔ ka dikumi l’ɔtɔi

    • Woho wa Mbisha Anto Periodikɛ

      (Numɛlɔ kele bu l’ɔtɛkɛta anyu, ko nyu menda lo Falase)

      Tshoto y’Etangelo Ngɔ. ka 11, 15

      MBEWOYAKA DIOLELO DIAKI JEHOWA

      “Anto efula kombolaka monga la yonge ya demba ya dimɛna ndo sɛna edja. Ko naka vɔ kotɛ dia wɛ koka sɛna pondjo pondjo, onde wɛ hɔngɛnangɛna dikambo sɔ? [Tshikande akadimole. Oma lâsɔ, adia Joani 17:⁠3.] Periodikɛ kɛnɛ tɛkɛtaka dikambo dia daka dia lo Bible dia lɔsɛnɔ la pondjo. Tɔ mɛnyaka nto woho wayonga lɔsɛnɔ lam’ayokotshama daka sɔ.”

      Réveillez-vous! Ngɔ. ka 11, 22

      “Lo ɛnɔnyi 20 wetshi ɛnɛ, ehamelo efula wambosalema lo kɛnɛ kendana la eokelo ndo la osakelo wa SIDA. Koko polo ndo ɛlɔ kɛnɛ, anto efula watahotɔ hemɔ kɛsɔ dimɛna. [Ɛnya kiombo yata ɔnɛ: ‘ Idées reçues, ‘ ndo tshikande asha kɔmatɛrɛ.] Periodikɛ kɛnɛ mɛnyaka woho wakoka ambutshi kokɛ anawɔ.” Adia Euhwelu k’Elembe 6:​6, 7.

      Tshoto y’Etangelo Ngɔ. ka 12, 1

      MBEWOYAKA DIOLELO DIAKI JEHOWA

      “Dionga dimɔtshi diatshikitanya anto la waa nyama ekɔ dikoka dia tshikitanya ɔlɔlɔ la kɔlɔ. Lonyangu ko, anto efula wekɔ lo sala awui wa kɔlɔ. Oko le yɛ, lande na kasalawɔ akambo asɔ na? [Tshikande akadimole. Oma lâsɔ, adia Jeremiya 17:9 kana Enyelo 12:⁠9.] Periodikɛ kɛnɛ mɛnyaka kɛnɛ kakoka tokimanyiya dia mbeya ndo sala kɛnɛ kele ɔlɔlɔ.”

      Réveillez-vous! Ngɔ. ka 12, 8

      “Ehamelo w’awui wa tshulatshula atatshikitanya ohomba wa mɛtɛ wele l’onto wa monga l’ɔngɛnyi. Onde wɛ hɛnyi di’etshikitanu wasalema lo tshunda di’anto mbeyaka konya wolo lo nshi yaso nyɛ di’anto monga la lɔngɛnyi la dimɛna? [Tshikande akadimole. Oma lâsɔ, adia Tukedi 18:24.] Periodikɛ kɛnɛ mɛnyaka woho wakokaso kondja ndo tetemala monga l’angɛnyi w’eshika.”