Waewoyelo

◼ Ekanda wayotosha anto Ngɔndɔ ka dikumi l’ɔtɔi: Etshama oma le Ombetsha a woke. Naka ampokami wambota dia vɔ kema l’ana, kete koka mbasha dibuku Ewo kana traktɛ Aimeriez-vous en savoir plus sur la Bible? Ngɔndɔ ka dikumi l’ahende: Onto loleki woke lo tena tshɛ. Ngɔndɔ ka ntondo: Koka mbisha anto dibuku tshɛ diakatombe la ntondo ka 1991. Tshumanelo diele bu la abuku w’edjedja asɔ lo eombelo kawɔ koka mbisha anto dibuku L’humanité à la recherche de Dieu. Ngɔndɔ ka hende: Approchez-vous de Jéhovah.

◼ Omendji-walɔmbɔla kana onto ɔmɔtshi layondɔsɔna pombaka mbɛdika kɔntɛ k’etshumanelo lo Ngɔndɔ ka dikumi l’ahende 1 kana yema l’ɔkɔngɔ kam’atanema etena. Naka nyekɔ la kɔntɛ ka falanga nkina, ɛnyɛlɔ ya ɔlɔngɔswɛlɔ kana ya wokelo, kete pombaka nɔngɔsɔla dia mbɛdika ndo falanga yakɔ. Kam’ayonyotsha wɛdikelo ɔsɔ ko nyu mbewoya etshumanelo l’ɔkɔngɔ wa mbadia alapɔlɔ wa kɔntɛ wa mbala ketshi.

◼ Sekeletɛlɛ ka etshumanelo tshɛ kele la Mbalasa ka Diolelo pombaka momba ekanda wa lɛɛta dimɛna, ɛnyɛlɔ oko: ekanda wa lokombo wakatome biro ka filialɛ, lo dɔsie dielɛwɔ ɔnɛ: “Lɛɛta / Mbalasa ka Diolelo.”

◼ Pombaka tomɛ filialɛ weshasha wadjama lo tɔshɛtɛshɛtɛ ta weshasha ta lo Mbalasa ka Diolelo dikambo di’olimu wakambema lo andja w’otondo ndo dia olimu wa Mbalasa ya Diolelo. Hanyohombe kamba la falanga shɔ dia futa abasa wa lo etshumanelo. Lofulo la falanga yendana la wokelo wa Mbalasa ya Diolelo yakɔshi etshumanelo yɛdikɔ ya kimɔka pombaka mbɔsamaka oma lo falanga ya etshumanelo ko ndjikotsha lâdiko wa nyɛ yadjama lo shɛtɛshɛtɛ ya Falanga yendana la wokelo wa Mbalasa ya Diolelo ko ndjitomɛ filialɛ.

◼ Bandɛ vidɛo ndo DVD Soigner sans transfusion : besoins et droits du patient, ayɔsɛdingɔma lo Losanganya lɔmɔtshi l’olimu lo Ngɔndɔ ka ntondo. Naka ekɔ ohomba, kete pombaka ndjilɔmba oma lo tshimbo ya etshumanelo aha la tshimbatshimba.

◼ Etena tshɛ kakimɔma demandɛ dia Olimu w’ombatshi mboka wa pondjo (S-205), sekeletɛlɛ ka lo etshumanelo pombaka ndjashikikɛ dia ambola tshɛ wakakadimɔmi dimɛna. Lo yoho ya lânde, naka ɔnɛ lolodjisha demandɛ sɔ tshuka kana tshukama, kete nde pombaka funda lokombo l’olonganyi ande ndo lokombo lande l’osanto, etena kakadimolande lo dimbola 2. Nyeye dia le akadiyɛso wambotshukama, filialɛ fundaka nkombo ya waomɛwɔ lo dihole dia nkombo yawɔ. Oko ɛnyɛlɔ, dui sɔ mbishaka diaaso dia atshukanyi mbelamɛ lo Kalasa k’olimu w’ombatshi mboka.

Ngande wakokaso kimanyiya?

¹ Dimbola diata ɔnɛ: “Ngande wakokaso kimanyiya?” mimbɔmaka mbala efula oma le Ɛmɛnyi wa Jehowa etena kokawɔ dia mpokoso kɛmɔtshi kambotomba lo ahole amɔtshi. Oko wadiɛnya ɔkɔndɔ wa lo Etsha 11:​27-30, Akristo wa lo ntambe ka ntondo wakakimanyiya anangɛwɔ wa la Judiya l’ɔtɛ wa ndjala ka kasha kakonge lɛkɔ .

² Nshi nyɛ, ɛlɛmbɛ wendana la okongamelo aso mbetawɔka dia anto kimɔ falanga dikambo dia olimu wa kimanyiya ase kɛtshi ndo anto wasowa oma lo mpokoso y’oma lo diangɔ diakatongama, mpokoso yahɔhɔla anto kana mbakimanyiya lo tena dikina diewɔ l’ohomba w’ekimanyielo.

³ Ɛnyɛlɔ, ɔnɔnyi wetshi, anangɛso efula wakakimɔ falanga dia kimanyiya wanɛ wakadiɛnɛ oma lo mpokoso kɛmɔtshi kelɛwɔ ɔnɛ tsunami kakasalema lo Asie wa lo sidɛ. Ekimanyielo ka l’otema ɔtɔi kɛsɔ k’oma lo tshimbo ya falanga yatomɛso okongamelo dia kimanyiya anto kakandɔma. Koko, etena kakimɔma weshasha dikambo dia mpokoso kɛmɔtshi ka shikaa, ekɔ ohomba lo wedja ɛmɔtshi dia kamba la weshasha ɛsɔ dia kotsha paka oyango wakate ɔnɛ lokimwe woshasha akɔ ndo mbala mɔtshi, kânga ehomba w’anangɛso wambokotshama lo yoho ya dimɛna ndo weshasha wambokimɔma amboleka ndo ehomba awɔ.

⁴ Koko, ekɔ dimɛna dia weshasha wakimɔma dia kimanyiya anangɛso mbidjamaka lo shɛtɛshɛtɛ yendana la olimu wakambema lo andja w’otondo. Falanga shɔ kambemaka olimu dia kimanyiya ndo dia kotsha ehomba wa lo nyuma wa lo nkumbo kaso k’Akristo. Naka l’ɔtɛ w’ɛkɔkɔ ɛmɔtshi ɔnɛ lokimwe falanga kombolaka kakitola woshasha wokimwende dia kimanyiya anto wambohomana la mpokoso kɛmɔtshi kana wele lo dihombo dimɔtshi la weshasha wadjama dikambo di’olimu wakambema lo andja w’otondo, kete eye dia dui sɔ koka mbetawɔma ndo wayokamba la falanga yokimwende dikambo dia ekimanyielo lɛnɛ ele ohomba. Koko, aha onto lakimɔ weshasha ɛsɔ totɛ lɛnɛ ahombaso ndjitoma ndo woho wakokaso kamba la yɔ.

⁵ Woho wadjaso falanga ntondotondo lo shɛtɛshɛtɛ yendana la olimu wakambema lo andja w’otondo kimanyiyaka dia sho monga la falanga efula ya kamba la yɔ lo akambo tshɛ wendana la olimu wa Diolelo lo dihole dia momba falanga paka dia ndjokimanyiya anto wayotanema lo dihombo lo nshi yayaye. Dui sɔ mbɔtɔnɛka la kanyi ya lo Efeso 4:​16, oko wakambaso kâmɛ dia kimɔ kɛnɛ kahombama “dia mbudia dimba, dia dio mpikama lu ngandji.”