Mukanda w’oma le Olui-walɔmbɔla

Asekaso Ɛmɛnyi wa Jehowa wa ngandji:

Ɔpɔstɔlɔ Paulo akakambe la diaaso tshɛ diakandakondjaka dia mɛnya ngandji ndo lowando laki lande otsha le asekande ambetawudi. Nde akafundɛ Akristo wa la Rɔma ate: “Dimi lambuka [Nzambi k]ami lusaka uma le Jesu Kristu lu dikambu dia nyu tshe, ne dia lukumu la mbetawo kanyu lambudiangana lu andja w’utundu.” (Romo 1:8) Lo diolelo di’ase Rɔma di’otondo, Akristo wa lo ntambe ka ntondo asɔ wakeyamaka oma lo mbetawɔ ka wolo kaki lawɔ ndo oma lo ohetoheto waki lawɔ l’olimu w’esambishelo. (1 Tes. 1:8) Diakɔ diele Paulo akokaka anango asɔ ngandji k’efula!

Lo ɛnyɛlɔ ka Paulo, sho mbishaka Jehowa losaka etena tshɛ kakanyiyaso dikambo dianyu. Sho nyokaka ngandji k’efula! Nyu kokaka monga l’eshikikelo dia Jehowa nyokaka ngandji l’onto ndo l’onto. Amɔtshi l’atei anyu wekɔ lo pomana la ɔlɔshamelo wa wolo, koko nyekɔ lo tetemala sambisha. Dihonga diele lanyu ngɛnyangɛnyaka otema waki Jehowa mɛtɛ!​—Tuk. 27:11.

Etena kadianyu ndo kakananyu yimba lo “Etsha w’Ɛmɛnyi wa Jehowa wa nshi nyɛ” wangɛnyangɛnya ndo wakeketsha mbetawɔ wele lo Annuaire wa ɔnɔnyi ɔnɛ, nyayɛna djembetelo y’oshika y’ɔnɛ Nkumadiɔndjɔ Yeso Kristo ‘ekɔ lo tatshu dia tɔlɛmbia ndo dia toshidiya ɛlɛmbiɛlɔ kande’ ndo di’ɔnɛ ehomɔ tshɛ ka ta kayotshulama dia ndɔsha ambeki waki Kristo hatotondoya.​—Eny. 6:2; Is. 54:17.

Paulo akafundɛ Akristo wa la Filipi ɔnɛ: “Dimi latukaka [Nzambi] lusaka . . . ne dia ekimanyelu kanyu ka mbudia lukumu l’ololo.” (Fil. 1:3-5) Ngasɔ mbayaokaso sho ase Olui-walɔmbɔla lo dikambo dianyu. Lo ɔnɔnyi w’olimu 2007, apandjudi 6 691 790 waketsha lofulo la wenya tshɛtshɛ 1 431 761 554 lo sambisha lokumu l’ɔlɔlɔ lo wedja 236 wa lo nkɛtɛ k’otondo. Nyekɔ lo mbidja mɛtɛ welo w’efula dia tetemala dianganya lokumu l’ɔlɔlɔ! Ohonyokanyiya dikambo dia anto nunu nkama wakakimanyiyama diɛsɛ oma lo welo wadjaso kâmɛ. Kɛsɔ mɛtɛ tombolaka Jehowa!

Lo diaaso dikina, Paulo akɛnya dia nde akokaka anango kɛtshi k’efula. Nde akafundɛ anango wa la Tɛsalɔnika ate: “Tatuhoka ulimu anyu wa  . . . [la] eteti k’elungamelu la ntundu ka [Nzambi] le Khumesu Jesu Kristu.” (1 Tes. 1:2, 3) Eelo, mɛtɛ lɔsɛnɔ ndola la ekakatanu. Ekakatanu wekɔ lo tomba, koko ekɔ ohomba sho mbikikɛ. Ekakatanu akɔna walɔshana la yɛ? Onde wɛ ambɔkɔmɔ l’ɔtɛ wa hemɔ kɛmɔtshi ka wolo kahayokosha diaaso dia wɛ ndjasha efula lo olimu waki Jehowa? Onde olonganyi ayɛ wa ngandji wambodjasɛ la yɛ ɛnɔnyi efula oma la ntshɔ lo Shɛɔlɛ? (Tuk. 30:15, 16) Onde wɛ ekɔ lo nyanga olonganyi watɛmɔla Jehowa oko wɛ koko mɛnamaka dia welo wadjayɛ wekɔ lo mbɔtɔ lo ashi, koko kânga mbediɔ ngasɔ wɛ ekɔ lo sala la wolo dia kitanyiya dako di’oma la Afundelo dia tshukana paka lo Nkumadiɔndjɔ? (1 Kor. 7:39) Onde wɛ ekɔ lo sala la wolo dia mbodia anayɛ kânga mbeyɛ l’ekakatanu w’efula wendana la ekondjelo? Oyadi okakatanu akɔna wele layɛ, naka wɛ mbetsha wahɔ wa Diolelo lo dihole dia ntondo, kete wɛ kokaka monga la eshikikelo dia Jehowa ‘hohɛ olimu ayɛ la ngandji kakayɛnya lo lokombo lande.’ Anangɛso la akadiyɛso lee, ‘tanyotshikake dia sala kɛnɛ kele ɔlɔlɔ’!​—Heb. 6:10; Ngal. 6:9.

Kakɔna kayonyokimanyiya dia mbikikɛ? Oko wakidiɔ lo dikambo di’ase Tɛsalɔnika, ‘elongamelo le Nkumɛso Yeso Kristo’ ayonyokimanyiya. Diakɔ diele, Paulo akɛdika “elungamelu ka panda” la engawo kakoka kokɛ Okristo oma lo tokanyi ta kɔlɔ ndo oma lo wengengo.​—1 Tes. 5:8.

Lo mɛtɛ, etena kakikɛnyu la ɔngɛnɔngɛnɔ tshɛ, nyekɔ lo mbisha okadimwelo lo dimbola diakoke Satana diendana la lowandji la lo andja w’otondo. Satana akasɛmɛ dia ekambi waki Nzambi wôkongaka la lokaki ndo di’ɔnɛ kânga mbakokawɔ mbetawɔ kambɛ Nzambi lo tshanda mɔtshi, vɔ wayotshika mbɔtɛmɔla naka ekakatanu wamboleka kana naka dikongɛ di’akambo nɛ diamboviya edja efula oleki woho wakawalongamɛka. Nyekɔ la diaaso dia lânde dia mɛnya dia Diabolo ekɔ kanga kashi! Edja tshɛ katete nshi, mbatanyaleke sukana la etena kayonyolongola ɛtshɔkɔ walongamɛnyu.

Oko wakayangaka Paulo waaso wa mandola anango l’akadiyɛnde l’ɔtɛ wa mbetawɔ ka wolo kaki lawɔ, l’ɔtɛ wakawashaka lonya l’olimu w’esambishelo ndo l’ɔtɛ w’ekikelo kawɔ, sho lawɔ tambokamba la diaaso nɛ dia nyândola ndo nyoshikikɛ ngandji kanyokaso. Nyotetemale kamba olimu w’ɔlɔlɔ!

Sho kombolaka di’ɔnɔnyi ɔnɛ ndola tɔɔ la ɛtshɔkɔ wa lo nyuma.

Anangɛnyu,

Olui-walɔmbɔla w’Ɛmɛnyi wa Jehowa