TSHAPITA 10

Nkudu Kele La Yeso Lâdiko Di’ɛdiɛngɛ

ONDE wɛ mbohɔka lande na kakakome ondjelo ɔmɔtshi waki Nzambi Satana Diabolo?. . . Nsaki kande ka lokaki k’anto mbɔtɛmɔla mbakôtshutshuya dia tɔmbɔkwɛ Nzambi. Onde andjelo akina wakayele lokolo laki Satana?. . . Eelo. Bible mbaetaka ɔnɛ ‘andjelo waki Satana’ kana ɛdiɛngɛ.​—⁠Enyelo 12:⁠9.

Onde andjelo asɔ wa kɔlɔ kana ɛdiɛngɛ wekɔ la mbetawɔ le Nzambi?. . . Bible mbutaka ɔnɛ: ‘Ɛdiɛngɛ mbetawɔka dia Nzambi ekɔ.’ (Jakoba 2:19) Koko etena kɛnɛ, ɛdiɛngɛ ɛsɔ wekɔ la wɔma nɛ dia vɔ mbeyaka ɔnɛ Nzambi ayowasha dilanya l’ɔtɛ w’akambo wa kɔlɔ wakawasale. Kɔlɔ kakɔna kakawasale na?. . .

Bible mbutaka dia andjelo asɔ wakatshike dihole diawɔ l’olongo ko wakaye lanɛ la nkɛtɛ dia ndjɔsɛna oko anto. Vɔ wakasale dui sɔ nɛ dia wakalange ndjeyana vɔ l’ana wa wamato w’elangala waki lanɛ la nkɛtɛ. (Etatelu 6:​1, 2; Jude 6) Eyayɛ lo kɛnɛ kendana l’awui wa dieyanelo?. . .

Dieyanelo salemaka etena kashama pami la womoto kâmɛ ko vɔ sanganya alemba awɔ lo yoho mɔtshi ya lânde. L’ɔkɔngɔ diko, womoto koka tshɔ diemi k’ɔna tatɛ la pama lo dikundju diande. Koko ekɔ kɔlɔ le andjelo dia vɔ ndjakimɔ l’awui wa dieyanelo. Nzambi nangaka dia dieyanelo salema paka lam’asa pami la womoto wotshukami. Lâsɔ naka ɔna ambotɔ, kete wadi l’omi koka mbodia ɔna akɔ.

Lam’akalɔtɛ andjelo alemba w’anto dia ndjeyana la wamato lanɛ la nkɛtɛ, ana wakawote wakole ndo wakakome akongote. Vɔ waki anto w’ekonda efula ndo wakatshelaka anto akina kɔlɔ. Diakɔ diakalɔsha Nzambi mvula ka woke k’elola dia ndjaka anto w’akongote asɔ ndo anto akina wa kɔlɔ tshɛ. Koko nde akatɛ Nɔa dia mbika wato wa luudu kana masuwa wa woke dia shimbɛ anto yema tshitshɛ wakasalaka kɛnɛ kele ɔlɔlɔ. Ombetsha a Woke akate dia ekɔ ohomba mbohɔka kɛnɛ kakasalema lo Mvula k’Elola.​—⁠Etatelu 6:​3, 4, 13, 14; Luka 17: 26, 27.

Etena kakalɔ Mvula k’Elola, onde wɛ mbeyaka kɛnɛ kakasale andjelo wa kɔlɔ?. . . Vɔ wakakolola alemba w’anto wakawalɔtɛ ko wakakalola otsha l’olongo. Koko vɔ kokoka nto monga andjelo waki Nzambi, ɔnkɔnɛ vɔ wakakome andjelo waki Satana kana ɛdiɛngɛ. Ko kakɔna kakakomɛ ana awɔ w’akongote na?. . . Vɔ wakavu la Mvula k’Elola. Ndo anto akina tshɛ waki komonga l’okitanyiya otsha le Nzambi mbakavu.

Tatɛ oma lo nshi ya Mvula k’Elola, Nzambi kombetawɔ nto di’ɛdiɛngɛ ndɔta alemba w’anto. Koko kânga mbahatakoke mbaɛna, ɛdiɛngɛ wekɔ lo tetemala la tshutshuya anto dia vɔ sala akambo wa kɔlɔ efula. Nshi nyɛ mbambowoleka tondja efukutanu efula oleki nshi ya ntondo nɛ dia wakatshanyema oma l’olongo oya lanɛ la nkɛtɛ.

Onde wɛ mbeyaka lande na kahatakoke mɛna ɛdiɛngɛ?. . . Nɛ dia vɔ hawɛnama. Koko sho koka monga l’eshikikelo dia vɔ wekɔ lo nsɛna. Bible mbutaka dia Satana ekɔ lo ‘nkesa anto wa l’andja w’otondo’ ndo ɛdiɛngɛ ande wekɔ lo mbôkimanyiya.​—⁠Enyelo 12:​9, 12.

Onde Diabolo nde l’ɛdiɛngɛ ande koka tokesa kana totshundja ndo sho lawɔ?. . . Eelo, vɔ koka tokesa naka hatɔsɛnyi ɔlɔlɔ. Koko hatohombe mboka wɔma. Ombetsha a Woke akate ate: ‘Diabolo hambaheme.’ Naka sho ndjasukanya le Nzambi, kete nde ayotokokɛ oma le Diabolo l’ɛdiɛngɛ ande.​—⁠Joani 14:⁠30.

Ekɔ ohomba dia sho mbeya akambo wa kɔlɔ wayototshutshuya ɛdiɛngɛ dia sho sala. Ohokanyiya dikambo sɔ yema. Akambo akɔna wa kɔlɔ wakasale ɛdiɛngɛ lam’akawaye lanɛ la nkɛtɛ?. . . La ntondo ka Mvula k’Elola, vɔ wakeyana la wamato, ɔsɔ aki dikambo diele andjelo bu la dikimɔ dia sala. Ɛlɔ kɛnɛ, ɛdiɛngɛ ngɛnangɛnaka lam’ɛnawɔ anto wasekola ɔlɛmbɛ waki Nzambi wendana la dieyanelo. Oko le yɛ, paka anto akɔna wele la lotshungɔ la sala dieyanelo?. . . Wɛ mɛtɛ ambokadimola dimɛna, paka wanɛ wotshukami mbele la lotshungɔ la sala dikambo sɔ.

Ɛlɔ kɛnɛ, akɛnda amɔtshi w’apami la wa wamato salaka awui wa dieyanelo, koko dikambo sɔ bu dimɛna le wɔ. Bible tɛkɛtaka dikambo di’etenyi ka “dimba” dia pami ka diwotshi kana ka dieyanelo. (Akambu w’Asi Lewi 15:​1-3) Ndo womoto ekɔ la tenyi dia demba dia dieyanelo kana dia diwotshi. Jehowa akatonge tenyi dia demba sɔ l’oyango ɔmɔtshi wa lânde wahomba kotshama paka le wanɛ wotshukami. Ɛdiɛngɛ ngɛnangɛnaka lam’asala anto awui washimba Jehowa. Ɛnyɛlɔ, ɛdiɛngɛ ngɛnangɛnaka lam’akɛnya ɔna pami kana ɔna w’omoto l’etenyi kande ka demba ka diwutshi kana ka dieyanelo. Kema sho hatolange ngɛnyangɛnya ɛdiɛngɛ?. . .

Ekɔ dui dikina diangɛnangɛna ɛdiɛngɛ koko Jehowa petshaka dui diakɔ. Onde wɛ mbeyaka dui sɔ?. . . Awui wa ngala. (Osambu 11:⁠5) Awui wa ngala ekɔ awui w’esehe efula ndo wahumuya anto akina. Ohɔ dia kɛsɔ mbakasale akongote w’ana waki ɛdiɛngɛ.

Ɛdiɛngɛ ngɛnangɛnaka nto dia mbotsha anto wɔma. Mbala mɔtshi ɛdiɛngɛ mbetawoyaka anto dia vɔ mbele anto wambovɔka. Vɔ mbeyaka ndo mbokoya awui w’anto wakavu. Yoho shɔ mbakesa ɛdiɛngɛ anto efula dia mbetawɔ ɔnɛ wanɛ wakavu wekɔ la lɔsɛnɔ ndo vɔ koka tɛkɛta l’anto wasɛna. Eelo, ɛdiɛngɛ tshutshuyaka anto efula dia mbetawɔ ɔnɛ watshɛwɔ wamboshilaka la mvɔ wekɔ la lɔsɛnɔ.

Diakɔ diahombaso menda ɔlɔlɔ di’aha Satana nde l’ɛdiɛngɛ ande tokesa. Bible tewolaka ate: ‘Satana atoyaetɛka ndamɛ oko ondjelo w’ɔlɔlɔ ndo ekambi ande salaka woho akɔ wâmɛ.’ (2 Koreto 11:​14, 15) Koko, lo mɛtɛ, ɛdiɛngɛ wekɔ anto wa kɔlɔ. Tende woho wakokawɔ totshutshuya dia sho monga oko vɔ.

Oma lende akondja anto wetshelo w’akambo efula wendana l’awui wa ngala, awui wa mindo wa dieyanelo, awui w’ɛdiɛngɛ, ditongami diahɛnama ndo awui wendana la watshɛso wambovɔka na?. . . Kema oma lo menda akambo amɔtshi wɛnyawɔ lo televiziɔ ndo lo waa filmɛ, lo kɛnya tɔkɛnyɔ tɔmɔtshi ta l’ɔrdinatɛrɛ kana ta lo vidɛo, lo tshimbo y’Ɛtɛrnɛtɛ ndo lo mbadia abuku wa kɔlɔ? Naka sho sala akambo asɔ, onde tayoyasukanya la Nzambi kana tayoyasukanya la Diabolo nde l’ɛdiɛngɛ ande? Akanyiyayɛ lo dikambo sɔ?. . .

Waa na wafɔnyayɛ ɔnɛ vɔ mbalanga dia sho mpokamɛka ndo mendaka akambo wa kɔlɔ?. . . Ekɔ Satana nde l’ɛdiɛngɛ ande. Lâsɔ dimi la yɛ ahombaso sala na?. . . Sho pombaka mbadiaka, mpokamɛka, ndo mendaka akambo wele amɛna le so ndo wayotokimanyiya dia sho kambɛ Jehowa. Onde wɛ koka mbeya akambo amɔtshi w’amɛna wakokaso sala?. . .

Naka sho sala kɛnɛ kele ɔlɔlɔ, kete hatohombe mboka ɛdiɛngɛ wɔma kânga yema. Yeso ndeka ɛdiɛngɛ nkudu ndo ɛdiɛngɛ mbokaka Yeso wɔma. Lushi lɔmɔtshi, ɛdiɛngɛ wakatɛ Yeso la dui dia wolo ɔnɛ: “Undi we ambuya la ndjutudiaka?” (Mako 1:24) Kema tayonga l’ɔngɛnɔngɛnɔ lam’ayoya Yeso dia ndjodiaka Satana nde l’ɛdiɛngɛ ande?. . . Koko la ntondo k’etena kɛsɔ, sho koka ndjashikikɛ dia Yeso ayotokokɛka oma le ɛdiɛngɛ naka sho tetemala mamatana la nde nde la She lele l’olongo.

Tadia 1 Petero 5:​8, 9 ndo Jakoba 4:​7, 8 dia mbeya kɛnɛ kahombaso sala.

[Osato wa lo lɛkɛ 57]

Kakɔna kakasale andjelo anɛ kaki kɔlɔ?

[Osato wa lo lɛkɛ 58]

Lande na kele efukutanu efula la nkɛtɛ nshi nyɛ oleki nshi ya ntondo?

[Esato wa lo lɛkɛ 60]

Akoka tomba naka sho menda awui wa ngala?

[Osato wa lo lɛkɛ 61]

Kakɔna kele dimɛna sho sala?