Ngande wakokaso kimanyiya wanɛ wɔtɔ lo Eohwelo?

1. Wetshelo akɔna wa dimɛna efula wayoshama lo Ngɔndɔ ka sato 22, 2008?

¹ Lo Ngɔndɔ ka sato 22, 2008, miliyɔ y’anto wa lo andja w’otondo wayetshama lo yoho ya dimɛna efula. Wanɛ wayɔtɔ lo Eohwelo wayoka akambo wendana la ngandji k’efula kakɛnya Jehowa anto lo kimɔ tshungo. (Joa. 3:16) Vɔ wayeka akambo wendana la Diolelo ndo woho wayokamba Jehowa ladiɔ dia sala lolango lande lo nkɛtɛ k’otondo. (Mat. 6:9, 10) Vɔ wayɛna ngandji ndo kâmɛ kele la ekambi waki Nzambi ndo wayɛna woho walongɔnaso la wangasanu tshɛ.​—Osam. 133:1.

2. Ngande wakokaso kimanyiya ambeki aso wa Bible wayoya lo Eohwelo?

² Ambeki wa Bible: Ampokami amɔtshi wayonga anto weke ka tatɛ mbeka la so Bible. Towaɛnyanya la anangɛso l’akadiyɛso. Towalembetshiya woho wasalema nsanganya lomingu la lomingu ndo towaetshetsha yema lo Mbalasa ka Diolelo. Etena kayosha ɔtɛkɛtshi sawo, nde ayokeketsha anto asɔ dia vɔ tetemala pama lo nyuma. Wɛ kokaka kamba la kɛnɛ kayondota dia keketsha ambeki ayɛ.

3. Kakɔna kakokaso sala dia keketsha apandjudi wahayosambisha wayɔtɔ lo Eohwelo?

³ Wanɛ wahayosambisha: Anto amɔtshi wayɔtɔ lo Eohwelo wayonga apandjudi wahayosambisha. Tɔshi yɛdikɔ ya mbayayola la wangasanu tshɛ. Tewɔ dia mbaoka ambola kana mbuta awui amɔtshi wakoka mbasha sɔnyi. Yema tshitshɛ l’ɔkɔngɔ wa Eohwelo, dikumanyi pombaka membola wanɛ tshɛ wahayosambisha wakɔtɔ lo Eohwelo, mbawândola lo welo wakawadje dia ndja lo Eohwelo ndo mbaelɛ la wangasanu tshɛ dia vɔ ndja lo losanganya la l’etshumanelo layosalema mbala kayaye.

4. Ngande wakoka ɔmɔmɔ la l’atei aso kimanyiya angɛndangɛnda?

⁴ Angɛndangɛnda: Anto amɔtshi wayɔtɔ lo Eohwelo wayonga angɛnyi aso kana ase nkumbo yaso wakatelɛ. Anto akina wayonga anto walongola akatshi wa leeta etena kasalema esambishelo ka lânde. Naka wɛ ambɛna anto wahayeye, yayolawɔ, shawɔ mɔyɔ ndo sawola la wɔ. Mbeyaka monga ko vɔ watɔtɔka ndoko losanganya. Lam’ayonyosawola, mbolawɔ lɛnɛ adjasɛwɔ. Naka wɛ ntshɔ dia towaenda kana mbaelɛ lo telefɔnɛ nshi ngana tsho l’ɔkɔngɔ wa Eohwelo, kete wɛ kokaka nomialomia nsaki kawɔ ndo mbalɔmba dia mbeka Bible.

5. Kakɔna kakokaso mbuta dia tatɛ wekelo wa Bible?

⁵ Wɛ kokaka kamba la awui wayotama lo sawo dia Eohwelo dia tatɛ wekelo wa Bible lo dibuku Bible etshatɔ lo wendelo w’oyoyo. Ɛnyɛlɔ, ɔtɛkɛtshi ayadia Isaya 65:21-23. Lo wendelo w’oyoyo, wɛ kokaka kalolɛ kɛnɛ kakandate ndo mbuta ɔnɛ: “Layanga kɛnya ɛlɔlɔ ekina wayotokondja diɛsɛ oma lo tshungo.” Oma lâsɔ, sɛdingola la nde lɛkɛ 4-5 la dibuku Bible etshatɔ. Kana wɛ kokaka mbuta ɔnɛ: “Anto efula ndjambolaka dia mbeya etena kakɔna kayotɛna ekotshamelo ka prɔfɛsiya ka Isaya.” Oma lâsɔ, sɛdingola la nde odingɔ 1-3 wa tshapita 9. Yoho kina ya tatɛ wekelo wa Bible lo dibuku Bible etshatɔ ele mbuta kɛnɛ kakate ɔtɛkɛtshi, ko oma lâsɔ mbɛ̂nya woho wekaso l’anto Bible.

6. Waaso akɔna wele laso etena kakitanyiyaso didjango diaki Yeso dia mbohɔka nyɔi kande?

⁶ Nyɛsɔ sho tshɛ toyange waaso wa kimanyiya ambeki wa Bible, apandjudi wahayosambisha ndo angɛnangɛnda wayoya lo Eohwelo. (Luka 22:19) Aha la tâmu, Jehowa ayɔtshɔkɔla welo wayotodja dia ndeka ndjasha lo olimu wa Diolelo.

Woho wa mbisha anto periodikɛ

Tshoto y’Etangelo Ngɔ. ka 3, 1

“Lushi tshɛ, tekɔ lo mboka akambo wendana la asui, hemɔ ndo nyɔi. Onde wɛ atayambolaka dia kana lushi lɔmɔtshi tayotshungɔ oma lo akambo asɔ tshɛ? [Tshikande akadimole.] Divɛsa nɛ dia lo Bible diambosha miliyɔ y’anto elongamelo. [Adia Joani 3:16.] Periodikɛ kɛnɛ kekɔ la ɔtɛ a dui ɔnɛ: ‘Woho wakoka nyɔi ka Yeso koshimbɛ.’”

Réveillez-vous! Ngɔ. ka 3

“Onde wɛ fɔnyaka dia dikanyiyakanyiya ekɔ wâle kana bu wâle? [Tshikande akadimole.] Bible mbutaka dui nɛ. [Adia Isaya 65:11.] Sawo nɛ mɛnyaka dia kana dikanyiyakanyiya mbɔtɔnɛka la wetshelo wa lo Bible.” Tɛkɛta dia sawo diotate lo lɛkɛ 10.

Tshoto y’Etangelo Ngɔ. ka 4, 1

“Onde wɛ holanga mɛna ekotshamelo ka prɔfɛsiya kɛnɛ? [Adia Isaya 2:4. Oma lâsɔ, tshikande akadimole.] Lembetɛ dia Nzambi ayekɛ lonya lo akambo w’anto ndo ‘ayɔlɔngɔsɔla akambo.’ Bible mɛnyaka dia Nzambi ayɔlɔsha ta dimɔtshi dielamɛ ɔnɛ Aramangɛdɔna diayokumiya ata tshɛ. Periodikɛ kɛnɛ mɛnyaka kɛnɛ kelɛwɔ Aramangɛdɔna ndo lande na kahombaso kongɛ ta diakɔ.”

Réveillez-vous! Ngɔ. ka 4

“Onde wɛ fɔnyaka dia tekɔ lo nsɛna lo nshi yɔtɛkɛtami lanɛ? [Adia 2 Timote 3:1-4. Oma lâsɔ tshikande akadimole.] Tekɔ la ɔkɔkɔ w’oshika wa ndjasha efula lo nshi y’ekomelo nyɛ, dikambo yɔ yekɔ lo mɛnya dia akambo w’ɛlɔlɔ wekɔ lo kongɛ anto. Periodikɛ kɛnɛ nembetshiyaka awui asɔ.”