Ɛmɛnyi wa Jehowa akanawɔ lo dikambo dia vɔɔtɛ?

Bible kekɔ la atɔndɔ amɔtshi wokɛma hwe wakimanyiya ekambi wa Nzambi dia vɔ monga la kanyi y’ɔlɔlɔ lo dikambo sɔ. Koko, ndoko tɔndɔ dia lo Bible diɛnya ɔnɛ tshelo ya vɔɔtɛ yɔamɛmɛ yekɔ kɔlɔ. Ɛnyɛlɔ, ndoko kɛnɛ kashimba olui w’ɛnɔmbɔdi wa tshunda dimɔtshi dia vɔ sala vɔɔtɛ dia mbɔsa tɛdikɔ tɔmɔtshi tendana la tshunda diawɔ. Mbala efula, tshumanelo di’Ɛmɛnyi wa Jehowa salaka vɔɔtɛ y’anto memɛ anya l’olongo dia sɔna wenya wa mbɔtɔka nsanganya kana mbetawɔ dia falanga y’etshumanelo tomba lo dikambo dimɔtshi.

Ko lâsɔ, kakɔna kayotota lo dikambo dia vɔɔtɛ yasɔnawɔ ewandji wa pɔlitikɛ na? Lo wedja ɛmɔtshi wayelawɔ demɔkrasi, anto efula, mbuta ate pursa 50 y’anto wa lo wodja, hawotshu dia todja akatshi lushi la vɔɔtɛ. Ɛmɛnyi wa Jehowa lo wedi awɔ, hawɔnyɔla lotshungɔ l’anto la sala vɔɔtɛ; ndo vɔ haweteta dia tatɛka anto ɔnɛ tanyɔvɔtɛke owandji wa pɔlitikɛ kapanda. Vɔ nɛmiyaka ndo kimanɛka la emboledi wasɔnama lo yoho ya dimɛna lo waa vɔɔtɛ ya ngasɔ. (Romo 13:1-7) Lo kɛnɛ kendana l’onto vɔtɛ onto ɔmɔtshi, Ɔmɛnyi wa Jehowa tshɛ mbɔsaka yɛdikɔ oma lo nkum’otema kande kambekiyama la Bible ndo lo ndjela eokelo k’ɔkɛndɛ wele la nde le Nzambi ndo le Lɛɛta. (Mat. 22:21; 1 Pet. 3:16) Lam’ɔsande yɛdikɔ yande hita, Ɔmɛnyi wa Jehowa sɛdingolaka awui amɔtshi.

Ntondotondo, Yeso Kristo akate lo dikambo di’ambeki ande ate: ‘Vɔ kema wa l’andja ɔnɛ, oko wemi kema la l’andja ɔnɛ.’ (Joa. 17:14) Ɛmɛnyi wa Jehowa mbɔsaka tɔndɔ sɔ la nɛmɔ efula. Oko wewɔ ‘kema wa l’andja ɔnɛ,’ vɔ hawɔtɔ l’akambo wa pɔlitikɛ wa l’andja ɔnɛ.—Joa. 18:36.

Dui dia hende, ɔpɔstɔlɔ Paulo akayaelɛ ɔnɛ “dikendji” dia Kristo le anto wa lo nshi yande. (Ef. 6:20; 2 Kor. 5:20) Ɛmɛnyi wa Jehowa mbetawɔka ɔnɛ nshi nyɛ Kristo Yeso ambahema l’okudi oko Nkumekanga ka Diolelo dia Nzambi dia l’olongo ndo, oko akɛndji, vɔ pombaka mbewoya dui sɔ le wedja. (Mat. 24:14; Eny. 11:15) Akɛndji nɔmbamaka dia monga la lomangemange ndo aha mbɔtɔ l’akambo wa wedja wa lɛnɛ akawatomama. Oko akɛndji wa Diolelo dia Nzambi dia l’olongo, Ɛmɛnyi wa Jehowa mɛnaka dia ndo vɔ lawɔ wekɔ l’ɔkɛndɛ ɔsɔ waha mbɔtɔ l’akambo wa pɔlitikɛ wa wedja wodjashiwɔ.

Dui dia sato diahomba onto sɛdingola ele ɔnɛ, wanɛ wadjɛ onto ɔmɔtshi akatshi dia nde sɔnama lo dihole dimɔtshi mbeyaka ndjoyala l’ɔkɛndɛ wa kɛnɛ kasalande. (Enda lo 1 Timote 5:22, The New English Bible.) Akristo pombaka menda dimɛna dimɛna kana vɔ nangaka ndjɛmba ɔkɛndɛ ɔsɔ.

Dui dia nɛi ele, Ɛmɛnyi wa Jehowa mbɔsaka kâmɛ kawɔ k’Akristo la nɛmɔ efula. (Kol. 3:14) Lam’ayatambiya ɛtɛmwɛlɔ lo akambo wa pɔlitikɛ, kɛnɛ kayotombaka mbala efula ele diatɔnɛlo lam’asa anto awɔ. Lo ndjela ɛnyɛlɔ ka Yeso Kristo, Ɛmɛnyi wa Jehowa hawetawɔ ndjatambiya lo akambo wa pɔlitikɛ; ɔnkɔnɛ, vɔ namaka kâmɛ kawɔ k’Akristo.—Mat. 12:25; Joa. 6:15; 18:36, 37.

Dui dia tanu ndo dia komelo ele, woho wahawayatambiya lo akambo wa pɔlitikɛ mbishaka Ɛmɛnyi wa Jehowa dihonga dia vɔ mbewoya anto wa lo weho tshɛ w’atshunda wa pɔlitikɛ losango l’ohomba la Diolelo.—Heb. 10:35.

Lo menda awui w’oma l’Afundelo wɔtɛkɛtshiso la diko ango, lo wedja efula Ɛmɛnyi wa Jehowa mbɔsaka yɛdikɔ l’onto ndo l’onto diaha vɔtɛɛ ewandji wa pɔlitikɛ, ndo lotshungɔ lawɔ la mbɔsa yɛdikɔ ya ngasɔ mbetawɔmaka lo ɛlɛmbɛ wa wodja. Ko ahombama naka ɛlɛmbɛ mpikaka ase wodja dia vɔ vɔtɛɛ na? L’etena ka ngasɔ, Ɔmɛnyi wa Jehowa tshɛ ekɔ ndamɛ l’ɔkɛndɛ wa mbɔsa yɛdikɔ y’oma lo nkum’otema kande ndo yɔtɔnɛ la kɛnɛ kalɔmba Bible, dia nde mbeya woho wayondosala la ntondo ka dikambo sɔ. Naka onto ɔmɔtshi ambota dia ntshɔ lo biro ka vɔɔtɛ, sɔ ko diawenda. Kɛnɛ kayondotosala lɛkɔ ekɔ dikambo dia lam’asande la Otungi ande.

Tshoto y’Etangelo ya Ngɔndɔ ka Tanu 1, 1951, lɛkɛ 137 lo Falase, yakate ɔnɛ: “Lɛnɛ ahika Kayisa dia paka ase wodja mbidja akatshi . . . [Ɛmɛnyi wa Jehowa] kokaka ntshɔ lo biro ya vɔɔtɛ ko mbɔtɔ lo shambrɛ yadjawɔ onto ndamɛ. Lo shambrɛ shɔ mbalodja onto dikatshi diande dia vɔɔtɛ kana mbafundande lokombo l’onto ladjɛnde dikatshi. Wanɛ wavɔtɛ ntshaka kɛnɛ kayowolanga l’akatshi awɔ wa vɔɔtɛ. Ɔnkɔnɛ, lo dihole sɔ, la ntondo ka Nzambi, mbahomba ɛmɛnyi ande ntsha kɛnɛ kɔtɔnɛ la ɛlɛmbɛ ande ndo lo ndjela mbetawɔ kawɔ. Sho bu l’ɔkɛndɛ wa mbalakanya kɛnɛ kahombawɔ ntsha la dikatshi dia vɔɔtɛ.”

Kayotota naka Okristo ɔmɔtshi ekɔ l’omi lele bu ombetawodi ko pami kɛsɔ ambɔtɛtɛ dia paka wadɛnde ntshɔ otsha lo vɔɔtɛ na? Nde ekɔ l’ɛse k’omɛnde oko wele Akristo l’ɛse k’emboledi wa lâdiko. (Ef. 5:22; 1 Pet. 2:13-17) Naka nde amboyela kɛnɛ kowote omɛnde ko ambotshɔ lo biro ka vɔɔtɛ, ɔsɔ ekɔ dui diawenda ndamɛ. Ndooko lahomba mbɔnyɔla lo kɛnɛ kosadinde.​—⁠Enda lo Romo 14:4.

Kayotota dia wodja wele lɛkɔ ɛlɛmbɛ wa lɛɛta hahike anto dia vɔ mbidja akatshi koko anto mongaka la lohetsho la mamba otsha le wanɛ wahatshu lo biro ya vɔɔtɛ, kana vɔ mbidjamaka ndo lo wâle wa soyama lo demba na? Kana, kayotota naka, kânga mbahâlɔmbɛ ɛlɛmbɛ wa lɛɛta dia vɔ mbidja akatshi, anto nongolaka alanya lo woho ɔmɔtshi naka hawotshwe lo biro ka vɔɔtɛ na? Lo dikambo sɔ ndo l’akambo akina wa woho ɔsɔ, Okristo pombaka mbɔsa yɛdikɔ yande ndamɛ. ‘Onto l’onto ayɛmba wotsho ande ndamɛ.’—Ngal. 6:5.    

Ekɔ anto amɔtshi wakoka takana lam’ɛnawɔ ɔnɛ lo nshi ya vɔɔtɛ lo wodja awɔ, Ɛmɛnyi wa Jehowa ɛmɔtshi ntshɔka lo biro ka vɔɔtɛ ko akina hawotshu. Vɔ mbeyaka ndjota ɔnɛ: ‘Ɛmɛnyi wa Jehowa hawosange lolemi.’ Koko, anto pombaka mbeya ɔnɛ lo akambo wendana la nkum’otema, ɛnyɛlɔ oko lo dikambo nɛ, Okristo tshɛ pombaka mbɔsa yɛdikɔ yande ndamɛ la ntondo ka Jehowa Nzambi.—⁠Romo 14:12.

Oyadi tɛdikɔ takɔna tayɔsa Ɛmɛnyi wa Jehowa l’onto ndo l’onto lam’ewɔ la ntondo k’akambo wotshikitanyi, vɔ mbidjaka yimba dia nama lomangemange lawɔ l’Akristo la lotshungɔ lawɔ la tɛkɛta kɛnɛ kalangawɔ. L’akambo tshɛ, vɔ ndjaɛkɛka le Jehowa Nzambi dia nde mbasha wolo, lomba la ekimanyielo diaha vɔ ntsha akambo wahɔtɔnɛ la mbetawɔ kawɔ lo woho ɔmɔtshi. Ɔsɔku mbɛnyawɔ mbetawɔ kawɔ lo ɛtɛkɛta ɛnɛ w’omembi w’esambo w’ɔnɛ: “We eli dive diami la lungeli lami. Okone ne dia lukumbu laye, omenyaki mbuka, onombolaki.”—⁠Osambu 31:3.