TSHAPITA 16

Tɔlɔshane la Diabolo ndo la nkeso yande

‘Nyɔlɔshane la Diabolo, ko nde ayonyolawɔ.’—JAKOBA 4:7.

1, 2. Waa na wangɛnangɛna etena kabatizama anto?

NAKA aya ɛnɔnyi efula wakambɛyɛ Jehowa, kete aha la tâmu wɛ ambohokamɛka asawo efula wa batismu washama lo nsanganya ya weke y’Ɛmɛnyi wa Jehowa. Koko, kânga l’ɔkɔngɔ wa wɛ mpokamɛ asawo asɔ mbala la mbala, otema ayɛ munandemaka etena kɛnayɛ wanɛ walongola batismu wemala. L’etena kɛsɔ, ampokami tshɛ mongaka l’ɔngɛnɔngɛnɔ ndo mbidaka nsaka. Wɛ mbeyaka kɛdia asɔyi w’ɔngɛnɔngɛnɔ dia mɛna olui okina w’anto wɔsa yɛdikɔ ya kambɛ Jehowa. Ɔsɔ mɛtɛ tongaka tena di’ɔngɛnɔngɛnɔ efula le so!

² Etena kele efula ka l’atei aso mpokamɛka asawo wa batismu paka mbala ngana tsho l’ɔnɔnyi, andjelo wekɔ la diɛsɛ dia mɛnaka asawo asɔ mbala la mbala. Onde wɛ kokaka kanyiya yema ‘ɔngɛnɔngɛnɔ w’efula wonga l’olongo’ etena kɛna andjelo nunu di’anto wa l’andja w’otondo wakotshama l’etenyi ka la nkɛtɛ k’okongamelo waki Jehowa lomingu tshɛ? (Luka 15:7, 10) Aha la tâmu, andjelo mongaka l’ɔngɛnɔngɛnɔ etena kɛnawɔ ohamelo ɔsɔ!—Hangai 2:7.

DIABOLO “ATOKENDAKENDAKA UKU TAMBWE KADIKITA”

3. Lande na kakɛndakɛnda Satana “uku tambwe kadikita,” ndo kakɔna kayangande dia sala?

³ Koko, ekɔ ditongami dikina dia lo nyuma dionga la kɛlɛ k’efula etena kɛnawɔ anto wabatizama. Satana la ɛdiɛngɛ ande mongaka la kɛlɛ k’efula etena kɛnawɔ nunu di’anto woka andja wa kɔlɔ ɔnɛ ɔkɔngɔ. Ngasɔ mbediɔ mɛtɛ nɛ dia Satana akasɛmɛ dia anto hawokambɛ Jehowa oma lo ngandji ka mɛtɛ ndo ndoko onto lakoka tshikala la kɔlamelo le Nzambi naka nde soyama efula. (Jobo 2:4, 5) Etena tshɛ kɔsa onto ɔmɔtshi yɛdikɔ ya ndjakimɔ le Jehowa, kashi kaki Satana mɛnamaka lo sɛkɛ. Ekɔ oko Satana ekɔ lo kɔmama nunu dia mbala lomingu tshɛ. Aha la tâmu, nde “atokendakendaka uku tambwe kadikita kayanga walendi”! (1 Petero 5:8) “Tambwe” kɛsɔ kekɔ lo nomɔlomɔ dia tɔlɛ lo nyuma, mbuta ate ndanya diɔtɔnganelo diasaso la Nzambi.—Osambu 7:1, 2; 2 Timote 3:12.

4, 5. a) Lo toho takɔna tohende t’ohomba takitshakitsha Jehowa wolo waki Satana? b) Eshikikelo kakɔna kakoka monga la Okristo wa mɛtɛ?

⁴ Kânga mbalɔshamaso oma le otunyi ɔsɔ wa ngala efula, hatohombe mboka wɔma amboleka. Lande na? Nɛ dia Jehowa kitshakitshaka wolo wa “tambwe kadikita” kɛsɔ lo toho tohende t’ohomba efula. Naa toho takɔ? Ntondotondo, Jehowa akate dia “ului a wuki” wa Akristo wa mɛtɛ wayoshimbamɛ lo “fono ka wulu” kayaye. (Enyelo 7:9, 14) Prɔfɛsiya yaki Nzambi hayokitaka tatala pondjo. Diakɔ diele, kânga Satana pombaka mbeya dia nde hatondoyaki pondjo dia nanya ekambi waki Nzambi lo tshɛ kawɔ.

⁵ Yoho ya hende yakitshakitsha Nzambi wolo waki Satana mɛnamaka oma lo dui dimɔtshi dia mɛtɛ diakate okambi ɔmɔtshi waki Nzambi wa lo nshi y’edjedja. Ɔprɔfɛta Azariya akatɛ nkumekanga Asa ate: “[Jehowa ayoyalaka] la nyu lam’ayunyuyalaka kame la ndi.” (2 Ekondo 15:2; 1 Koreto 10:13) Ɛkɔndɔ efula wa lo Bible mɛnyaka dia lo nshi y’edjedja, Satana kotondoya dia ndanya diɔtɔnganelo di’ɔlɔlɔ diaki la okambi waki Nzambi tshɛ wakokambɛka la kɔlamelo. (Heberu 11:4-40) Ɛlɔ kɛnɛ, Okristo watetemala ndjasukanya la Nzambi ekɔ l’akoka wa ndɔshana ndo kânga nɛndja Diabolo. Ɔtɛkɛta wa Nzambi toshikikɛka ɔnɛ: ‘Nyɔlɔshane la Diabolo, ko nde ayonyolawɔ.’—Jakoba 4:7.

‘TEKƆ LO NDƆ TA LA ELUI W’ƐDIƐNGƐ’

6. Ngande walɔsha Satana Akristo l’onto ndo l’onto?

⁶ Satana hatodja otshumba lo ta dia lo nyuma dialɔshande ekambi waki Nzambi lo tshɛ kawɔ, koko nde kokaka nɛndja ɔmɔmɔ la l’atei aso naka sho tshika mambalɛka. Satana mbeyaka dia nde kokaka tɔlɛndja naka nde nɛndja diɔtɔnganelo diasaso la Jehowa. Ngande wahemba Satana dia sala dui sɔ? Lo tɔlɔsha lo yoho ya wolo, l’onto ndo l’onto ndo lo toho ta mayɛlɛ. Nyɛsɔ tɔsɛdingole toho tosato t’ohomba takamba la Satana tɔsɔ.

7. Lande na kamboleka Satana ndɔsha ekambi waki Nzambi?

⁷ Ɔlɔshɛlɔ wa wolo. Ɔpɔstɔlɔ Joani akate ate: “Wa la kete tshe weko lu wulu wa kanga kolo.” (1 Joani 5:19) Ɛtɛkɛta ɛsɔ wekɔ la ɔhɛmwɛlɔ ɔmɔtshi le Akristo wa mɛtɛ tshɛ. Lam’ele Satana amboshilaka nɛndja anto tshɛ wanganyi la Nzambi, kakianɛ nde kokaka sɔmana lo yoho ya wolo efula la ekambi waki Jehowa wele polo ndo kakianɛ bu lo wedi ande. (Mika 4:1; Joani 15:19; Enyelo 12:12, 17) Nde ekɔ la kɛlɛ k’efula nɛ dia nde mbeyaka dia etena kambotshikalɛ kaya mondo. Diakɔ diele nde amboleka ndɔsha ekambi waki Nzambi la wolo tshɛ. Ɛlɔ kɛnɛ nde ekɔ lo tɔlɔsha la wolo tshɛ dia nanya diɔtɔnganelo diasaso la Nzambi. Diakɔ diele nshi nyɛ mbamboleka tshɛ ohomba wa ‘shihodia tena dia mbeya kɛnɛ kahombaso sala.’—1 Ekondo 12:32.

8. Kakɔna kakalange ɔpɔstɔlɔ Paulo mbuta etena kakandate ate tekɔ lo ‘ndɔ ta’ la ɛdiɛngɛ?

⁸ Ɔlɔshɛlɔ wa l’onto ndo l’onto. Ɔpɔstɔlɔ Paulo akahɛmɔla Akristo wa lo nshi yande lo mbuta ɔnɛ: ‘Tekɔ lo ndɔ ta sho la elui w’ɛdiɛngɛ wa l’ahole wa l’olongo.’ (Efeso 6:12) Lande na kakakambe Paulo la etelo k’ɔnɛ “ndɔ ta”? Nɛ dia tɔ mbelaka kanyi ya ta dia lam’asa anto ahende wele suke suke. Ɔnkɔnɛ, lo kamba la etelo kɛsɔ, Paulo akalange mbuta dia onto l’onto ekɔ lo ndɔ ta la ɛdiɛngɛ. Oyadi tekɔ lo nsɛna lo wodja wele anto efula wekɔ la dietawɔ l’awui w’ɛdiɛngɛ kana bu, hatohombe pondjo mbohɛ dia etena kakatayâkimɔ le Jehowa, takatatɛ ndɔshana la ɛdiɛngɛ. Oma ko etena kayakimɔ Okristo le Nzambi, nde tatɛka ndɔ ta sɔ. Diakɔ diakɛnyi Paulo ohomba wa keketsha Akristo wa l’Ɛfɛsɔ mbala shato ɔnɛ: “Nyotshikale nge”!—Efeso 6:11, 13, 14, NW.

9. a) Lande na kakamba Satana la ɛdiɛngɛ ande la “kesu” yotshikitanyi? b) Lande na kayanga Satana dia ndanya ekanelo kaso ka yimba, ndo ngande wakokaso shika tanga lo welo wadjande? (Enda kiombo yele l’ɔtɛ a dui ɔnɛ: “tewɔ nkeso yaki Satana!”) c) Yoho yakɔna ya mayɛlɛ yakamba la Satana yayangaso sɛdingola kakianɛ?

⁹ Toho ta mayɛlɛ. Paulo akakeketsha Akristo dia vɔ tshikala nge la ntondo ka “kesu” yaki Satana. (Efeso 6:11) Tolembete dia Paulo akakambe la tshɛkɛta shɔ l’efula. Ɛdiɛngɛ kambaka la toho efula ta mayɛlɛ ndo vɔ mbeyaka lande na. Ambokomaka dia Akristo wakashike tanga lo woho ɔmɔtshi w’ohemba wakayɔkɔka lo woho okina w’ohemba. Diakɔ diele Diabolo la ɛdiɛngɛ tɔsɛdingolaka dimɛna dia mbeya wɛɔdu wele la so. Oma lâsɔ, vɔ kambaka la wɔdu wa lo nyuma wɛnawɔ le so. Diɛsɛ ko, sho kokaka mbeya toho efula takamba la Diabolo nɛ dia Bible tɛnyaka toho takɔ. (2 Koreto 2:11) L’etatelo ka dibuku nɛ takɛnyi toho tɔmɔtshi takamba la Diabolo tele oko nsaki ka lomombo la l’emunyi, lɔngɛnyi la kɔlɔ ndo akambo wa mindo wa dieyanelo. Nyɛsɔ tɔsɛdingole kakianɛ yoho kina yakamba la Satana, mbuta ate diɔtɔnganelo dia l’ɛdiɛngɛ.

DIƆTƆNGANELO DIA L’ƐDIƐNGƐ EKƆ TSHELO YƐNYA DIA ONTO BU LA KƆLAMELO

10. a) Monga la diɔtɔnganelo l’ɛdiɛngɛ kɛdikɛdi na? b) Ngande wɔsa Jehowa diɔtɔnganelo dia l’ɛdiɛngɛ, ndo ngande wahombaso mbɔsa dui sɔ?

¹⁰ Monga la diɔtɔnganelo l’ɛdiɛngɛ kɛdikɛdi monga la losambi la nyuma ya kɔlɔ. Diendja, dɔka, alɔhɔ, dɔki ndo tɛkɛta la edo ekɔ toho tɔmɔtshi ta monga la diɔtɔnganelo l’ɛdiɛngɛ. Oko wadieyaso, Jehowa mbɔsaka diɔtɔnganelo dia l’ɛdiɛngɛ oko ɛngɔ ka “wononyi.” (Euhwelu k’Elembe 18:10-12; Enyelo 21:8) Lam’ele sho pombaka ‘mpetsha kɛnɛ kele kɔlɔ,’ hatohombe pondjo mbɔtɔ lɔngɛnyi la nyuma ya kɔlɔ. (Romo 12:9) Sala dui sɔ ekɔ mɛtɛ tshelo yɛnya dia sho bu la kɔlamelo le Jehowa, Shɛso lele l’olongo!

11. Lande na kele Satana ayodja mɛtɛ otshumba wa woke naka nde tokonya dia sho monga la diɔtɔnganelo l’ɛdiɛngɛ? Sha ɛnyɛlɔ.

¹¹ Koko, lam’ele monga la diɔtɔnganelo l’ɛdiɛngɛ ekɔ tshelo yɛnya di’onto bu la kɔlamelo le Jehowa, Satana amboyashikikɛ dia totshutshuya dia sho sala dui sɔ. Mbala tshɛ katondoyande dia tshutshuya Okristo dia monga la diɔtɔnganelo l’ɛdiɛngɛ, Satana mbidjaka otshumba wa woke efula. Lande na? Ohokana yimba lo ɛnyɛlɔ kɛnɛ: Naka vɔ mbetawoya ɔsɔlayi ɔmɔtshi dia nde ndawɔ oma lo lɛkɛ lande ko tɔtɔ lo lɛkɛ la atunyi, kete owandji wa lo lɛkɛ l’atunyi lɔsɔ ayɔngɛnangɛna efula. Nde mbeyaka kânga mɛnyanya onto ɔsɔ lo sɛkɛ dia momadja owandji wa ntondo wa ɔsɔlayi ɔsɔ. Woho akɔ wâmɛ mbele, naka Okristo ambonga la diɔtɔnganelo l’ɛdiɛngɛ, ekɔ oko nde amboka Jehowa ɔkɔngɔ l’okonda tshɛ ndo ambeta lo wedi waki Satana. Ohokanyiya ɔngɛnɔngɛnɔ wayonga la Satana dia mɛnyanya ofungi ɔsɔ oko djembetelo ya edjelo kande k’otshumba! Onde onto ɔmɔtshi la l’atei aso nangaka dia mbisha Satana otshumba wa ngasɔ? Kema, nɛ dia sho bu afungi!

NDE MONYIYAKA AMBOLA DIA MONƐ TÂMU L’ETEMA W’ANTO

12. Tshelo yakɔna yakamba la Satana dia fukutanya woho wɔsaso diɔtɔnganelo dia l’ɛdiɛngɛ?

¹² L’edja tshɛ kayotohetshaka diɔtɔnganelo dia l’ɛdiɛngɛ, Satana hatotonda lo djonga shɔ. Omalɔkɔ, nde mɛnaka dia ekɔ ohomba tatɛ ndanya tokanyi taso. Lo ngande? Nde nyangaka toho ta mbidja Akristo l’okandokando polo ndo lo yɛdikɔ ya vɔ mbɔsa “kolo ololo, la ololo kolo.” (Isaya 5:20) Dia kotsha oyango ɔsɔ, Satana kambaka mbala efula la tshelo mɔtshi yambokamba lande deko aha nɛ, mbuta ate nde monyiyaka ambola dia monɛ tâmu l’etema w’anto.

13. Lo waaso akɔna wakakambe Satana la ambola dia monɛ tâmu?

¹³ Tende woho wakakambe Satana la tshelo shɔ lo nshi y’edjedja. Lo Ɛdɛna nde akambola Eva ate: ‘Onde mɛtɛ Nzambi akate diaha nyu ndɛ oseka olowa tshɛ wa l’ekambɔ?’ Lo nshi ya Jɔbɔ, lushi lɔmɔtshi lakasalaka andjelo losanganya l’olongo, Satana akambola ɔnɛ: “Undi, Jobo mbukaka [Nzambi] woma wukuka?” Ndo lam’akatatɛ Yeso olimu ande w’esambishelo la nkɛtɛ, Satana akohembe lo mbotɛ ɔnɛ: “Naka On’a [Nzambi] keye, uteli ave ane wahilo kenga dia ma.” Ohokanyiya yema lo dikambo dia Yeso, Satana akakome polo lo mɔnyɔla ɛtɛkɛta wakate Jehowa mingu oko shamalo la ntondo ka lâsɔ w’ɔnɛ: “On’ami la ngandji one, ndi atongenyangenyaka”!—Etatelu 3:1; Jobo 1:9; Mateu 3:17; 4:3, sho mbɛnganyisha alɛta ango.

14. a) Ngande wakamba Satana la yoho yande ya monyiya ambola dia tetawoya ɔnɛ monga la diɔtɔnganelo l’ɛdiɛngɛ kema kɔlɔ? b) Kakɔna kayangaso sɛdingola?

¹⁴ Ɛlɔ kɛnɛ, Diabolo kambaka la yoho yâmɛ shɔ dia mbetawoya anto ɔnɛ diɔtɔnganelo l’ɛdiɛngɛ kema kɔlɔ. Lonyangu ko, nde ambotondoya dia monɛ tâmu lo timba t’Akristo amɔtshi. Vɔ wambotatɛ mbuta dia toho tɔmɔtshi ta monga la diɔtɔnganelo l’ɛdiɛngɛ kema kɔlɔ. Lo mɛtɛ, ekɔ oko vɔ wekɔ lo mbuta ɔnɛ: ‘Onde mɛtɛ mbele . . . ?’ (2 Koreto 11:3) Ngande wakokaso kimanyiya Akristo asɔ dia vɔ tshikitanya ekanelo kawɔ ka yimba? Ngande wakokaso ndjashikikɛ dia toho takamba la Satana tayɔtɔ l’ashi? Dia kadimola lo ambola asɔ, tayanga sɛdingola awui ahende wa lo lɔsɛnɔ wambɔtshiya Satana awui w’ɛdiɛngɛ lɔkɔ: tɔkɛnyɔ la esakelo.

NDE KAMBAKA LA NSAKI NDO L’EHOMBA ASO

15. a) Ngande wɔsa anto efula wa lo wedja wa la mputu diɔtɔnganelo dia l’ɛdiɛngɛ? b) Ngande wambɔsɛngiyama Akristo amɔtshi la woho wɔsa andja ɔnɛ diɔtɔnganelo dia l’ɛdiɛngɛ?

¹⁵ Anto efula, djekoleko wanɛ wele lo wedja wa la mputu, mɔnyɔlaka awui wendana la ɛdiɛngɛ, dɔka, ndo alɔhɔ ndo toho tokina tonga anto la diɔtɔnganelo l’ɛdiɛngɛ. Filmɛ, abuku, emisiɔ ɛmɔtshi wa lo televiziɔ ndo tɔkɛnyɔ ta lo vidɛo mɛnyaka dia diɔtɔnganelo dia l’ɛdiɛngɛ ekɔ dui dia dimɛna ndo ndoko wâle wele lɔkɔ. Filmɛ ndo abuku amɔtshi watɛkɛta dia awui w’ɛdiɛngɛ minyanyemaka efula l’andja w’otondo polo ndo lo anto amɔtshi sala atshunda dia sukɛ diangɔ sɔ. Mbokɛmaka hwe dia, ɛdiɛngɛ wambotondoya dia mɛnya anto dia diɔtɔnganelo dia l’ɛdiɛngɛ bu kɔlɔ. Onde Akristo amɔtshi wambɔsɛngiyama la ekanelo ka ngasɔ? Eelo, lo yɛdikɔ mɔtshi. Lo yoho yakɔna? Tɔshi ɛnyɛlɔ: L’ɔkɔngɔ wa Okristo ɔmɔtshi menda filmɛ k’awui w’ɛdiɛngɛ, nde koka mbuta ɔnɛ: “Dimi filmɛ keto mbakamendji, dimi bu la diɔtɔnganelo l’ɛdiɛngɛ.” Lande na kele ekanelo ka ngasɔ bu dimɛna?

16. Lande na kele ekɔ wâle sɔna tɔkɛnyɔ tele la awui w’ɛdiɛngɛ?

¹⁶ Kânga mbele otshikitanu wekɔ mɛtɛ lam’asa monga la diɔtɔnganelo l’ɛdiɛngɛ la menda filmɛ y’awui w’ɛdiɛngɛ, kɛsɔ hɛnya dia wendelo w’awui w’ɛdiɛngɛ bu la wâle. Lande na? Tokane yimba lo dikambo nɛ: Ɔtɛkɛta wa Nzambi mɛnyaka dia Satana la ɛdiɛngɛ ande bu la dikoka dia mbeya tokanyi taso.a Ɔnkɔnɛ, oko wakatadiɛnyi, dia mbeya tokanyi taso ndo wɛɔdu aso wa lo nyuma, ɛdiɛngɛ sɛdingolaka etsha aso dimɛna dimɛna, mbidja ndo tɔkɛnyɔ tasɔnaso. Etena kɛnya Okristo oma lo dionga diande dia nde ngɛnangɛnaka filmɛ la abuku watɛkɛta dia diendja, maji, wolo wele la ɛdiɛngɛ ndo awui akina wendana la ɛdiɛngɛ, ekɔ oko nde ekɔ lo tomɛ ɛdiɛngɛ dui dimɔtshi. Lo sala ngasɔ, nde mbaɛnyaka wɔdu wele la nde. Lo wedi awɔ, ɛdiɛngɛ mbeyaka ndeka ndɔshana l’Okristo ɔsɔ lo kamba la wɔdu ande polo ndo lo vɔ mbɔlɛndja. Lo mɛtɛ, Akristo amɔtshi wakakombolaka mbeya awui efula wendana la ɛdiɛngɛ wakayongaka la diɔtɔnganelo l’ɛdiɛngɛ.—Ngalatiya 6:7.

17. L’ekimanyielo ka yoho yakɔna ya mayɛlɛ yakoka Satana ndanya Okristo wele la hemɔ?

¹⁷ Satana pembaka dia kamba aha tsho la nsaki yaso ya kɛnya tɔkɛnyɔ, koko ndo l’ohomba wele la so wa sakemɛ. Lo ngande? Okristo watetemala tata l’ɔkɔngɔ wa nde sakemɛ efula mbeyaka ndjɔkɔmɔ. (Mako 5:25, 26) Dui sɔ kokaka ndjosha Satana l’ɛdiɛngɛ ande diaaso dia dimɛna dia vɔ mbolanya. Vɔ mbeyaka dia Ɔtɛkɛta wa Nzambi sekɛka dia nyanga ekimanyielo le “wane watutshaka kolo.” (Isaya 31:2) Dia mbetawoya Okristo dia nde sekola didjango sɔ, ɛdiɛngɛ mbeyaka mbotshutshuya dia nde mbetawɔ toho t’esakelo takambawɔ la ‘maji’ kana tele la diɔtɔnganelo l’ɛdiɛngɛ, dui diele kɔlɔ efula. Naka Okristo ambetawɔ dui sɔ, kete diɔ kokaka ndanya diɔtɔnganelo diele lam’asande la Nzambi. Lo woho akɔna?

18. Weho akɔna w’esakelo wahomba Akristo tona, ndo lande na?

¹⁸ Jehowa akahɛmɔla ase Isariyɛlɛ wakakambaka la ‘maji’ ɔnɛ: “Lam’ayunyediaka anya anyu, dimi layunyaka ashu ami uma le nyu. Lam’ayunyufudiaka alombelo, dimi haluhukamaka anya anyu weli too la dikila.” (Isaya 1:13, 15) Lo mɛtɛ, sho kombolaka dia tona ɛngɔ tshɛ kakoka shimba diaha alɔmbɛlɔ aso mbokɛma ndo kakoka sala diaha Jehowa tosukɛ djekoleko etena keso la hemɔ. (Osambu 41:3) Diakɔ diele Okristo pombaka tona weho tshɛ w’esakelo wɛnama dia wekɔ la diɔtɔnganelo l’ɛdiɛngɛ.b (Mateu 6:13) Lo yoho shɔ, nde ayoyashikikɛ dia Jehowa ayowosukɛ.—Enda kiombo yele l’ɔtɛ a dui ɔnɛ: “Onde ekɔ mɛtɛ diɔtɔnganelo dia l’ɛdiɛngɛ?”

ETENA KADIANGANYEMA ƐKƆNDƆ WELE L’AWUI W’ƐDIƐNGƐ

19. a) Diabolo ambokonya anto efula dia mbetawɔ dui diakɔna lo kɛnɛ kendana la wolo ande? b) Weho akɔna w’ɛkɔndɔ wahomba Akristo wa mɛtɛ mbewɔ?

¹⁹ Etena kele anto efula wa lo wedja wa la mputu hawetawɔ wâle wele la wolo waki Satana, anto wele lo bɛkɛ dia nkɛtɛ dikina mbetawɔka dui sɔ. L’ahole asɔ, Diabolo akatondoya dia mbetawoya anto dia nde ekɔ la wolo w’efula woleki ndo wɔnɛ wele la nde. Anto amɔtshi nsɛnaka, ndɛka, kambaka olimu ndo ndalaka la wɔma w’ɛdiɛngɛ. Anto kɔndɔlaka ɛkɔndɔ efula wendana la wolo wa mamba wele la ɛdiɛngɛ. Anto kɔndɔlaka l’ɔlɔ tshɛ ndo anto ngɛnangɛnaka ɛkɔndɔ ɛsɔ. Onde sho kokaka dianganya weho w’ɛkɔndɔ wa ngasɔ? Kema, ekambi wa mɛtɛ waki Nzambi mbewɔka sala dui sɔ l’ɔtɛ w’ɛkɔkɔ ehende wa weke.

20. Ngande wakoka onto ɔmɔtshi dianganya akambo waki Satana aha la nde mbeya?

²⁰ Ntondotondo, lo dianganya ɛkɔndɔ wendana l’akambo wa diambo wasala ɛdiɛngɛ, onto lasala dui sɔ sukɛka wahɔ waki Satana. Lo ngande? Ɔtɛkɛta wa Nzambi shikikɛka dia Satana ekɔ l’akoka wa sala awui wa weke, koko vɔ tɔhɛmɔlaka nto dia nde kambaka la “akambu wa mamba wa kashi” la “kesu.” (2 Tesalonika 2:9, 10) Lam’ele Satana ekɔ okesanyi woleki tshɛ, nde mbeyaka woho wa sɛngiya timba ta wanɛ wakotwama oya l’awui w’ɛdiɛngɛ ndo woho wa mbaetawoya awui wele bu mɛtɛ. Anto asɔ mbeyaka mbetawɔ mɛtɛ dia wakɛnyi ndo wakoke awui amɔtshi wendana l’ɛdiɛngɛ ndo mbeyaka mbuta akambo akɔ oko wakasalema mɛtɛ. L’edjedja ka wonya, anto ndjodjaka oshimu esɔ l’ɛkɔndɔ ɛsɔ l’ɔkɔngɔ wa mbuta ko mbuta. Naka Okristo dianganya ɛkɔndɔ wa ngasɔ, kete nde ambokesama oma le Diabolo “shi kashi.” Nde ekɔ lo dianganya akambo waki Satana.—Joani 8:44; 2 Timote 2:16.

21. Lo naa ahombaso tɔlɔnganya asawo aso?

²¹ Dui dia hende, naka kânga Okristo aki mɛtɛ la losambi l’ɛdiɛngɛ lo nshi y’edjedja, nde hahombe kɔndɔlɛka asekande ambetawudi ɛkɔndɔ w’akambo asɔ mbala la mbala. Lande na? Bible tolakaka ɔnɛ: “Tendaki Jesu, utatedi la unduwanyi wa mbetawo kasu.” (Heberu 12:2) Eelo, sho pombaka mbika washo aso le Kristo, koko aha le Satana. Diakɔ diele etena kakinde lanɛ la nkɛtɛ, Yeso kombutɛka ambeki ande ɛkɔndɔ wendana l’ɛdiɛngɛ kânga mbakandeyaka akambo efula wendana la kɛnɛ kakoka Satana sala kana kahandakoke sala. Koko, Yeso akatɛkɛtaka paka dikambo dia losango la Diolelo. Omalɔkɔ, l’ɛnyɛlɔ ka Yeso nde l’apɔstɔlɔ, sho nangaka dia asawo aso tɔlɔngana paka la ‘akambo wa diambo waki Nzambi.’—Etsha 2:11; Luka 8:1; Romo 1:11, 12.

22. Ngande wakokaso mbisha lonya dia ‘ɔngɛnɔngɛnɔ monga l’olongo’?

²² Lo mɛtɛ, Satana kambaka la toho efula ta mayɛlɛ, mbidja ndo diɔtɔnganelo dia l’ɛdiɛngɛ dia nyanga dia ndanya diɔtɔnganelo diasaso la Jehowa. Koko, naka sho mpetsha kɛnɛ kele kɔlɔ ndo kukutɛ kɛnɛ kele ɔlɔlɔ, kete hatotosha Diabolo dihole dia nde kitshakitsha yɛdikɔ yaso ya tona awui tshɛ wele la diɔtɔnganelo l’ɛdiɛngɛ. (Efeso 4:27) Ohokanyiya ‘ɔngɛnɔngɛnɔ w’efula wonga l’olongo’ etena katetemalaso ‘shika tanga la ntondo ka nkeso yaki Diabolo’ polo l’etena kayondonyɛma!—Efeso 6:11.

[Nɔtɛ ya l’ɛse ka dikatshi]

[Kiombo ya lo lɛkɛ 194]

ONDE EKƆ MƐTƐ DIƆTƆNGANELO DIA L’ƐDIƐNGƐ?

Tɔndɔ: “Etsha wa dimba watenamaka vo ene . . . doka, . . . diatanelu. . . . Wane watutshaka akambu aso, hawukiti diulelu dia [Nzambi].”—Ngalatiya 5:19-21.

Ambola amɔtshi wakokayɛ ndjambola

▪ Onde mbekelo kɛmɔtshi kayelami mbɔtɔnɛka la dietawɔ dia lo ɔtɛmwɛlɔ wa kashi?—2 Koreto 6:16, 17.

▪ Onde diangɔ dimɔtshi diakamba la mi diekɔ la losambi la awui w’ɛdiɛngɛ?—Etsha 19:19.

▪ Onde esakelo ɛmɔtshi wayangami sakemɛ wekɔ la totshelo ta maji?—Akambu w’Asi Lewi 19:26.

[Kiombo ya lo lɛkɛs 192, 193]

TEWƆ NKESO YAKI SATANA!

Aya nunu di’ɛnɔnyi diele Satana laya manyi lo lokeso “ambete waku wahetawo uku tutshungu.” (2 Koreto 4:4) L’edja kɛsɔ tshɛ, nde salaka la wolo dia ndanya ekanelo ka yimba k’atɛmɔdi waki Nzambi. Lande na? Satana mbeyaka dia woho wakanyiyaso ekɔ la shɛngiya lo kɛnɛ kasalaso. Nde mbeyaka dia naka nde tondoya dia ndanya ekanelo kaso ka yimba, kete nde ayokoka totshutshuya dia sho sala awui wa kɔlɔ.—Jakoba 1:14, 15.

Tohɔ kɛnɛ kakandasale dia kesa Eva. Ɔpɔstɔlɔ Paulo akafunde ate: “Dimi lambuka woma nti: Uku akadimbiya ului Eva la lukesu landi, tukanyi tanyu tatukulana uma . . . le Kristu.” (2 Koreto 11:3) Lo kamba la olui, nyama kele la kɛsɔ efula, Satana akakese Eva lo mbotɛ dia nde sala dui diakahombe ndjonga l’etombelo wa kɔlɔ. Dia konya Eva dia sala pɛkato, nde akalanya ekanelo kande ka yimba. Nde akatondoya dia sala dikambo sɔ. Lam’ele Eva akohokamɛ, yoho yande ya mɛna akambo yakatshikitana ndo kɛnɛ kaki kɔlɔ kakayokomaka ɔlɔlɔ. Lam’ele yimba yande yakalanyema, nde akakotwama esadi eto dia sala pɛkato.—Etatelu 3:1-6; Enyelo 12:9.

Satana atatshikitana. Oyango ande woleki woke atatshikitana, mbuta ate ndanya timba t’anto ndo mbakonya dia vɔ sala pɛkato. Dia dianganya awui ande, Satana kambaka ɛlɔ kɛnɛ la awui wa pɔlitikɛ, la ɛtɛmwɛlɔ, awui w’okanda ndo la tɔkɛnyɔ. (Joani 14:30) Nde ambotondoya dia ndanya ekanelo ka yimba k’anto efula lo tshikitanya dionga ndo yoho yɛnawɔ akambo. Awui wakɔsamaka ntondo oko pɛkato (tshelo ya apami la apami ndo wamato la wamato mbeyana, anto ahende mbidjasɛ aha la tshukana lo yoho ya dimɛna ndo wotelo w’ana l’andja wa diwala, ndo totshelo tokina) wetawɔma ndo wɔsama mbala efula oko awui w’amɛna. Polo lo yɛdikɔ yakɔna yambotondoya Satana dia kesa anto? Bible mbutaka ɔnɛ: “Wa la kete tshe weko lu wulu wa kanga kolo.”—1 Joani 5:19.

Ndo sho Akristo mbakoka sɛngiyama la totshelo taki Satana. (1 Koreto 10:12) Oko weyande dia etena kambotshikalɛ kaya mondo, Satana “eko la kele ka wuki” ndo amboyashikikɛ dia minganyiya ekambi waki Nzambi. (Enyelo 12:12) Naka hatongi la yewo, kete awui waki Satana wa mayɛlɛ ndo “akesanyi” wakambande la wɔ kokaka ndanya timba taso ndo tokonya dia sho sala pɛkato.—Tito 1:10.

Tɔshi ɛnyɛlɔ ka woho wɔsa andja ɔnɛ diwala. Bible mbetshaka dia diwala diekɔ ekila ndo diɔ pombaka tshikala pondjo. (Mateu 19:5, 6, 9) Koko, filmɛ ndo emisiɔ wa lo televiziɔ mɛnyaka mbala efula diwala oko diokanelo dia lo tshanda mɔtshi tsho diakoka anto kakitɔna esadi eto. Oko weso Akristo, sho pombaka sala la wolo dia mbewɔ dia kanyi yaki Satana yendana la diwala shɔ monga la shɛngiya lo tokanyi taso. Naka hatɔsɛnyi wolo, kete shɛngiya shɔ kokaka ndanya woho wɛnaso akambo ndo tokonya diaha sho nɛmiya dɔkɔlɔkɔ diakatadje l’olonganyi aso. Etena kahomanaso l’ekakatanu lo diwala, sho mbeyaka nyanga ekimanyielo ndo osukɔ le onto okina lele bu olonganyi aso. Esadi eto, sho mbeyaka ndjonga la lɔngɛnyi la wolo l’onto ɔsɔ ondo osekaso la l’olimu kana Okristo okina. Naka sho tshika dia ngandji ka lam’asa womoto la pami tetemala pama, kete tayoyonga lo wâle wa ndjosala pɛkato.

Tɔshi ɛnyɛlɔ kekina ka yimba ya dipanda yambodianganya Satana. Efula k’anto waya ‘ɛtɛ wolo ndo la lotamanya.’ (2 Timote 3:4) Naka yimba ya ngasɔ yambolanya tokanyi taso, kete dui sɔ kokaka ndjodja okitanyiya aso wa lowandji lo wâle. Ɔnangɛso laya la kanyi ya ngasɔ mbeyaka momala etena kawosha dikumanyi alako amɔtshi. (Heberu 12:5) Kadiyɛso kaya la yimba ya ngasɔ mbeyaka mbidja tâmu lo kɛnɛ kendana la yɛdikɔ yaki Nzambi yendana la lowandji.—1 Koreto 11:3.

Sho kokaka monga l’ɔngɛnɔngɛnɔ nɛ dia Jehowa ekɔ lo tɔhɛmɔla lo kɛnɛ kendana la totshelo takamba la Satana. (2 Koreto 2:11) Nyɛsɔ toyashikikɛ diaha mbetawɔ di’awui waki Satana monga la shɛngiya l’ekanelo kaso ka yimba. Dia tshikala lo ngandji ka Nzambi, sho pombaka kanyiyaka nshi tshɛ “diango dia l’ulungu.”—Kolosai 3:2.

[Osato wa lo lɛkɛ 184]

Etena tshɛ kayakimɔ onto le Jehowa ndo kabatizamande, kashi kaki Satana mɛnamaka lo sɛkɛ

[Osato wa lo lɛkɛ 191]

Sho kokaka kondja osukɔ w’oma le Jehowa etena keso la hemɔ