ASAWO WƆTƆNƐ L’ƆTƐ A DUI WA LO LOHOSO | YESO SHIMBƐKA—OMA LO NA?
Lande na keso l’ohomba wa shimbamɛ?
“Untu akuto uma le umuntu! Lumu landi leli mundumundu, halukimo nsutshasutshama. Ndi atutoka, atuhimbwamaka uku dembo; atulawoka, atushishoka uku dedi.”—Jobo 14:1, 2.
Oma k’etatelo, anto wokokanyiyaka woho wakoka monga lɔsɛnɔ naka onto tshikalaka ɔlɔngɔlɔngɔ, mongaka la yoonge ya dimɛna ndo sɛnaka pondjo pondjo. Lonyangu ko, sho mvɔka. Ɛtɛkɛta waki Jɔbɔ wele la diko engo, wakafundama ambeta ɛnɔnyi ndekana nunu sato, koko mɛtɛ kawɔ kekɔ lo mɛnama polo ndo nshi nyɛ.
Anto wa l’andja w’otondo wokongaka la nsaki ka nsɛna pondjo pondjo. Bible totɛka dia Nzambi akadje nkanyi ya sɛnaka pondjo pondjo l’etema aso ndo sho mbeyaka dui sɔ. (Undaki 3:11) Oko wediɔ ngasɔ, onde ayonga dui dia lomba mfɔnya dia Nzambi ka ngandji akakoke mbidja nkanyi shɔ l’etema aso, ko nde bu l’akoka wa yikotsha? Naka wɛ nkadimola ɔnɛ bu, kete wɛ ekɔ la shadiya. Ɔtɛkɛta wa Nzambi mbelɛka nyɔi ɔnɛ otunyi ndo ndakaka dia tɔ ‘kayonyɛma.’—1 Kɔrɛtɔ 15:26.
Aha la taamu, nyɔi ekɔ otunyi. Onto a nombe hakoke kikombola. Etena keso la ntondo ka waale ɔmɔtshi, sho sandjɔka, ndjashɛka kana ndawɔka. Etena kongaso la hemɔ, sho salaka tshɛ dia nkɔnɔ. Sho salaka kɛnɛ tshɛ kakokaso nsala dia mbewɔ awui wakoka tokonya lo nyɔi.
Onde ekɔ ɔkɔkɔ ɔmɔtshi wakoka tetawoya dia otunyi w’edjedja ɔsɔ wayonyɛma? Eelo. Jehowa Nzambi lele Otungi kotonga anto dia nsɛna ɛnɔnyi engana eto, ko mvɔ. Nyɔi k’anto komonga lo nsangwelo dia Nzambi di’oma k’etatelo. Nde akalɔngɔsɔla di’anto sɛnaka pondjo pondjo la nkɛtɛ ndo nde kotshaka kɛnɛ tshɛ kalakande.—Isaya 55:11.
Ko, ngande wayonyɛma nyɔi lo pondjo? L’edja k’ɔkɔndɔ w’ana w’anto, anto wekɔ lo ndjasha dia minya nyɔi, koko wekɔ lo nkamba olimu wa kombo lo toko. Nshi nyɛ, eyangelo wekɔ lo tatetemala salema. Ambewi wa siansɛ wekɔ lo ntondja malanga ndo ekanga l’oyango wa nkitshakitsha hemɔ mɔtshi. Vɔ mbidjaka yimba efula lo tɔtshɔngu ta ditongami diele la lɔsɛnɔ. L’ahole efula, lo yɛdikɔ ya l’atei atei anto wekɔ lo nsɛna edja efula nshi nyɛ ndeka woho wakidiɔ lo ntambe ketshi. Koko, onto hakoke mbidja nyɔi otshumba. Oko wata Bible, anto “tshe watukalulaka lu ditshu.”—Undaki 3:20.
Lo mɛtɛ, hatokoke ndjaɛkɛ le anto dia vɔ nshidiya okakatanu wa wolo ɔsɔ. Losango la dimɛna ko, Jehowa Nzambi ambosangoyaka dia toshimbɛ kana totshungola oma lo nyɔi ndo onto loleki woke lo sangwelo sɔ ele Yeso Kristo.