Ase sudi dikumi wambɔkɔnɔ, ɔtɔi ambɛnya lowando

L’ɔkɔngɔ wa ndanya sheke y’ase tomindadi ta laadiko t’ase Juda ya mbodiaka, Yeso akatshu l’osomba wa Efrayimɛ, lo nɔrdɛ ɛstɛ ka Jɛrusalɛma. Nde akatshikala lɛkɔ nde l’ambeki ande mangana etale l’atunyi ande. (Joani 11:54) Koko, Elekanelo ka 33 T.D. kakayasukanaka, ɔnkɔnɛ kombeta edja Yeso akande lɔkɛndɔ nto. Nde akatshu lo nɔrdɛ lo tenyanya Samariya ndo akakome polo la Ngalileya, ɔsɔ mbaki wembwelo ande w’ekomelo l’ɛtshi kɛsɔ ka nkɛtɛ la ntondo ka nyɔi kande.

L’etatelo ka lɔkɛndɔ lawɔ, lam’akatatshɔka Yeso lo ngelo la ngelo, nde akahomana l’anto dikumi waki la sudi. Lo toho tatɔ tɔmɔtshi, hemɔ kɛsɔ mbeyaka talanyaka demba di’onto yema yema ɛnyɛlɔ oko mpita kana atoyi. (Walelo 12:10-12) Ɛlɛmbɛ wa Nzambi wakalɔmbaka dia onto lele la sudi mbelɛka la dui dia wolo ɔnɛ “mindo, mindo!” ndo takandahombe mbidjasɛ kaamɛ l’anto.​—Akambo w’ase Lɛwi 13:45, 46.

Ɔnkɔnɛ, akanga wa sudi dikumi wakangana tshalola la Yeso. Koko wakawelɛka ɔnɛ: “Yeso, Ombetsha, otoke kɛtshi!” Lam’akandɛnyi akanga wa sudi, Yeso akawatɛ ate: “Nyotshu, nyotoyaɛnya le ɛlɔmbɛdi.” (Luka 17:13, 14) Lo nsala ngasɔ, nde akɛnya dilɛmiɛlɔ diande l’Ɛlɛmbɛ wa Nzambi wakalɔmbaka dia ɛlɔmbɛdi shikikɛ dia onto laki la sudi ambɔkɔnɔ. Ko oma laasɔ nde akakokaka ndjodjasɛ kaamɛ l’anto waki komonga la sudi.​—Akambo w’ase Lɛwi 13:9-17.

Ase sudi dikumi wakayaɛkɛka lo wolo wa Yeso wa nsala ahindo. Vɔ wakatshu dia tɛnana la ɛlɔmbɛdi la ntondo ka vɔ nkɔnɔ. Etena kakiwɔ lo mboka, mbetawɔ kawɔ le Yeso kakafutama. Vɔ wakatatɛ mɛna ndo mboka dia wambɔkɔnɔ!

Ase sudi divwa wakɛdiama wakatetemala la lɔkɛndɔ lawɔ. Koko ɔtɔi l’atei awɔ kotetemala. Pami k’ose Samariya kɛsɔ akakalola dia ndjoyanga Yeso. Lande na? Pami kɛsɔ aki la lowando l’efula le Yeso l’ɔtɛ wa kɛnɛ kakokomɛ. Pami kaki la sudi kɛsɔ ‘akatombola Nzambi la dui dia wolo,’ lo mbeya dia Nzambi mɛtɛ mbambɔkɔnɔla. (Luka 17:15) Lam’akandɛnana la Yeso, nde akakusama la ntondo kande awoka losaka.

Yeso akatɛ anto wakodinge ate: “Shi anto 10 mbakakɔnwɛ? Ko lende ele akina 9? Ndooko onto okina lakakalodi dia ndjotombola Nzambi paka pami kɛnɛ k’ose wodja okina?” Ko Yeso akatɛ ose Samariya ɔsɔ ate: “Emala, tshɔka, mbetawɔ kayɛ kambokɔkɔnɔla.”​—Luka 17:17-19.

Lo nkɔnɔla ase sudi dikumi, Yeso akɛnya dia Jehowa Nzambi ekɔ lo mbosukɛ. Kakianɛ, ɔtɔi oma lo ase sudi dikumi hakɔnwɛ tsho oma lo kɛnɛ kakasale Yeso, koko ambɔtɔ lo mboka kotsha lo lɔsɛnɔ. Sho bu lo etena kakakambaka Nzambi la Yeso dia nsala ɛkɔnwɛlɔ wa ngasɔ. Koko, lo monga la mbetawɔ le Yeso, sho koka monga lo mboka ka lɔsɛnɔ, mbuta ate lɔsɛnɔ la pondjo. Onde sho mɛnyaka dia tekɔ la lowando oko wakasale pami k’ose Samariya?