‘TETEMALA NYANGA’ DIA NSHIHODIA

Kalonda: Jérôme, dimi mɛtɛ ngɛnangɛnaka ɔkɛtshanyelo wendana l’awui wa lo Bible wokotosalaka mbala la mbala.a Mbala k’ekomelo kakatasawola, wɛ akoke dimbola diendana la Diolelo diaki Nzambi. Wɛ akambola lande na ketawɔ Ɛmɛnyi wa Jehowa ɔnɛ Diolelo diakatatɛ mbolɛ lo 1914.

Jérôme: Eelo, lakadia okanda anyu ɔmɔtshi ndo lɔkɔ wakate ɔnɛ Diolelo diaki Nzambi diakatatɛ mbolɛ lo 1914. Dui sɔ diakakutola yaambalo yami nɛ dia wɛ akambutɛ ɔnɛ wetshelo anyu tshɛ tombaka oma lo Bible.

Kalonda: Kɛsɔ mɛtɛ mbasalaso.

Jérôme: Eelo, lakadia Bible k’otondo dia nyanga dui sɔ. Koko, halohɔ dia lakɛnyi divɛsa dimɔtshi diatɛkɛta dia ɔnɔnyi wa 1914. Oma laasɔ, lakatshu l’Ɛtɛrnɛtɛ ko lakatosala eyangelo wendana la ɔnɔnyi wa “1914” lo Bible kele lɛkɔ, koko ndooko divɛsa diatɛkɛta dia ɔnɔnyi ɔsɔ.

Kalonda: Dimi kaandolaka l’ɔtɛ w’awui ahende, Jérôme. Dui dia ntondo ele, l’ɔtɛ wakayadia Bible k’otondo. Kɛsɔ mɛnyaka dia wɛ nangaka mɛtɛ Ɔtɛkɛta wa Nzambi, Bible.

Jérôme: Dimi kilangaka mɛtɛ. Nɛ dia dimi fɔnyaka dia ndooko dibuku diakoka mbɛdikama la Bible.

Kalonda: Wɛ ambonda laawɔ. Dui dia hende ele, dimi kaandolaka l’ɔtɛ wakayasale eyangelo paka lo Bible dia nkondja okadimwelo lo dimbola diayɛ. Wɛ akasale paka dui nɛ diatokeketsha Bible dia nsala: ‘Tetemala nyanga’ dia nshihodia.b Ekɔ dimɛna woho wadjayɛ welo wa ngasɔ.

Jérôme: Losaka efula. Dimi kombolaka ntetemala mbeka. Koko, lakanyomotosala eyangelo ko lakashola awui amɔtshi wendana la ɔnɔnyi wa 1914 lo dibuku diakateke nɛ. Diɔ tɛkɛtaka dikambo dia dɔ diakɛnyi nkumekanga kɛmɔtshi diendana la otamba wa shaka wakahembɔma ndo ondo wakayotomba.

Kalonda: Aaa, eelo. Ɔsɔ ekɔ prɔfɛsiya katanema lo Danyele tshapita 4. Tɔ tɛkɛtaka dikambo dia dɔ dimɔtshi diakɛnyi Nɛbukadinɛza nkumekanga ka la Babilɔna.

Jérôme: Eelo, laawɔ asɔ. Lokadɛka prɔfɛsiya kɛsɔ mbala la mbala. Koko kashi kɔlɔ, talɛnyi diɔtɔnganelo diele lam’asa prɔfɛsiya kɛsɔ la Diolelo diaki Nzambi kana ɔnɔnyi wa 1914.

Kalonda: Jérôme, kɛnɛ kahombayɛ mbeya ele, kaanga omvutshi Danyɛlɛ koshihodia tshɛ lo tshɛ kɛnɛ kakandafunde l’ɛlɔmwɛlɔ ka nyuma!

Jérôme: Lo mɛtɛ?

Kalonda: Eelo. Lo Danyele 12:8, nde mbutaka ɔnɛ: “Dimi lakuki aui aso, keli dimi kunshihudia.”

Jérôme: Tetele aha dimɛ oto! Dui sɔ diambokeketsha yema.

Kalonda: Lo mɛtɛ, Danyɛlɛ koshihodia awui asɔ nɛ dia laasɔ ko etena kakashikikɛ Nzambi ka anto nshihodia tshɛ lo tshɛ kitshimudi ya prɔfɛsiya ka lo dibuku dia Danyele katakoke. Koko l’etena kaso kɛnɛ, sho koka nshihodia awui asɔ tshɛ lo tshɛ.

Jérôme: Lande na katayɛ ngasɔ?

Kalonda: Eelo, lembetɛ kɛnɛ kaangaso mbadia lo divɛsa diayela. Danyele 12:9 mbutaka ɔnɛ: “Aui wambushama, wambudihama ematelu edja ndu lu etena k’ekumelu.” Ɔnkɔnɛ, prɔfɛsiya shɔ yakahombe ndjoshihodiama edja efula l’ɔkɔngɔ, “lu etena k’ekumelu.” Ndo oko wayangaso diɛna lo wekelo aso wa Bible, tolembetelo tshɛ mɛnyaka dia nshi nyɛ tekɔ lo nsɛna l’etena k’ekomelo.c

Jérôme: Ko, onde wɛ koka nembetshiyami prɔfɛsiya kele lo Danyele?

Kalonda: Eelo, taanga mpemba.

DƆ DIAKƐNYI NƐBUKADINƐZA

Kalonda: Ntondotondo, laanga takolembetshiyisha dɔ diakɛnyi nkumekanga Nɛbukadinɛza lo tshena pe. Oma laasɔ, tayoyɔsɛdingola kitshimudi yadiɔ.

Jérôme: Kawɔ.

Kalonda: Lo dɔ sɔ, Nɛbukadinɛza akɛnyi shaka y’otamba yaki otale polo l’olongo. Oma laasɔ, nde akoke dikɛndji diaki Nzambi adjanga dia otamba ɔsɔ nyukwama. Koko, Nzambi akate dia vɔ ntshika ehekele kaki l’edio lo nkɛtɛ. L’ɔkɔngɔ wa etena ka “tena esambeli,” otamba wakahombe ndjoola nto.d Prɔfɛsiya kɛsɔ kakendanaka ntondo la nkumekanga Nɛbukadinɛza ndaamɛ. Kaanga mbakinde nkumekanga kaki la lokumu l’efula oko otamba w’otale polo l’olongo, nde akahembwama l’edja ka “tena esambeli.” Onde wɛ akoohɔ kɛnɛ kakatombe?

Jérôme: Ndooko, handjohɔ.

Kalonda: Ekɔ dimɛna. Bible mɛnyaka dia Nɛbukadinɛza akashisha yimba l’edja ka ɛnɔnyi esambele. L’etena kɛsɔ, nde komonga l’akoka wa mbolɛ oko nkumekanga. Koko, l’ekomelo ka tena esambele, Nɛbukadinɛza akayonga la yimba nto ndo akayotatɛ mbolɛ nto.e

Jérôme: Kawɔ, polo ndo wony’ɔsɔ lekɔ lo toke dimɛna. Ko diɔtɔnganelo diakɔna diele lam’asa awui asɔ tshɛ la Diolelo diaki Nzambi ndo ɔnɔnyi wa 1914?

Kalonda: Laanga kolembetshiya lo tshena pe woho wakakotshama prɔfɛsiya kɛsɔ lo toho tohende. Okotshamelo wa ntondo wakayala etena kakemadiema lowandji laki nkumekanga Nɛbukadinɛza. Okotshamelo wa hende mendanaka la etena kakatshike Nzambi dia nɔmbɔla la nkɛtɛ. Laasɔ, okotshamelo wa hende wa prɔfɛsiya ɔsɔ mbendana la Diolelo diaki Nzambi.

Jérôme: Ngande weyayɛ dia prɔfɛsiya kɛsɔ kekɔ la okotshamelo wa hende wendana la Diolelo diaki Nzambi?

Kalonda: Ntondotondo, prɔfɛsiya kakɔ kekɔ la dui dimɔtshi diɛnya dui sɔ. Lo ndjela Danyele 4:17, prɔfɛsiya kakashama dia “wasena mbeya vati: Khum’Ulungu kuledi lu diulelu di’antu. Ndi katushaka one lalangandi disha.” Onde wɛ akalembete etelo k’ɔnɛ “diulelu di’antu”?

Jérôme: Eelo, akatami lɔkɔ ɔnɛ “Khum’Ulungu kuledi lu diulelu di’antu.”

Kalonda: Ekɔ ngasɔ. Oko le yɛ afɔnyayɛ ele “Nkum’Ulungu”?

Jérôme: Dimi fɔnyaka dia ɔsɔ ekɔ Nzambi.

Kalonda: Ɔsɔku mbediɔ. Dui sɔ tɛnyaka dia prɔfɛsiya kɛsɔ hendana paka la Nɛbukadinɛza oto. Koko, tɔ mendanaka ndo la “diulelu di’antu,” mbuta ate woho wele Nzambi la lowandji laadiko di’anto. Ndo sho koka mboka dui sɔ hwe naka sho menda awui wele lo prɔfɛsiya kɛsɔ.

Jérôme: Alangayɛ mbuta?

DUI DIALEKA TƐKƐTAMA LO DIBUKU DI’OTONDO

Kalonda: Dibuku dia lo Bible dia Danyele tɛkɛtaka dui diakɔ diaamɛ mbala la mbala. Diɔ mɛnyaka mbala efula woho wayoshikimala Diolelo diaki Nzambi l’ɛlɔmbwɛlɔ k’Ɔnande Yeso. Tɔsɛdingole totshapita tɔmɔtshi dia nshikikɛ dui sɔ. Lam’alangɛ, wɛ koka mbadia Danyele 2:44?

Jérôme: Kawɔ. Lambadia laawɔ ɔnɛ: “Lu nshi ya khumi ya dikanga yako, Nzambi leli l’ulungu ayutundja diulelu diahalanaki pundju. Dio hadiuyala l’okongo a wudja ukina. Dio diayulanya waulelu ako tshe, diayâshila ushiki, ku dio diame diayushikikala pundju.”

Kalonda: Losaka efula. Onde wɛ fɔnyaka dia divɛsa nɛ tɛkɛtaka dia Diolelo diaki Nzambi?

Jérôme: Uumm. Hafɔnya.

Kalonda: Kawɔ, koko lembetɛ dia diɔ mbutaka ɔnɛ Diolelo diaki Nzambi “diayushikikala pundju.” Ngasɔ mbayonga Diolelo diaki Nzambi, koko aha kɛsɔ mbakokaso mbuta lo dikambo dia waolelo w’ana w’anto, shi mɛtɛ?

Jérôme: Ndooko, yaa hafɔnya.

Kalonda: Taanga nsɛdingola prɔfɛsiya kekina ka lo dibuku dia Danyele katɛkɛta dia Diolelo diaki Nzambi. Tɔ kekɔ lo Danyele 7:13, 14. Lo kɛnɛ kendana la ɔnɔmbɔdi wa lo nshi yayaye, prɔfɛsiya kɛsɔ mbutaka ɔnɛ: “Wakawusha luwandji, lutumbu, la diulelu dia antu tshe, wedja, la antu w’eteketa tshe ndjala l’okongo andi. Luwandji landi, leli luwandji la pundju, lahashilaki. La diulelu diandi, hadiulanyemaki pundju.” Onde ekɔ dui dimɔ dia lo prɔfɛsiya kɛnɛ diatoyeyaka dimɛna?

Jérôme: Tɔ kakatɛkɛtshi dikambo dia diolelo dimɔtshi.

Kalonda: Ekɔ ngasɔ. Ɔsɔ bu diolelo ko diolelo. Lembetɛ dia Diolelo sɔ diayonga la lowandji laadiko dia “antu tshe, wedja, la antu w’eteketa tshe.” L’ɛtɛkɛta ekina, Diolelo sɔ diayɔlɔmbɔla andja w’otondo.

Jérôme: Hafɔnya dia ɔsɔ mbele kitshimudi ya divɛsa sɔ, koko wɛ ekɔ la shadiya. Ngasɔ mbatadiɔ.

Kalonda: Ndo nto, lembetɛ dia prɔfɛsiya kɛnɛ mbutaka nto ɔnɛ: ‘Lowandji lande lekɔ lowandji la pondjo. Ndo diolelo diande hadiolanyemaki.’ Awui wakatadisha la diko fɔnaka efula l’awui wa lo prɔfɛsiya kɛnɛ kakiso oma la mbadia lo Danyele 2:44, shi ngasɔ?

Jérôme: Eelo.

Kalonda: Totokovusola yema lo tshena pe kɛnɛ kakatatɛkɛtshi la diko. Prɔfɛsiya ka lo Danyele tshapita 4 kakafundama l’oyango w’anto mbeya ɔnɛ “Khum’Ulungu kuledi lu diulelu di’antu.” Ɛtɛkɛta ɛsɔ mɛnyaka dia prɔfɛsiya kɛsɔ kekɔ la okotshamelo wa woke ndeka wɔnɛ wendana la Nɛbukadinɛza. Ndo lo dibuku dia Danyele di’otondo, sho tanaka prɔfɛsiya yendana la oshikimalelo wa Diolelo diaki Nzambi l’ɛlɔmbwɛlɔ k’Ɔnande. Onde wɛ fɔnyaka dia sho koka mbuta ɔnɛ prɔfɛsiya ka lo Danyele tshapita 4 mendanaka nto la Diolelo diaki Nzambi?

Jérôme: Ɛɛ, bu kɔlɔ. Koko, talɛnyi diɔtɔnganelo diele lam’asa prɔfɛsiya kakɔ la ɔnɔnyi wa 1914.

“TENA ESAMBELI DIAYÛLEKANA”

Kalonda: Eelo, tokalole yema lo ɔkɔndɔ wa nkumekanga Nɛbukadinɛza. Ohɔ dia lo okotshamelo wa ntondo wa prɔfɛsiya kɛsɔ, otamba waki didjidji dia nkumekanga Nɛbukadinɛza. Lowandji lande lakemadiema etena kakawahembola otamba ndo kakawatshikala la nkɛtɛ tena esambele, ɔsɔ aki etena kakandashisha yimba l’edja k’etena kɛmɔtshi. Etena ka tena esambele kɛsɔ kakakomɛ lam’akayonga Nɛbukadinɛza la yimba nto ndo kakandayotatɛ nɔmbɔla nto. Lo okotshamelo wa hende wa prɔfɛsiya kɛsɔ, ɛlɔmbwɛlɔ ka Nzambi kakahombe memadiema l’etena kɛmɔtshi, koko aha l’ɔtɛ w’ɔnɛ Nzambi akakite tatala lo yoho mɔtshi.

Jérôme: Alangayɛ mbuta?

Kalonda: Lo nshi yakafundamaka Bible, nkumi ya dikanga y’ase Isariyɛlɛ yakalɔmbɔlaka la Jɛrusalɛma yakalɔmbamaka dia mbidjasɛ lo ‘kiti ka Jehowa.’f Vɔ waki enyimpala waki Nzambi wakolɛka wodja ande. Ɔnkɔnɛ, ɛlɔmbwɛlɔ ka nkumi ya dikanga shɔ kakakɛnɛmɔlaka mɛtɛ ɛlɔmbwɛlɔ kaki Nzambi. Koko l’etena kɛsɔ, efula ka nkumi ya dikanga shɔ kotetemala nkitanyiya Nzambi ndo efula k’anto wakawalɔmbɔlaka wakayele lokolo lawɔ. Lam’ele ase Isariyɛlɛ kotetemala monga l’okitanyiya, Nzambi aketawɔ dia vɔ nɛndjama oma le ase Babilɔna lo 607 N.T.D. Oma k’etena kɛsɔ, ndooko nkumekanga kakayonga onyimpala wa Jehowa la Jɛrusalɛma. Lo yoho shɔ mbakemadiema ɛlɔmbwɛlɔ kaki Nzambi. Onde wɛ ekɔ lo tooke polo laasɔ?

Jérôme: Eelo.

Kalonda: Diakɔ diataso ɔnɛ lo 607 N.T.D. mbakatatɛ tena esambele kana mbakatatɛ etena kakemadiema ɛlɔmbwɛlɔ kaki Nzambi. L’ekomelo ka tena esambele sɔ, Nzambi akahombe nsɔna ɔnɔmbɔdi w’oyoyo wakahombe monga onyimpala ande, koko l’etena kɛsɔ onto ɔmɔtshi la l’olongo. L’etena kɛsɔ mbakahombe kotshama prɔfɛsiya kina ya lo Danyele yakatadisha. Ohokanyiya yema: Etena kakɔna kakakomɛ tena esambele sɔ? Paka naka sho nkondja okadimwelo wa dimbola sɔ, mbakokaso mbeya etena kakatatɛ Diolelo diaki Nzambi mbolɛ.

Jérôme: Ondo ngasɔ. Ohokonga kanyiya yema, shi tena esambele diakakomɛ lo 1914?

Kalonda: Ngasɔ mbediɔ! Wɛ ambonda laawɔ.

Jérôme: Ko ngande weyaso dui sɔ?

Kalonda: Eelo, etena kakandasambishaka la nkɛtɛ, Yeso akɛnya dia tena esambele diatakomɛ.g Mbokɛmaka dia ɔsɔ akahombe monga etena k’otale efula. Tena esambele diakatatɛ ɛnɔnyi nkama la ntondo ka Yeso ndja la nkɛtɛ ndo diɔ diakatetemala polo ndo l’etena kɛmɔtshi l’ɔkɔngɔ wa nde nkalola l’olongo. Ohɔ nto dia, kitshimudi ya prɔfɛsiya ya lo Danyele yakahombe ndjoshihodiama paka “l’etena k’ekumelu.”h Dui dia diambo ko, oya l’ekomelo ka ɛnɔnyi wa 1800, ambeki wa Bible w’etema ɛlɔlɔ wakadje yimba lo prɔfɛsiya shɔ ndo wakayisɛdingola la yambalo tshɛ. Vɔ wakatatɛ nshihodia ɔnɛ tena esambele diakahombe nkomɛ lo 1914. Ndo akambo efula wa weke wakatatɛ salema l’andja ɔnɛ wakashikikɛ dia Diolelo diaki Nzambi diakatatɛ mbolɛ l’olongo ɔnɔnyi wa 1914. Ɔnɔnyi ɔsɔ mbakatatɛ andja ɔnɛ mbɔtɔ lo nshi y’ekomelo. Kakianɛ, laya l’eshikikelo dia wɛ ambokondja elembetshielo efula wakokayɛ nkana la wɔ yimba . . .

Jérôme: Kawɔ. Layonyomadia awui anɛ nto dia dimi ndeka mbashihodia.

Kalonda: Tolekake ndjakiyanya. Akahombama etena k’otale dia ndo dimi lawɔ ndjoshihodia prɔfɛsiya nyɛ ndo ekotshamelo ayɔ. Eya dia lekɔ l’elongamelo dia ɔkɛtshanyelo aso wambokokimanyiya dia nshihodia ɔnɛ kɛnɛ ketawɔ Ɛmɛnyi wa Jehowa lo dikambo dia Diolelo ntomba oma lo Bible.

Jérôme: Kam’aditayɛ asɔ mbediɔ. Mbala tshɛ dimi mambiyamaka lo menda woho wakambayɛ la Bible dia mamɛ dietawɔ diayɛ.

Kalonda: Dimi kombolaka dia wɛ monga la nsaki kakɔ kaamɛ kɛsɔ. Oko wakamaditshi, aha mbala ɔtɔi mbayoyolembetɛ awui anɛ tshɛ. Ondo wɛ ekekɔ la ambola amɔtshi wa mboka. Ɛnyɛlɔ, tamboshikikɛ dia diɔtɔnganelo diekɔ lam’asa tena esambele la Diolelo diaki Nzambi ndo ɔnɛ tena diakɔ diakatatɛ lo 607 N.T.D. Ko ngande mɛtɛ weyaso dia tena esambele sɔ diakakomɛ lo 1914?i

Jérôme: Eelo, dimi toyaokaka dimbola sɔ.

Kalonda: Bible tokimanyiyaka dia mbeya yɛdikɔ y’ɛnɔnyi shikaa wele la tena esambele. Onde wɛ nangaka dia sho ndjɔsɛdingola dui sɔ mbala kayaye kayomoya?j

Jérôme: Ɔsɔ ayonga dui dia dimɛna.

OVUSWELO WA LO TSHENA PE WA DƆ DIAKƐNYI NƐBUKADINƐZA

Kalonda: Lambɔngɛnangɛna dia kɛna nto Jérôme. Dimi ngɛnangɛnaka wekelo wa Bible wekaso lomingu tshɛ.a Ngande demba?

Jérôme: Lekɔ dimɛna.

Kalonda: Lambɔngɛnangɛna efula. Mbala k’ekomelo kakimi lanɛ, takakɛtshanya dia mbeya lande na kata Ɛmɛnyi wa Jehowa ɔnɛ Diolelo diaki Nzambi diakatatɛ mbolɛ l’ɔnɔnyi wa 1914.b Oko wakatadikɛtshanya, takoke ekadimwelo w’eshika lo prɔfɛsiya kele lo Danyele tshapita ya 4. Onde wɛ aakohɔ kɛnɛ kakatadia lo divɛsa sɔ?

Jérôme: Diɔ diakatɛkɛta dikambo dia dɔ diakɛnyi nkumekanga Nɛbukadinɛza diendana la shaka y’otamba.

Kalonda: Eelo, ngasɔ mbediɔ. Lo dɔ diande, Nɛbukadinɛza akɛnyi shaka y’otamba yaki otale polo l’olongo. Nde akoke dikɛndji di’oma le Nzambi adjanga dia otamba akɔ nyukwama, koko ehekele kaki l’edio kakahombe ntshikala lo nkɛtɛ. L’ɔkɔngɔ wa “tena esambeli,” otamba wakahombe ndjɔmɔnga nto.c Takakɛtshanya nto dia mbeya lande na kele prɔfɛsiya kɛsɔ kekɔ la ekotshamelo ehende. Onde wɛ aakohɔ akendanaka la okotshamelo wa ntondo?

Jérôme: Nɛbukadinɛza ndaamɛ mbakendanaka la wɔ, shi mɛtɛ? Nde akayoshisha yimba l’edja k’ɛnɔnyi esambele.

Kalonda: Wɛ ekɔ la yimba efula. Nɛbukadinɛza akashisha yimba lo tshanda mɔtshi, diakɔ diele lowandji lande lakemadiama. Koko, l’okotshamelo wa woke wa prɔfɛsiya kɛsɔ, lowandji laki Nzambi lakahombe memadiema lo yoho mɔtshi l’edja k’etena ka tena esambele. Oko wakatadiɛnyi, tena esambele diakatatɛ etena kakalanyema Jɛrusalɛma lo 607 N.T.D. Oma k’etena kɛsɔ, ndooko kaanga nkumekanga ɔtɔi ka la nkɛtɛ kakahombe monga onyimpala wa Jehowa Nzambi dia nɔmbɔla wodja ande. Koko, l’ekomelo ka tena esambele, Nzambi akahombe nsɔna Ɔnɔmbɔdi w’oyoyo dia nɔmbɔla wodja ande: Onto ɔmɔtshi la l’olongo. L’ɛtɛkɛta ekina, l’ekomelo ka tena esambele mbakatatɛ Diolelo diaki Nzambi mbolɛ l’olongo. Wonya ɔsɔ, tamboshila nshihodia etena kakatatɛ tena esambele. Laasɔ, naka sho nshikikɛ edja kakaviya etena kɛsɔ, kete sho koka mbeya etena kakatatɛ Diolelo diaki Nzambi mbolɛ. Onde wɛ ekɔ lo tandjele?

Jérôme: Eelo, ovuswelo ɔsɔ ambokimanyiya dia dimi mbohɔ akambo efula.

Kalonda: Dimɛna efula. Tayanga ntatɛ sawo diaso wonya ɔsɔ, ndo tayanga mbeya ɛnɔnyi engana wele la tena esambele sɔ. Laki oma la nsala eyangelo wendana la dui sɔ diaha dimi mbohɛ awui woleki ohomba. Layanga mpemba kolembetshiya awui akɔ lo ndjela akoka ami.

Jérôme: Kawɔ.

TENA ESAMBELE DIAMBOKOMƐ—NSHI Y’EKOMELO YAMBOTATƐ

Kalonda: Lo okotshamelo wa ntondo wa prɔfɛsiya kɛsɔ wakendanaka la Nɛbukadinɛza, mɛnamaka dia tena esambele diaki l’ɛnɔnyi esambele wa mɛtɛ mɛtɛ. Koko, lo okotshamelo wa woke wakendanaka la Diolelo diaki Nzambi, tena esambele sɔ pombaka monga etena k’otale efula ndeka ɛnɔnyi esambele wa mɛtɛ mɛtɛ.

Jérôme: Lande na katayɛ ngasɔ?

Kalonda: Ntondotondo, ohɔ dia tena esambele diakatatɛ etena kakalanyema Jɛrusalɛma lo 607 N.T.D. Naka sho ntatɛ mbadia oma l’ɔnɔnyi ɔsɔ, kete ɛnɔnyi esambele wa mɛtɛ mɛtɛ koka tokonya lo ɔnɔnyi wa 600 N.T.D. Koko, ndooko dui dia woke diakasalema l’ɔnɔnyi ɔsɔ diendana la ɛlɔmbwɛlɔ kaki Nzambi. Oko wakatadiɛnyi, l’ɔkɔngɔ wa ntambe efula etena kakayoya Yeso la nkɛtɛ, nde akayɛnya dia tena esambele diatakomɛ.

Jérôme: Aah, eelo. Lambohɔ.

Kalonda: Diakɔ diele, lo dihole dia monga ɛnɔnyi wa mɛtɛ mɛtɛ, tena esambele pombaka monga etena k’otale efula.

Jérôme: Ko, naa otale wele l’etena kɛsɔ?

Kalonda: Dibuku dia lo Bible dia Ɛnyɛlɔ diɔtɔnɛ efula la dibuku dia Danyele diayanga tokimanyiya dia nshikikɛ mɛtɛ otale wele la tena esambele sɔ. Diɔ tɛkɛtaka dikambo dia tena sato l’etenyi diele la lofulo la nshi 1260.d Diakɔ diele, tena esambele, mbuta ate tena sato l’etenyi ndodia l’ahende toshaka nshi 2520. Onde wɛ ekɔ lo tandjele?

Jérôme: Eelo, lekɔ lo takoyele. Koko, talɛnyi woho wɛnya dui sɔ dia Diolelo diaki Nzambi diakatatɛ mbolɛ lo 1914.

Kalonda: Kawɔ, ɛsɔ tende kana sho koka mɛna diɔtɔnganelo diele lam’asa awui asɔ. Tena dimɔtshi, lo prɔfɛsiya ya lo Bible, lushi ɔtɔi lekɔ ɔnɔnyi ɔtɔi.e Naka sho mbɔsa dia lushi ɔtɔi ekɔ ɔnɔnyi ɔtɔi, kete tena esambele diayotosha ɛnɔnyi 2520. Ɛnɔnyi 2520 wakatatɛ lo 607 N.T.D. ndo wakakomɛ lo 1914.f Yoho shɔ mbakomaso l’ɔnɔnyi wa 1914, ɔnɔnyi wakakomɛ tena esambele ndo wakatatɛ Yeso mbolɛ oko Nkumekanga ka Diolelo diaki Nzambi. Ndo kɛnɛ koleki tshɛ ele, oma ko 1914 awui woleki weke wakasalema l’andja w’otondo, mbuta ate awui wakatatshi Bible dikambo dia nshi y’ekomelo.

Jérôme: Naa awui akɔ?

Kalonda: Tɔsɛdingole kɛnɛ kakate Yeso lo Mateo 24:7. Lo kɛnɛ kendana l’etena kakandahombe ntatɛ mbolɛ l’olongo, Yeso akate ate: “Wodja wayɔlɔsha wodja okina ndo diolelo diayɔlɔsha diolelo dikina, ndjala ya kasha l’adidimu wa nkɛtɛ wayonga lo dihole la dihole.” Lembetɛ dia Yeso akate dia ndjala ya kasha ndo adidimu wa nkɛtɛ wayoyala l’etena kɛsɔ. Aha la taamu, efula k’awui wa ngasɔ wakasalema l’andja aso ɔnɛ lo ntambe ketshi, shi mɛtɛ?

Jérôme: Ekɔ mɛtɛ.

Kalonda: Lo divɛsa diakɔ, Yeso akate nto dia ata wakahombe ndjala l’etena ka woongelo ande oko Nkumekanga ka Diolelo diaki Nzambi. Ndo dibuku dia lo Bible dia Ɛnyɛlɔ tɛkɛtaka aha tsho dikambo dia ta diakahombe ndɔma dihole ɔtɔi, koko dia ata wahomba monga la shɛngiya lo nkɛtɛ k’otondo l’etena k’ekomelo.g Onde wɛ aakohɔ etena kakalɔma Ta dia ntondo dia l’andja w’otondo?

Jérôme: Diɔ diakalɔma lo 1914, ɔnɔnyi akɔ waamɛ wakayatshi wakatatɛ Yeso mbolɛ. Dimi kombeyaka dui sɔ ntondo.

Kalonda: Naka sho nsangaya akambo asɔ tshɛ, kete tayoshihodia dimɛna prɔfɛsiya kendana la tena esambele ndo prɔfɛsiya nkina ya lo Bible yendana l’etena k’ekomelo. Ɛmɛnyi wa Jehowa shikikɛka ɔnɛ Yeso akatatɛ mbolɛ oko Nkumekanga ka Diolelo diaki Nzambi lo 1914 ndo ɔnɛ l’ɔnɔnyi akɔ waamɛ ɔsɔ mbakatatɛ nshi y’ekomelo.h

Jérôme: Ɛɛ, lekɔ lo toke yema.

Kalonda: Ɔsɔ ekɔ elembetshelo wokɛma hwe. Oko wakamashile kotɛ, akahombama etena k’otale dia ndo dimi lawɔ ndjoshihodia akambo asɔ tshɛ lo tshɛ. Koko, kakianɛ lekɔ l’elongamelo dia ɔkɛtshanyelo aso wambokokimanyiya dia nshihodia ɔnɛ, kaanga mbele ɔnɔnyi wa 1914 hafundami lo Bible, kɛnɛ tshɛ ketawɔ Ɛmɛnyi wa Jehowa lo dikambo dia ɔnɔnyi ɔsɔ pikama l’Afundelo.

Jérôme: Eelo, mbala tshɛ wɛ mambiyakami, nɛ dia ndooko dui diasawolaso ko wɛ hadisuke la divɛsa dimɔtshi. Wɛ hashaka pondjo tokanyi tayɛ hita. Dimi ndjambolaka lande na kele dui sɔ wolo. Lande na kele Nzambi kototɛ lo Bible ɔnɛ ɔnɔnyi wa 1914 ekɔ ɔnɔnyi wakahombe Yeso ntatɛ mbolɛ l’olongo?

Kalonda: Ɔsɔ ekɔ dimbola di’ohomba efula, Jérôme. Koko, ekɔ akambo efula wahatɛkɛta Afundelo hwe hwe lo kɛnɛ kendana la wɔ. Ko laasɔ, lande na kakasale Nzambi dia Bible fundama lo yoho yahomba paka anto mbidja welo dia kishihodia dimɛna? Ondo sho koka ndjɔtɛkɛta dikambo sɔ mbala kayaye.

Jérôme: Kɛsɔ mbakombolami.