ETENYI 7
Oma l’eolwelo ka Yeso polo ndo lo wɔtwɛlɔ wa Paulo lo lokanu
Lushi la sato l’ɔkɔngɔ wa nyɔi kande, Yeso akolwama. Lushi lɔsɔ, nde akɛnama le ambeki ande esangɔ etanu wotshikitanyi. Yeso akatetemala mɛnama le wɔ nshi 40 y’etondo. L’ɔkɔngɔ diko, l’etena kakawendaka ambeki ande, Yeso akadɛ otsha l’olongo. L’ɔkɔngɔ wa nshi dikumi, Nzambi akatshulola nyuma kande k’ekila le ambeki wa Yeso wakakikongɛka la Jerusalɛma.
L’ɔkɔngɔ diko, atunyi wa Nzambi wakayodjaka apɔstɔlɔ lo lokanu, koko ondjelo ɔmɔtshi akayâtshungolaka. Ombeki wakawelɛka Stefano akokama ave polo ndo lo nyɔi oma le atunyi. Koko tayeka woho wakayɔsɔnaka Yeso otunyi ɔmɔtshi dia nde ndjâla okambi ande wa lânde, nd’akɔ kakayoyalaka ɔpɔstɔlɔ Paulo. L’ɔkɔngɔ diko, lâsɔ ambeta yɛdikɔ y’ɛnɔnyi esato l’etenyi l’ɔkɔngɔ wa nyɔi ka Yeso, Nzambi akatome ɔpɔstɔlɔ Petero dia tosambisha Ose wodja lakawelɛka Kɔnɛliyo nde la wa lo luudu lande.
Suke l’ɛnɔnyi dikumi 13 l’ɔkɔngɔ diko, Paulo akatatɛ lɔkɛndɔ lande la ntondo l’esambishelo. Lo lɔkɛndɔ lande la hende, Timɔtɛ akayotshindɛka Paulo. Tayeka woho wakakondjaka Paulo nde l’asekande wa lo lɔkɛndɔ tena efula di’ɔngɛnɔngɛnɔ l’olimu wa Nzambi. L’ɔkɔngɔ w’akambo asɔ, Paulo akadjama lo lokanu la Rɔmɔ. Ɛnɔnyi ehende l’ɔkɔngɔ diko, nde akatshungɔ koko nde akayodjamaka nto lo lokanu ko wakayôdiakaka. Akambo wa l’ETENYI 7 wakasalema l’edja k’ɛnɔnyi 32.