OKOTSHA
Woho wa tshika tshelo ya esuse
Esuse ekɔ mbekelo kalanya lonyuma. Onto lasala esuse ndekaka ndjakiyanya paka dia ɔngɛnɔngɛnɔ ande ndamɛ ndo tshelo shɔ ndanyaka yimba y’onto.a Onto lasala esuse mbeyaka ndjokoma lo mbɔsa anto akina oko diangɔ dia anyanya diokimanyiya dia kotsha nsaki yande ya dieyanelo. Le nde, awui wa dieyanelo hawosalema l’ɔtɛ wa ngandji koko ekɔ tsho dui diakimanyiya onto dia nde ndjangɛnyangɛnya ndo kitshakitshaka nsaki ya dieyanelo lo tshanda mɔtshi. Koko, okitshekitshelo ɔsɔ mongaka paka lo tshanda mɔtshi tsho. Lo mɛtɛ, lo dihole dia ndjaka tenyi diande dia demba lo kɛnɛ kendana la “munanyi, akambu wa mindu, saki ka dimba [ka kɔlɔ],” esuse nomialomiaka nsaki shɔ.—Kolosai 3:5.
Ɔpɔstɔlɔ Paulo akafunde ate: “Anyasu wa ngandji, ne dia shu teko la alaka ane, tuyalongosole uma lu mindu tshe ya dimba ndu y’etema, tuluwanya akambu w’ekila la woma wa [Nzambi].” (2 Koreto 7:1) Naka wɛ ekɔ lo sala la wolo dia kitanyiya ɛtɛkɛta ɛsɔ, kete tohekɔke. Jehowa ekɔ nshi tshɛ ‘suke dia dimanyiya’ anto ndo dia mbakimanyiya. (Osambu 86:5; Luka 11:9-13) Lo mɛtɛ, woho wakânya otema ayɛ ndo welo wadjayɛ dia tshika tshelo ya esuse ekɔ djembetelo yɛnya dia wɛ ekɔ la dionga dia dimɛna, oyadi kânga wɛ ndjokalolaka lo tshelo yakɔ mbala mɔtshi. Tohɛke nto dia “[Nzambi] ndeka etema asu wuki. Ndi mbeyaka akambu tshe.” (1 Joani 3:20) Nzambi hakomɛ tsho lo mɛna pɛkato yasalaso, koko nde mɛnaka ndo tshondo y’onto. Woho wateyande ɔsɔ mbokimanyiyaka dia nde tohokamɛ la kɛtshi tshɛ etena kɔlɔmbaso dia nde toka kɛtshi. Ɔnkɔnɛ, tohekɔke dia nɔmbaka Nzambi l’okitshakitsha tshɛ ndo l’otema ɔtɔi oko watoyangaka ɔna lele l’ekiyanu ekimanyielo le she. Jehowa ayokosha nkum’otema ka pudipudi. (Osambu 51:1-12, 17; Isaya 1:18) Ekɔ mɛtɛ dia wɛ pombaka takola wanya amɔtshi w’ohomba efula wɔtɔnɛ la alɔmbɛlɔ ayɛ. Ɛnyɛlɔ, wɛ pombaka sala la wolo dia mbewɔ toho tshɛ ta esato wɛnyawɔ anto etakataka ndo angɛnyi wa kɔlɔ.b
Naka wɛ hatondoya dia tshika tshelo ya esuse, kete ayonga dimɛna wɛ mbutɛ ombutshi ayɛ wele Okristo kana ɔngɛnyi ayɛ ɔmɔtshi wele Okristo wambotshunda lo nyuma.c—Tukedi 1:8, 9; 1 Tesalonika 5:14; Tito 2:3-5.
[Nɔtɛ ya l’ɛse ka dikatshi]
a Esuse ekɔ tshelo ya onto sutshasutsha tenyi diande dia demba dia diwotshi dia nde mboka ɔlɔ w’efula.
b Nkumbo efula wakɔshi yɛdikɔ ya mendaka woho wakamba ana la ɔrdinatɛrɛ lo mbokitsha lo dihole diɛna anto tshɛ. Ndo nto, nkumbo efula sombaka ekongelo kɛmɔtshi ka lo ɔrdinatɛrɛ kashimba diaha onto menda esato wa mindo. Koko, hatokoke ndjaɛkɛ tshɛ lo tshɛ lo dikongelo dia ngasɔ.
c Dia mbeya alako akina w’eshika wa woho wa tshika tshelo ya esuse, enda sawo diele l’ɔtɛ a dui ɔnɛ: “Ɛlɔngɔlɔngɔ wekɔ lo ndjambola . . . Ngande wakokami tshika tshelo nyɛ?” diele lo Réveillez-vous ! wa Ngɔndɔ ka dikumi l’ɔtɔi 2006 ndo dibuku Les jeunes s’interrogent—Réponses pratiques, vɔlimɛ 1, lɛkɛ 205-211, lo Falase.