WEKELO 47
Onde wɛ ekɔ suke dia batizama?
Wɛ ambeka awui efula wendana la Jehowa oma lo wekelo ayɛ wa Bible. Aha la taamu, wɛ ambosala etshikitanu ɛmɔtshi dia nkamba la kɛnɛ kekayɛ. Koko, mbeyaka monga ko wɛ eke la dui dimɔtshi diakoshimba dia wɛ ndjakimɔ le Jehowa ndo batizama. Lo wekelo ɔnɛ, tayɔkɛtshanya wekamu ɛmɔtshi waleka mpomana l’anto dia batizama ndo woho wakokayɛ mbaekola.
1. Ewo ka ngande kahomba monga la yɛ la ntondo ka wɛ batizama?
Dia batizama, wɛ pombaka monga la “ewo k’oshika k’akambo wa mɛtɛ.” (1 Timɔte 2:4) Dui sɔ halembetshiya dia wɛ pombaka mbeya okadimwelo lo dimbola tshɛ di’oma lo Bible la ntondo ka wɛ batizama. Kaanga Akristo wambobatizama edja wekɔ lo ntetemala mbeka. (Kɔlɔsayi 1:9, 10) Koko wɛ pombaka nshihodia wetshelo w’etatelo wa lo Bible. Dikumanyi dia l’etshumanelo diayokokimanyiya dia wɛ mbeya kana wɛ ekɔ la ewo kakoka.
2. Naa wanya amɔtshi wahombayɛ ntakola la ntondo ka batizama?
La ntondo ka wɛ batizama, wɛ pombaka ‘ndjatshumoya ndo nkadimola otema.’ (Adia Etsha 3:19.) Dui sɔ nembetshiyaka dia wɛ pombaka monga la lonyangu l’efula lo pɛkato tshɛ yakayasale ndo nɔmba Jehowa edimanyielo. Wɛ pombaka ntona lɔkɛwɔ la kɔlɔ ndo ndjashikikɛ dia nsɛna lo yoho yangɛnyangɛnya Nzambi. Laadiko dia laasɔ, wɛ akatatɛ mbɔtɔ lo nsanganya ya l’etshumanelo ndo nsambisha oko opandjudi wahatabatizama.
3. Lande na kahayahombe mbetawɔ dia wɔma koshimba dia batizama?
Anto mbokaka wɔma dia hawotonga l’akoka wa nkotsha dɔkɔlɔkɔ diakawatshike la ntondo ka Jehowa. Lo mɛtɛ, ntena dimɔtshi wɛ ayosalaka wandja, koko eya dia kaanga apami la wamato wɔtɛkɛtshiwɔ lo Bible wakasale dui sɔ. Ndo Jehowa halongamɛ di’atɛmɔdi ande monga kokele. (Adia Osambo 103:13, 14.) Nde ngɛnangɛnaka etena kasalayɛ tshɛ dia mbɔngɛnyangɛnya! Nde ayokokimanyiya. Ɔnkɔnɛ, Jehowa toshikikɛka dia ndooko “ɛngɔ kayokoka tokakitola oma lo ngandji [kande].”—Adia Rɔmɔ 8:38, 39.
NYOMOTSHIMOLA
Enda woho wakokayɛ ntondoya wekamu wakoshimba dia batizama lo mbeya Jehowa dimɛna dimɛna ndo lo mbetawɔ ekimanyielo kande.
4. Eka dia mbeya Jehowa dimɛna dimɛna
Polo lo yɛdikɔ yakɔna yahombayɛ mbeya Jehowa la ntondo ka wɛ batizama? Wɛ pombaka mbeeya dimɛna dia wɛ monga l’akoka wa mbooka ngandji ndo mbɔɔngɛnyangɛnya. Nyende VIDƐO dia mɛna woho wakasale ambeki wa Bible wa l’andja w’otondo dui sɔ. Ndo oma laasɔ, nyɔkɛtshanya dimbola diayela nɛ:
Lo vidɛo yɛnyiso, kakɔna kakakimanyiya anto amɔtshi dia vɔ ndjalɔngɔsɔla dia monga suke dia batizama?
Nyadia Rɔmɔ 12:2, ndo oma laasɔ, nyɔkɛtshanya ambola anɛ:
Onde wɛ ekɔ la taamu tɔmɔtshi lo kɛnɛ ketsha Bible kana hetawɔ di’Ɛmɛnyi wa Jehowa mbetshaka akambo wa mɛtɛ?
Naka ngasɔ, kakɔna kakokayɛ nsala lo dikambo sɔ?
5. Ekola wekamu wakoshimba dia batizama
Etena kɔsaso yɛdikɔ ya ndjakimɔ le Jehowa ndo batizama, sho tshɛ pomanaka l’ekakatanu. Dia mɛna ɛnyɛlɔ kɛmɔtshi, nyende VIDƐO, ndo oma laasɔ, nyɛkɛtshanya ambola wayela anɛ:
Lo vidɛo yɛnyiso, naa wekamu wakahombe ntondoya Narangerel dia nde kambɛ Jehowa?
Ngande wakookimanyiya ngandji kokande Jehowa dia ntondoya wekamu ɛsɔ?
Nyadia Tokedi 29:25 ndo 2 Timɔte 1:7, ndo oma laasɔ, nyɔkɛtshanya dimbola nɛ:
Kakɔna katosha dihonga dia ntondoya wekamu?
6. Yaɛkɛ le Jehowa dia nde kokimanyiya
Jehowa ayokokimanyiya dia wɛ mbɔɔngɛnyangɛnya. Nyende VIDƐO, ndo oma laasɔ, nyɔkɛtshanya ambola wayela anɛ:
Lo vidɛo yɛnyiso, lande na kakengengaka ombeki wa Bible ongo dia batizama?
Kakɔna kakandeke kakokimanyiya dia nkeketsha wɛkamu ande le Jehowa?
Nyadia Isaya 41:10, 13, ndo oma laasɔ, nyɔkɛtshanya dimbola nɛ:
Lande na kakokayɛ ndjashikikɛ dia wɛ koka nkotsha dɔkɔlɔkɔ diakayatshike etena kakayayakimɔ le Nzambi?
7. Mfudia lowando layɛ lo ngandji kakoka Jehowa
Lam’ayoyotalekaka nkanyiya dia ngandji k’efula kakoka Jehowa, mbayoyoleka monga la lowando ndo mbayoyoleka nanga mbokambɛ pondjo pondjo. Nyadia Osambo 40:5, ndo oma laasɔ, nyɔkɛtshanya dimbola nɛ:
Naa ɛtshɔkɔ w’oma le Jehowa walekayɛ ngɛnangɛna?
Omvutshi Jɛrɛmiya akalangaka Jehowa, ɔtɛkɛta ande, ndo nde akangɛnangɛnaka diɛsɛ diaki lande dia mɛmba lokombo la Jehowa. Nde akate ate: “Ɛtɛkɛta ayɛ wakatanema, ndo dimi lakawale; ko ɔtɛkɛta ayɛ wakayala le mi ɔngɛnɔngɛnɔ ndo ɔlɔ w’otema ami, nɛ dia Jehowa Nzambi . . . le, wakambelɛ lo lokombo layɛ.” (Jɛrɛmiya 15:16) Kadimola lo ambola anɛ:
Lande na kele ekɔ diɛsɛ dia laande dia monga Ɔmɛnyi wa Jehowa?
Onde wɛ nangaka batizama oko Ɔmɛnyi wa Jehowa ɔmɔtshi?
Onde ekɔ dui dimɔtshi diakoshimba dia nsala dui sɔ?
Oko le yɛ, ahombayɛ nsala dia nkotsha oyango ayɛ wa batizama?
ANTO AMƆTSHI MBUTAKA ƆNƐ: “Hafɔnya dia layokoka nsɛna lo yoho yɔtɔnɛ la dɔkɔlɔkɔ diakamatshike lo batisimu kami.”
Onde ngasɔ mbayaokayɛ?
LO TSHENA PE
L’ekimanyielo ka Jehowa, wɛ koka ntondoya wekamu tshɛ dia batizama.
Ovuswelo
Ewo ka ngande kahomba monga la yɛ la ntondo ka batizama?
Etshikitanu akɔna wahombayɛ nsala la ntondo ka wɛ batizama?
Lande na kahayahombe mboka wɔma dia batizama?
SALA EYANGELO
Sɛdingola lɛnɛ ahomba mpikama yɛdikɔ yayɛ ya batizama.
“Onde wɛ aya suke dia batizama?” (Tshoto y’Etangelo, Ngɔndɔ ka sato 2020)
Eka woho wa ntondoya ekakatanu shikaa wakoka koshimba dia batizama.
“Kakɔna kashimba dia dimi batizama?” (Tshoto y’Etangelo, Ngɔndɔ ka sato 2019)
Enda woho wakatondoya pami kɛmɔtshi wekamu ɛmɔtshi wa weke dia nde batizama.
L’etatelo, pami kelɛwɔ Ataa akengengaka dia batizama. Enda kɛnɛ kakawetawoya dia nde ntakola nna di’ohomba sɔ.