Onde Nzambi ekɔ la lokombo?
Ekadimwelo washa anto efula:
▪ “Lokombo lande ko Nzambi.”
▪ “Nde bu la lokombo shikaa.”
Kakɔna kakate Yeso?
▪ “Nyolombaki okone nyati: Shesu le l’ulungu, lukumbu laye la[kidiame].” (Mateu 6:9) Yeso aketawɔka dia Nzambi ekɔ la lokombo.
▪ “Dimi lakawaewuya lukumbu laye, layuwaewuya ntu, dia ngandji kambukaye ndjala l’etema awo, la dimi l’etema awo.” (Joani 17:26) Yeso akeyanyaka lokombo laki Nzambi.
▪ “Nyu hanyuyomena ntu, edja ndu lam’ayunyuta nyati: One layayi lu lukumbu la Khumadiondjo eko la otshoko.” (Luka 13:35; Osambu 118:26) Yeso akakambe la lokombo laki Nzambi.
NZAMBI ndamɛ totɛka lokombo lande. Nde akate ate: “Dimi kele Jehowa. Ɔsɔ kele lokombo lami.”a (Isaya 42:8, American Standard Version) Nzambi akayaɔlɛ lokombo Jehowa lɔsami oma lo ɔtɛkɛta wa Hɛbɛru. Wɛ kokaka mamba dia mbeya ɔnɛ ɔsɔ ekɔ lokombo la lânde la lo Hɛbɛru latanema mbala nunu l’efundelo wa l’anya w’edjedja wa Bible. Lɔ lekɔ lokombo laleka tanema lo Bible oleki nkombo nkina yɔtɛkɛtshiwɔ lɔkɔ.
Lo dimbola di’ɔnɛ: “Naa lokombo laki Nzambi?” anto kadimolaka ɔnɛ: “Nzambi.” Koko okadimwelo ɔsɔ ekɔ oko onto lambolawɔ ɔnɛ: “Onto akɔna ambeta owandji lo vɔtɛ yosadimi?” ko nde kadimola ɔnɛ: “Kandida.” Okadimwelo ɔsɔ hawokɛma hwe, nɛ dia “Nzambi” ndo “kandida” kema nkombo y’eshika.
Lande na kakatewoya Nzambi lokombo lande? Nde akatewoyalɔ dia sho mbêya dimɛna. Tɔshi ɛnyɛlɔ kɛnɛ, onto ɔmɔtshi mbeyaka mbelamɛ ɔnɛ Yɔnɛ, Patrɔ, Papa kana Tshɛmi lo ndjela akambo amɔtshi. Titrɛ shɔ kɛnɛmɔlaka dikambo dimɔtshi diendana la onto akɔ. Koko lokombo laki onto toholaka akambo tshɛ weyaso lo dikambo diande. Woho wâmɛ mbele, titrɛ yele oko Nzambi, Kanga-Wolo-Tshɛ kotolaka yambalo yaso lo akambo tshɛ wambosala Nzambi. Koko paka lokombo lande, Jehowa, mbatohola akambo tshɛ wendana la nde. Ngande wakokaso mɛtɛ mbeya Nzambi aha la sho mbeya lokombo lande?
Ekɔ ohomba aha tsho wa lieya, koko ndo wa kamba la lɔ. Lande na? Nɛ dia Bible totɛka ɔnɛ: “Untu tshe latetaka lukumbu la [Jehowa], ayushimbamela.”—Romo 10:13; Joele 2:32.
[Nɔte ka l’ɛse ka dikatshi]
a Dia wɛ tana elembetshiyelo ekina wendana la kitshimudi ya lokombo laki Nzambi ndo lande na kele lɔ hatanema lo dikadimwelo dimɔtshi dia Bible, wɛ kokaka menda lo lɛkɛ 195-197 la dibuku Bible etshatɔ mɛtɛ? diakatondjama oma le Ɛmɛnyi wa Jehowa.
[Efundelo wa l’etei w’odingɔ wa lo lɛkɛ 6]
Onto ɔmɔtshi mbeyaka mbelamɛ ɔnɛ Yɔnɛ, Patrɔ, Papa kana Tshɛmi lo ndjela akambo amɔtshi. Koko lokombo laki onto toholaka akambo tshɛ weyaso lo dikambo diande.