Ambola w’oma le ambadi
Etena kakɔna kakakome Diolelo di’ase Amɛrikɛ l’Angleterre lowandji l’esambele laheme andja w’otondo lo ndjela prɔfɛsiya ya lo Bible?
▪ Lohingu la woke lakɛnyi Nɛbukadinɛza halembetshiya mandji tshɛ yakahemɛ andja w’otondo. (Dan. 2:31-45) Koko, lɔ mɛnyaka mandji tshanu yakolɛ ntatɛ oma l’etena kakasɛnaka Danyɛlɛ ndo yakahɛnyahɛnya ekambi waki Nzambi.
Elembetshielo wa Danyɛlɛ mɛnyaka ɔnɛ Diolelo di’ase Amɛrikɛ l’Angleterre diayotomba oma lo Diolelo di’ase Rɔma, koko hadiotodilɛndja. Danyɛlɛ akɛnyi dia lowolo laki l’ekala wa lohingu lɔsɔ mpolɔ polo ndo lo akaka la mpita (koko lowolo sanganyema la diwomba lo akaka la mpita.)a Elembetshielo ɛsɔ mɛnyaka dia Diolelo di’ase Amɛrikɛ l’Angleterre diakahombe ntomba oma l’ekala wa mbolo wa lohingu la woke. Awui wakete mɛnyaka dia ngasɔ mbediɔ. Grande-Bretagne, mbuta ate wodja waki l’ɛtshi ka nkɛtɛ ka Diolelo di’ase Rɔma, akatatɛ mbahemɛ andja w’otondo l’ekomelo ka ntambe 18. L’ɔkɔngɔ diko, États-Unis d’Amérique akayongaka wodja wa woke. Koko lâsɔ tshɛ ko lowandji l’esambele lakahombe mbahemɛ andja w’otondo latakengama. Lande na? Nɛ dia l’etena kɛsɔ ko Grande-Bretagne l’États-Unis watonge kâmɛ. Vɔ wakayonga kâmɛ paka lo Ta dia ntondo di’andja w’otondo.
Oya l’etena kɛsɔ, “ana wa diulelu” wakasambishaka l’ohetoheto djekoleko l’États-Unis lɛnɛ ele Bɛtɛlɛ kawɔ kalɔmbɔla olimu wa l’andja w’otondo. (Mat. 13:36-43) Akristo w’akitami wakasambishaka l’ohetoheto lo wedja wakalɔmbwamaka oma le Diolelo di’ase Grande-Bretagne. Etena kakatatɛ Ta dia ntondo di’andja w’otondo, ase Amɛrikɛ l’Angleterre wakokana dia vɔ ndɔshana l’atunyi awɔ. Ndo nto, lam’ele anto wakonge la ngandji k’efula ka wedja awɔ l’ɔtɛ wa ta, vɔ wakahetsha kanula ya “umuntu,” wakashimbe ekanda ɛmɔtshi wakawatondja ndo wakadje wanɛ wakalɔmbɔlaka olimu w’esambishelo lo lokanu.—Eny. 12:17.
Lâsɔ, lo ndjela prɔfɛsiya ya lo Bible, lowandji l’esambele kombahemɛ andja w’otondo otsha l’ekomelo ka ntambe 18 etena kakakome Grande-Bretagne wodja wa woke, koko lɔ lakayɛnamaka l’etatelo ka lushi la Nkumadiɔndjɔ.b
[Nɔte ya l’ɛse ka dikatshi]
a Diwomba diakasanganyema la lowolo nembetshiyaka mandji yele l’ɛse k’ɛlɔmbwɛlɔ ka Diolelo di’ase Amɛrikɛ l’Angleterre diele wolo oko lowolo. L’ɔkɔngɔ w’ɛnɔnyi efula, mandji shɔ yambodjɛ Diolelo di’ase Amɛrikɛ l’Angleterre wekamu diaha diɔ monga la wolo w’efula.
b Elembetshielo ɛsɔ wambotshikitanya eokelo kaso kele lo lɛkɛ 57, odingɔ 24 wa dibuku Prɔfɛsiya ka Danyɛlɛ, mbidja ndo esato wele lo lɛkɛ 56 ndo 139.
[Osato wa lo lɛkɛ 19]
Anangɛso enanɛi w’oma lo Bɛtɛlɛ ka la Brooklyn wakadjama lo lokanu lo Ngɔndɔ ka samalo 1918